Taya lala pevi noyana molwoluhepo

0
2876

Loide Jason

ANDAMBOMBALI-Pevi otwa yala po ashike iikutu opo tu igamene kuutalala, osho Maria Benyameni ngoka ngashingeyi ha lala pevi noyana konima sho a tidhwa komuholike gwe.

Benyamen omunamimvo omilongo 37 okwi iyadha ta lala pevi mokagumbo ke sho a tidhwa kumumawayinagona ngoka a vala naye uunona une.
Benyameni ngoka a kala oomvula 14 nomuholike gwe ye omumwayinagona wo okwali a tidhwa megumbo moka eta kala ha lala mepya noyana yahamano nomutekulu gwe gumwe. Ashike uupyakadhi mboka wa taalela Benyameni oomboka wokulala pevi pwa yalwa oohema dhawo. Pehala mpoka oha lala nomwana gwosheeli ngoka eli metegelelo, omwanamati gwomimvo 16, aakadhona yatatu nonkelo ye yi na oomvula ndatu.
Benyameni ye mwene pethimbo ndika okuli metegelelo.

Ohaya isikile owala elapi limwe lya kulupa lyali etokele ihe ngashingeyi olya ningi embundu luudhe oshoka kapuna oothewa lyokuliyoga na ohali yalwa pevi kehe esiku.

Ngele elapi ndyoka oweli mono ito itaale kutya olyo tali isiikilwa kaantu ayehe mboka.
Ngashingeyi mbaka oya dhika po ondunda niihenguti ati yiilya mbyoka ya longo nuumvo. Ondunda ndjoka yi na oombululu tadhi vulu okupita nando omayoka. Shoka tashi etitha ohenda ooshika kutya efamilia ndika olyi inekela ashike miikulya yoshikukuta shoka haya pewa omwedhi kehe. Kansela gwoshikandjohogololo shaKatana Rosalia Shilenga ota indile aanamutimahenda ya kwathele naashoka yena po opo ya vule okutungila mbaka egumbo lili nawa. Shilenga okwa ti kashi li nawa aantu mbaka taya lala pevi pethimbo ndika lyuutalala unene kwaamboka yi ihumbata nenge komunona ngoka ena oomvula ndatu.

Shilenga okwa tsikileko ta ti onkalo ndjika ondhigu noonkondo noshigwana osha pumbwa okukwathela nande onomakumbatha nenge netalashe opo ya vule okulala hwepo. Muutalala mbuka ngele mbaka inaya kwathelwa oya tegelelwa ya ka lale ita ya kotha molwombepo ontalala ndjoka ta yi ke ya dhenga. Sho Kundana a thiki pehala ndika okwa adha Benyameni nonkelo ye megumbo taya tula po omwiha omanga oyana yamwe ya ya kosikola. Osheeli she oshaya koshipangelo sha ka mona okanona. Egumbo ndyoka olya dhikwa niihengutii, moka muna oondunda mbali yimwe ondjugo omanga onkwawo yokupungula.

Mepya otamu monika mwa longwa ihe iilya mbyoka ya longa inayi yungulwa po manga oyi li ashike poshipale . Benyameni okwa hokolola kutya pethimbo lyomvula kashali oshipu oku lala mondunda moka. “Sho ngaa omvula tayi loko kombinga huka tse otatu uka mpoka tu wete itaa pa lokwa. Sho twa ka tala ondunda ayihe oya tuta, tse otatu lala twa kuutumba,” osho a popi ngaaka moShikwambi sha dhiginina.
Okwa indile opo a kwathelwe iikumbatha nenge ombete ku vule oku lala oyana mboka haya yi kosikola opo okukalamwenyo kwawo ko ku lesha kwaa yiwe moshipala konkalo ndjika yeli.

LEAVE A REPLY

Please enter your comment!
Please enter your name here