Afya mokuuda efyo lomutekulu

0
9272

Omutoolinghundana

Efyo laSergeant Anna Magano Ileka (42) oo a lyatwa nokudipawa kotuwa ya vakwa pOshiko Roadblock, otaku fekelwa la etifa vali efyo laxekulu umwe.

Otaku hokololwa omukulupe umwe xekulu ya Ileka a xulifa mEtitano, konima ashike eshi a lombwelwa efyo lomutekulu ou, naashi okwa diladilwa kutya okwa uda nai neenghono, shaashi omukulupe ou kali ngeno te li yave. Ileka okwa ningilwa oshiviloxupulifo onghela, sha ningilwa poRoadblock yaNgwediva opo a xulifila. Ovapopepi nofamili yanakufya Ileka otava hokolola Ileka oye a li omunyangeli wavamwaina novana vavamwaina ovo vamawe va xulifa.

Vati, omupolifi ou oye a li omutonateli weumbo lovakulunhu vaye ovo aveshe va xulifa ko, ye oye ali ena oilonga yomungudo meumbo. Taku hokololwa kutya Ileka okwa li va dalwa vahapu kuxe na ina ndele mongaha ova hangwa po ashike noundenge vavali, okamati nokakadona. Ovakulu vaye aveshe ova xuli fa ko, na vamwe vomwaavo va xulifa ova fiya ko eefiye odo dali hadi filwa oshisho kunakufya ou. Vati okwa li ha file oshisho ounona aveshe kumwe vahamano, veli mepupi leedula 15.
Ileka okwali a xulifa poshikando konguloshi yEtine ladja ko eshi a lyatwa nokufya kotuwa oyo ya li tai shingwa kuErastus Tashiya Petrus (22).

Tashiya okwa holoka nale momhangulilo yaMangestalata mOshakati omo a anyenwa eli futile mo.
Ouyelele wali wa yandjwa kuDeputy Commissioner Nico Steenkamp oo e li ponhele yakakukutu komatanga opolifi mOshana otau ti, Petrus okwa vaka otuwa yomupambele waye umwe momukunda Afoti mUukwambi moshitukulwa shaMusati nokushinga a yuka kOngwediva.

Ovapambele vaye ova lopota oshiningwanima eshi, nopolifi oya kendabala ngeno oku mu fikameka manga ali ta ende lwopoMycanos mOngwediva. Ashike nande opolifi ya kendabala i mu fikameke Petrus vati okwa tula ko odopi nokwa twikila nokushinga. Peinda lomopate pOngwediva, vati okwa hanga po Sergeant Ileka ta konaakona otuwa oyo ya li ya fikama. Ashike ponhele yokufikama Petrus okwa pita pomunghulo, ndele ta pitula po Sergeant Ileka, nokumukokolola oshikako sheemeta donhumba, omanga oshiendifo shaye ina shi fikama.

Omufekelwa ou vati mehauto okwa nhuka mo nokufaduka po, ashike ovapoifi ove shi pondola okumukwata. Mokudimbuluka nakufya Ileka, Inspector Nashandi oo eli omukulunhu wosasiona yopolifi yaNgwediva okwa hokolola omupolifi ou a ninga oshilyo shopolifi mo2011, ali omumweni, ashike okwali omudiinini moilonga. Ta ti omolwa oudiinini nelihumbato nawa laye, Ileka okwali a pewa ombadi youSergeant Class 2, nomuDesemba odula ya dja ko okwa tulwa keinda lokOshiko oko a kala fiyo osheshi a xulifa. “Oshinima eshi oshe tu denga unene pomitima onga ovanailonga pamwe naye, unene tuu ovapolifi ovo va li po pefimbo opo eshi oshiningwanima sha ningwa,” Nashandi ta ti. Nashandi okwa indila ehangano loRoad Authority opo li tule po oitutumbo yomopate hano eespeed hump popepi nobloka opo kukeelelwe ovo hava shingi vehe na ko nasha vaha shinge va yuka movapolifi. Eshi osho oshiponga oshitivali sha twaalela omwenyo womupolifi pobloka oyo tuu oyo.

Nakufya Ileka ota pakwa mongula pomukunda wavo pOshilulu mOshitukulwa shaKahao.

LEAVE A REPLY

Please enter your comment!
Please enter your name here