Oshikonga shoNAMPHIA sha tameka

0
82

Komutoolinghundana

WINDHOEK – Oshikondo shonghalonawa noundjolowele osha longekida oshikonga shoNAMPHIA tashi tale nghee HIV ya kuma oshiwana nokutala nghee epangelo tali yandje omayakulo kwaavo va umbata ombuto yoHIVi. Efatululo ola yandjwa kuTerttu Shuumbwa koshikondo shoundjolowele nghee oshikonga shoNamibia Population-Based HIV Impact Assesment tashi ka longa.

Shuumbwa ta fatulula kutya,oshikonga sha tameka muJuni neudo otashi ka pwa muSepteba neudo moitukulwa aishe yoshilongo. Ta fatulula kutya,ekonaakono la ningilwe 2015 ola holola kutya, ounona weeperesenda ne oshinkwanyu imwe ova monika ombuto yoHIV okudja mu ina , nokwa teelelwa pomido dopokati 2016-2020 omwaalu u ye poshi neeperesenda mbali. Shuumbwa ta weda po ta ti, oshikondo osha longela kumwe noNamibia Statistics Agency (NSA) noNamibia Institute of Pathology nekwafo pashimaliwa ola dja koUnited States President’s Emergency Plan for AIDS Relief (PEPFAR) okupitila moU.S Centres for Disease Control and Prevention(CDC).

Omunambelewa wehangano loundjolowele ta weda ko kutya, oshikando shotete moNamibia tamu ningwa omapekaapeko oludi eli. Ta weda po kutya, natango olwotete okutala komukalo weyandjo lomiti paife, komukalo welaameno, efiloshisho lovanaudu nonghee eyandjo lomiti tali ende moitukulwa aishe 14 moshilongo. Ovaningi vomakonaakono otava talele po omaumbo omayovi 12 a hoololwa mo kehangano loNSA pefimbo la li yoo tali ningi omakonaakono petameko lomudo. Ekonaakono la kwatela mo ovanhu omayovi 26 okudja peedula 0-64 moitukulwa aishe 14 yoshilongo.

Shuumbwa okwa yelifa kutya, ovanhu otava ka konaakonwa pefimbo opo nokupewa oidjemo, tava xungwa omwenyo, manga ekonaakono inali tameka. Ava tava ka monika ombuto otava ka pewa eembapila okuya koihakulilo yopopepi. Epangelo ola tula po omulandu opo keshe ou ta monika ombuto paife a tameke ouhaku. Shikwawo, 2002 moshilongo omwa li omandiki okutukulila oART 10, ashike 2016 okwa fika po300. Ovanhu omayovi 153 ohava tambula ART moNamibia.

Shuumbwa ta weda po kutya, ouyelele aushe otau ka ongelwa mokukufa okahonde kanini komunwe, koshififinwa ile mokwooko. Ta fatulula kutya,ouyelele tau di moshikonga omu, otau ka kwafela epangelo mokufaneka omayakulo taa pupaleke omukalo weameno kombinga yoHIV okuka fika 2030.

LEAVE A REPLY

Please enter your comment!
Please enter your name here