Uunona waayelele wa ningwa uupika

0
115

LOIDE JASON

ONGWEDIVA –Oshikondo shaakwashigwana mboka inaaya putuka noyeli moluhepo mOmbelewa yOmupevi Presidente inashi nyanyukilwa onkalo yuupika moka mu li aanona yoludhi lwaaSan yomOtamanzi.

Aanona mbaka otaku hokololwa ihaaya yi we kosikola noya ningwa aapika yomomagumbo noshowo yokoohambo dhaamboka ya huma komeho.
Aanona mboka taya kolonyekwa pamukalo nguka otaku tiwa aayelele yomomukunda Amarika moshikandjohogololo shaTamanzi mOmusati. Oyendji yomuyo oya hulila owala mondondo ontine nohaya thiminikwa okuendulula ongundu oyo tuu ndjoka oshoka enongelo ndyoka li na ondondo ontintano, yo osikola oli li unene kokule nomagumbo gawo.

Senia Endjala omunambelewa ngoka e na oshinakugwanithwa okuyakula aantu mbaka kohi yOmbelewa yOmupevi Presidente moshitopolwa shaMusati, okwa ti aanona oyendji mboka yali taya endulula ondondo ontine manga ya tegelela omuhandjo gu pwe okutungwa puAmarika oya thiga po osikola nongashingeyi oya ningwa aapika yomomagumbo gamwe.

“Yamwe yomaanona mbaka oya ningwa aaniilonga yokoohambo, omanga yamwe ya kuthwa mo mosikola kooyina ya kale pomagumbo oshoka aniwa osikola kayi na shoka tayi eta po,” Endjala a ti ngaaka.

Endjala okwa ti shika otashi shunitha onkalamwenyo yaanona yeilongo monima oshoka aakuluntu kaye uvite ko nkene sha simana okulongitha aanona opo ya mone elongo nontseyo ompe muuyuni wonena.

Ashike okwa ti mboka a adha yeli mosikola ngashingeyi okwe ya fala kosikola kUutsathima hoka ya taambwa omanga omuhandjo gwopoAmarika tagu pu.

Endjala ta gwedha po ta ti ngashingeyi aanona mbaka otaya landelwa iizalomwa kombelewa ye.
Shika ombelewa otayi shi ningi molwashoka monkalo moka aadha aanona mbaka kayi shi okwi idhidhimikilwa komunamwenyo.

“Oshili onkalo ndjoka nda adha uunona mbuka otayi etitha ohenda noonkondo oshoka kau na ashike nando omakumbatha geli nawa unene pethimbo ndika lyuutalala,” Endjala ta ti ngaaka. Okwa longitha ompito ndjika opo a pule Aasamalia Aanamutimahenda opo ya kwathele aanona mbaka nomakumbatha opo uutalala wu kale inaawu ya eilongo lyawo moshipala.

Endjala okwa ti nonande epangelo otali kwathele noondalaha, aanona mbaka oya pumbwa omakumbatha opo ya kale ye na omuyenye gwagwana omanga yeli momuhandjo.

Okwa ti oya pumbwa woo omakumbatha komagumbo gawo hoka ya za oshoka kaye na shoka tayi isikile molwoluhepo.

LEAVE A REPLY

Please enter your comment!
Please enter your name here