Ka longelwa iihuna kuHe

0
9207

Loide Jason

ONESI- Omulumentu gwomimvo 35 okwa holoka mOmpangu yaMangestrata oshiwike shika shi na sha nehepeko lyokamwanamati komimvo ntano. Iihokolola yaAngala Sheetekela Simon oya undulilwa komasiku 15 Auguste nuumvo. Ina pewa ompito yokwiifutila mo na ota kala mondjedhililo yopolisi sigo esiku ta holoka ishewe mompangu.

Omukonenenwa okwa kwatwa po molwa omahepeko ngoka anuwa a kala nokuningila omunona nguka uule wethimbo .
Mokati komahepeko ngoka Simon taku hokololwa a ningile omwana omwakwatelwa okudhenga, okupanga iikulya, okufika nosho wo okulumata. Omunona nguka ngashingeyi oku li moshipangelo shepangelo shaTsandi ta mono eyakulo lyuunamiti, ta pangwa iilalo yomulilo noyomayego, omanyutu ano ondjala ye okuna oongupa. Omunona nguka okwa kuthwa megumbo lyaandja he kopolisi ndjoka ya tseyithilwa oshinima shika kaakwashigwana pomukunda gwooSimon..

Okwa hokololwa kutya omunona nguka edhina lye li shiwike nawa kuKundana okwa kala ha dhengwa
noshiti kuhe olutu aluhe, na he anuwa okwe mu fika wo noshikuni shomundilo koonyala. Okanona haka taka etitha ohenda anuwa oka lumatwa ku he kombunda na otaku tiwa okena oongupa momutse ko oke ni we komukithi gwondjala.

Kundana pethimbo a thiki moshipangelo shaTsandi okwa adha omunona nguka eli mombete a tegelela okuyakulwa kaapangi. Omunona okwa kala anuwa nokuhepekelwa megumbo lyahe mOmuthitugwondjamba, mEunda mUukolonkadhi okuza ashike sho a li ena omvula yimwe. Shika osha tameke konima sho yina a tauka mo megumbo lyawo nomusamane gwe anuwa molwo omadhengo gaana henda. Sylvia Mateus okwa ti okuza ashike sho okanona ke ka gwanitha omvula yimwe oka kala nokudhengwa ku he unene ngaa ngele nguka a zi kuundingosho. “Tango oha dhenge ndje nokonima sho a mana ye ota dhenge okanona noshiti oshikukutu. Nonando okanona ka ke na shoka ka ninga,” Mateus a ti ngaaka omanga a kengela omahodhi. Okwa ti sho a mono omahepeko gaSimon taga lulu noonkondo okwa thigi po egumbo, a thiga po omusamane noyana yawo yaali eta yi a ka pepelelwe po. Okwa hokolola kutya omusamane gwe okwe mu tilitha kutya ngele okwa shuna ko kegumbo a ka tale ko uunona nena okwi ilongela eso.

Mateus okwa ti oku za mpoka okwa ka konga iilonga yomomagumbo, nokwa kala kokule naSimon opo a hupithe omwenyo gwe. “Uunona wa kala nahe ihe ngame nande ondina ohole nuunona wa ndje kandi na nkene ndike ya talele po oshoka okwa ti ota dhipaga ndje,” osho Mateus hokolola. Mateus okwa ti ye na Simon oya vala aanona yaali okamati nkena oomvula ntano nokakadhona kena oomvula ndatu. Konima yethimbo sho okanona ka kaka tameka okupopya oka hokolola kutya he okwa kala noku ka dhengagula kehe esiku nonando ka ke na shoka ka ninga. Oshikwawo ohaka ningi omasiku inaaka lya sha.

Omupopiliko gwoPolisi moshitopowa shaMusati Shisand Anna Kunga okwa ti oshiningwanima shika okwe shi uva na okanona haka oke li natango moshipangelo shaTsandi taka pangwa.

Okwa koleke kutya okanona haka oka mono iihuna unene yokudhengwa, okufikwa nosho wo okulumatwa kuhe. “Ngame itandi koleke kutya okanona haka oka adhika noongupa momutse ashike oka adhika monkalo yaa shi yopantu, shalongo pwa li oonzo dhomauyelele ndhoka dha yakele ko opolisi ,” Kunga a ti ngaaka.

Okwa koleke wo kutya naku lulumika okanona haka okuli mondholongo mOutapi konima yokuholoka mompangu Omaandaha goshiwike shika
Okanona kokakadhona nako okali ka ka talwa ko koohe oshoka ka kena we omusilishimpwiyu konima sho he a tulwa mondholongo.

LEAVE A REPLY

Please enter your comment!
Please enter your name here