Oshitopolwa shaZambezi sha pewa konyala oodola oomilliona N$360

0
45

Edgar Brandt

Windhoek- Oshitopolwa shiihwa yaziza shaZambezi osha pewa iimaliwa ayihe kumwe oodola N$358,7 oomilliona okuza moshiketha sheyambulo po omumvo gwiimaliwa nguka.

Omwaalu omunene gwoodola N$85 oomilliona otadhi longithwa metungo lyondjila yomamanya nenge ndjoka yongalama yuule wookilometa omilongo 50 pokati ka Isize na Schuckmannsburg.

Omanga omwaalu omunene gwa landulako otagu ka longithwa moporojeka yuunamapya yedhina Green Scheme moshitopolwa shoka ndjoka tayi pewa oodola N$28 oomilliona. Oshikondo shUunamapya, Omeya , nOmakuti shoka osho hashi wilike iilonga yoGreen Scheme osha pewa oodola N$63.41 oomilliona omolwoporojeka ngaashi egandjo lyomeya komikunda, ewiliko lyoonzo dhomomakuti, osho wo etungopo lyomandiki gokukonakonena iinamwenyo niimeno pomiyelo dhopoongamba.

Oodola oomilliona omilongo N$20 kehe odha pewa ooprojeka dhi ili no dhi ili ngaashi ndjoka yokutunga oohostela dhaanasikola, okuopaleka osho wo okutunga oohofa dhopevi, iimaliwa mbika otayi longithwa wo okuopaleka okapale koondhila kaMpacha.

Etungululo lyopate yopokati ka Liselo na Kongola nalyo olya pewa oodola N$20 oomilliona ndhoka tadhi longithwa okufutila iilonga yokutula oteya kondjila ndjika. Omwaalu aguhe gwa pewa Oshikondo Shelongo Uunkulungu nOohedhi oyo oodola N$37.9 okufutila iilonga nooporojeka dha yooloka mwakwatelwa okwoopaleka oosikola, okutunga omandiki gokwiilongela, omandiki goonzo gaalongi, omandiki gokwiilongela gaakwashigwana osho wo okutunga omagumbo gokukala noku edhilila aalongisikola.

Oshikondo shEyambulopo lyOmikunda nIilando otashi ka longitha oomilliona dhoodola N$28 moshitopolwa Zambezi omumvo gwiimaliwa nguka. Mbika oya nuninwa okuopaleka nokutunga po omayakulo gopamuni moodoolopa dhomoshitopolwa, osho wo okutunga oombelewa oonene dhoshitopolwa Zambezi, oombelewa dhoshikandjohogololo shaLinyanti osho wo ndhoka dhoshikandjohogololo shaKabbe yuumbugantu. Omutengenekothaneko omunene gwiilonga yeyambulopo moZambezi otagu pewa Oshikondo shIilonga Niiyenditho omumvo gwiimaliwa 2017/18 ngoka guli konyala oodola N$138 oomilliona.

Ooporojeka dhOshikondo shika odha kwatelamo okutunga olutenda lwa za koCape Fria sigo okoKatima Mulilo, iilonga yokundjeka po onetwork yiiyalo osho wo okugandja omakwatathano gomauyelele koombelewa dhopashitopolwa osho wo okundjeka po osasiona dhokukonakonena omahauto naahingi.

Iimaliwa oya gandjwa wo okulongitha momayakulo ge na sha nuundjolowele moshitopolwa mwakwatelwa uupangelo wuundjolowele wopetameko, okundjeka po oshipangelo shaKatima Mulilo nosho wo okukaleka po nokuopaleka iitnguomwa yopaundjolowele moshitopolwa.

LEAVE A REPLY

Please enter your comment!
Please enter your name here