YomIiputu ya indilwa yaa longithe nayi omalovu

0
88

MARIA NAMUPALA

IIPUTU – Mwene gomukunda Iiputu mOnankali, Malakia Namushinga okwa kumagidha aakalimo yokomikunda dhaa hoka yi ikaleke kokule nelongitho nayi lyomalovu, molwaashoka otaga teyagula po oshigwana.

Shika Namushinga okwe shi popi oshiwike shika, moonkundathana naKundana sha landula oolopota dhomwaalu gwaantu ogundji tagu longitha nayi omalovu. Ta ti okwa konekwa aagundjuka oyendji oyo taya longitha nayi omalovu, mo kukala owala pomahala gomanwino po opo hapu longelwa iimbuluma niilonga iiwinayi oyindji.

Mwene gomukunda Iiputu okwa yelitha kutya elongitho nayi lyomalovu olyo eshongo enene moshigwana, a ti omalovu otaga teyagula po oshigwana. “Momagumbo ogendji ombili oya kana mo molwaashoka aanegumbo ayehe oya ninga iihakanwa yomalovu, naavali oya ninga iihakanwa yomalovu, yo taya nwethamo omaluvalo gawo,” ta ti ngaaka. Okwa ti aavali oyendji momagumbo ihaya kalamo, nolundji ihaya mono omathimbo gokupukulula nokuguna aanona yawo, ta ti omalovu ogo ga ninga iikulya yaanegumbo, nongele omuntu ina enda pondunda yomanwino esiku ndyoka okwafa owala ena oshitopolwa she sholutu kaashiko kuye.

Namushinga okwa kumagidha aanamukunda ye yi iyageke okukala poondunda dhomanwino ethimbo lya pitilila, yo taya kala tayi iyageke okulonga iilonga mbyoka inaayi opalela.

Okwa pula woo aavali ya kale haya tokelwa momagumbo nomaluvalo gawo, yo ya kale aluhe taye ya longo oondunge, nonkene yena okwi iyageka okukala pomahala gomanwino.

Ta ti konyala iimbuluma ayihe hayi longwa ohayi longwa aantu yaza pomahala gomanwino, nolundji ihaya kala yeshi shoka taya ningi, molwaashoka otaya longithwa komalovu. Okwa ti wo kutya oyendji yomaakulupe mboka haya kwata openzela iimaliwa yawo ohaye yi longithapo momalovu, yo taya kala inaaya hupa po nasha.

Namushinga okwa holola wo oku uva nayi kwe, sho ta ti aanona aashona oya konekwa haya kala puundunda nolundji ihaya landula omapukululo gaavali.

Okwa pula aagundjuka osho wo aakalimo yomomukunda ngoka ya gandje iiholelwa iiwanawa kaanona mboka opo taya putuka, yo ya putudhile aanona esimaneko netiloKalunga.

Ta ti otashi ehameke okutala epipi lyokomongula tali putudhilwa monkalo yomalovu, notaya nwethwa iiholelwa iiwinayi.
Okwa londodha kutya okanona kehe taka ka adhika puundunda womanwino otaka katukilwa onkatu pamwe naavali yako.

LEAVE A REPLY

Please enter your comment!
Please enter your name here