Uudhano woonkambe we enda nawa pOnamatanga

0
124

SHIPI ELAGO

ONAMATANGA-Okapale kaHelvi Mpingana Kondombolo oka li kuudha sigo okooha dhako, sho aantu ya za koombinga adhihe dhoshitunda Namibia ya li ye ya okutala uudhano woonkambe wokomumvo pOnamatanga Olyomakaya ga piti.

Uudhano mboka ta wu ende ta wu koko owa li wa nana engungo enene lyaatali inaa li monika mo nale moNamatanga ndyoka lya li lya kwatelwa komeho kumwene gwiita yoshitunda shaNgandjera Omukwaniilwa Japhet Mupiya, aakwanepangelo nosho wo aanangeshefa mboka ya li ya kwatelwa komeho ku David David mwene gwoongeshefa dhoKambwa Trading.

Oonakana ku udha iiyela oya li taya kutha oonkali pepata miinano itatu oometa 100 oometa 200 noometa 1 600 moka konyala oonkambe dhili 23 naakayili yadho ya li ya kutha ombinga.

Moshinano shoometa 100 Amwaama Teofilus okwa li a fadhuka po nokapandi koodola 600 ekopi nombandi yoshingoli sho a li ak angele oyakwawo nonkambe ye Ben. Akugulu Josua okwa li eya pehala etiyali nonkambe ye Shimbungu ta mbendekwa okapandi koodola 500 nombandi yoshisiliveli, ye Kefas Alex te ya pehala etitatu nonkambe ye Hummer nokupandulwa nokapandi koodola 400.

Amwaama Teofilus okwa li a kumitha aantu oyendji konima sho a li a thigi po aakayili oyakwawo moshinano shoometa 200 nokutoola po ishewe ekopi moshinano shika muule woominute mbali noosekonde ne, nokuyakula po okapandi koodola 600 ekopi nombandi yoshingoli.

Lukas Iiyambo nonkambe Juberg okwa li e ya puutiyali noku yakula po okapandi koodola 500 nombandi yoshisiliveli, ye Kefas Alex te ya puutitatu nonkambe Hummer moka naye a li a pewa okapandi koodola 400. Moshinano shoometa 1 600 Uukongo Ignatius okwa li a dhenge mo yakwawo nokambe ye Tjitambi noku adha esindano moshinano shika moka a li apewa wo naye ondjambi yotango yoodola 600 ekopi, nosho wo ombandi yoshingoli. Lukas Iiyambo okwa li eya puutiyali moshinano shika nonkambe ye Juberg nokwa li a pewa ombandi yoshisiliveli nosho wo okapandi koodola 500, ehala etitatu olya li lya kuthwapo ku Amwaama Tjera nonkambe ye Parafina. Bishi Uushona okwa li natango uulukile oshigwana shaNamatanga komutse gwondjamba mokuumba uuta wa nangongo moka naye a li a pandulwa nokapandi koodola 200, ye Samuel Kene te ya omutiyali noku toola po oshipandi shoodola 150, omanga Angula Timoteus eya pehala etitatu noku pewa oodola 100.

Opwa li wo oontana dhanelende ta dhi kutha ombinga mokuumba wanangongo moka Tressia Nestor ali a kutha po ehala lyotango nokufadhuka po nokapandi koodola 200, omanga Emilia Iiyambo a li eya puutiyali moka ali a pandulwa noodola 150. Uudhano mbuka owa li wa kwashilipalekwa koongeshefa dho Kambwa Trading na ohawu kalako omumvo kehe pOnamatanga, omukunda gu li ookilometa konyala 100 muuninginino wodoolopa yaKahao moshitopolwa shaMusati na ogu li moshitopolwa-hogololo shaRuacana.

LEAVE A REPLY

Please enter your comment!
Please enter your name here