Omudhanitanga omukulu a gandja omagano kaanasikola

0
89

MARIA NAMUPALA

OLUKONDA – Aalongwa posikola yopevi Olukonda oya pandula unene omudhanitanga nale mosipana yopashigwana omolwomizalo dhosikola ndhoka e ya pe.

Elifas Safile Shivute ngoka wo omvalele yaLukonda okwa gandja omizalo dhoskola kaalongwa omilongo 86 posikola ndjoka moshikandjohogololo Olukonda shi li moshitopolwa shaShikoto.

Mokutaamba omizalo dhawo ndhika omulongwa ngoka a popi pehala lyayakwawo okwa ti oya pandula no yu uvite etumba sho moshigwana muna aasamalia aanamutimahenda sigo onena. Johannes Petrus okwa ti oya pandula noonkondo sho Shivute e na uuwanawa wawo komutima.

Shivute okwa gandja omagano ngaka okupitila mehangano eNamibia tali ithanwa San Fishing, mono ye eli gumwe gomaakwatelikomeho. San Fishing okwa gandja omizalo ndhoka, ta kwathele wo moku thikamitha po etala lyaalongwa, mono tamu kala tamu ningilwa owandaha osho wo iinyangadhalwa yilwe yoskola ndjoka. Omizalo pamwe netala oya kotha oshimaliwa shooN$ 85 000. Omizalo dhoskola odha kwatela mo ngaashi oohema, oohulukweya, oombulukweya, oongaku, oombindja na yilwe.

Kakele komizalo dhoskola ndhoka, ehangano ndyoka olya gandja wo omagano koosikola ngaashi Onkumbwimbwi nosikola yOlukonda Senior Secondary School, noshimaliwa shoka ashihe kumwe sha gandjwa kulyo koosikola adhihe oshithike pooN$200 000, mwa kwatelwa noskola yoshikunino tayi ithanwa Okaloko Shivute.

Shivute okwa yelitha kutya oya tokola ya gandje omakwathelo koosikola ndhoka dhopomukunda, nelalakano okupungula moshigwana shoka hashi ya yambidhidha unene. Okwa ti otaya kala taya gandja omakwatho kwaamboka yega pumbwa nokutsakaneka epangelo ondjilakati.

Okwa endulula oohapu dha tsa ndhoka tadhi ti, okugandja okuna elago komeho gokutaamba, nokwa endulula euvaneko kutya otaya kala noku gandja omayambidhidho kwaamboka yega pumbwa.

Shivute okwa ti mokupa aanasikola mbaka omizalo dhosikola otashi ya kumike ya kale taya yi kosikola ya manguluka sho ya zala nawa omizalo dhawo.

Omukuluntuskola posikola mpoka Tomas Niilonga okwa ti osikola yawo oya totwa po mo1915 pethimbo lyaatumwa Aasoomi, no yi na ngashingeyi aalongwa yeli 265. Mokati kaambaka omwaalu oomune ogwaanona oothigwa nosho wo mboka yeli monkalo ya nika oluhepo.

Okwa gwedhapo kutya ekuthombinga lyaavali melongo lyaanona otali etitha oonkondo, noyendji ohaya talele po enongelo lyawo, nokukutha ombinga mulyo naashika otashi ya kwatha okugandja elongo lyongushu koohembundangele.

Caption: Omudhanitanga nale mospana yoBrave Warriors, Elifas Safile Shivute ta gandja omagano gomizalo dhosikola kaalongwa yopOlukonda Primary school oshiwike shayi.

LEAVE A REPLY

Please enter your comment!
Please enter your name here