ELCIN nOniipa ya shaina euvathano-tsokumwe

0
48

MARIA NAMUPALA

ONIIPA – Elelo lyondoolopa yaNiipa natango otali tsikile oku eta ehumokomeho mondoolopa ndjoka.
Oshiwike sha yi elelo lyOniipa pamwe nOngerki Onkwaevangeli paLuther moNamibia (ELCIN), oya shaina euvathano poombelewa dhongerki pOniipa. Ndyoka lya kolekwa kuMayola gondoolopa Tsenayo Mannetjie Kambonde pamwe naakalelipo yongerki ndjoka.

Kambonde okwa ti elelo lye ohali longitha oombelewa dhongerki, onkene oya tokola opo ya shaine euvathano, pauvathano ndika oongundu ndhika mbali odha thaneka dhi kale tadhi longele kumwe me yambula po lyondoolopa yawo. Okwa ti elelo lyondoolopa otali longo neitulemo okweeta ehumokomeho mbala, nokukwashilipaleka kutya aakalimo yamo oya nyanyukilwa omayambule po ngoka giipyakidhilwa nago.
“Otwa hala okulonga muuwanawa waakwashigwana yetu, tse tu kale ondoolopa yiikalekelwa tayi nana aatalelipo naayeti yemona mondoolopa.

Pethimbo ndika otwi ipyakidhila nomayambule po gopetameko ngaashi okulonga iilambo yoonyata, nomeya opo aakalimo yomondoolopa ya kale taya longitha omayakulo getu,” Kambonde ta ti ngaaka.

Okwa ti oya tokola ya shaine euvathano nongerki, molwaashoka Oniipa oyi na ondjokonona tayi shambula ngele tashiya kongerki, naashika otashi kala ompito ombwaanwa okuka konga omakwatho goludhi kehe kongerki.

Kambonde ta tsikile kutya Ongerki oyo ya tseya nawa omahala gondoolopa, noya pumbwa eyambidhidho lyaaleli yongerki ngele tashiya komayambule po nomahumithokomeho gondoolopa oyo tuu ndjoka.

Omahala gomatalelo po, ogendji ogeli metonatelo lyongerki yaELCIN, naashino Mayola okwa ti osheya thiminike ya shaine euvathano manga opo yeli petameko lyiilonga, yo ya kale yena uukumwe wa kola, taya tungu ondoolopa, yo yi koke nawa.

Pethimbo taya taambathana omikanda ndhoka ngoka ta wilike Church Land and Property Omusita Willem Hainane, okwa ti okwa pandula sho elelo lyondoolopa lya mono sho opala opo ya tule po euvathano yo taya longo muukumwe, nelalakano lyoku adha esindano mwaashihe shoka taya lalakanene.

Hainane okwa gwedha po kutya oya hala ya gandje iiholelwa iiwanawa koondolopa odhindji moshilongo, yo taya kala taya eta omadhiladhilo pamwe ngele tashiya komayambulepo gondoolopa yawo. Okwa uvaneke taya tsikile okulonga muukumwe nelelo lyondoolopa Oniipa.

LEAVE A REPLY

Please enter your comment!
Please enter your name here