Ondjokonona ya Ya Toivo

0
1465
WINDHOEK, 24 February 2015 - Former Robben Island Political Prisoner and icon of the liberation struggle of Namibia Andimba Toivo ya Toivo delivers a message of condolences on behalf of the living Robben Island Political prisoners during the memorial service of Hitjevi Gerson Veii in Parliament's Gardens. Veii, 6, died in the Katutura Mediate Hospital on the 14th of February 2015. He is to be buried at Heroes Acre on 25 February 2015. (Photo by: Joseph Nekaya) NAMPA

Herman Andimba Toivo ya Toivo ngoka ta pakwa ongula koHeroes Acre nokwa kala ta ningilwa iituthi dhimbuluko moshilongo ashihe nomoSouth Afrika, oye ependafule, nokuli gumwe gwomaatameki yekondjelomanguluko lyaAfrika Namibia naSouth Afrika, nomolwaasho onkalamwenyo ye niilonga mbyoka a longa tayi simanekwa kuuyuni auhe.

Ashike Ya Toivo oye lye ano? Evalo nokuputuka kwe
Andimba Toivo ya Toivo okwa valwa mo 22 Auguste 1924, a valelwa momukunda Omangundu moshikandjohogololo Onyaanya moshitopolwa Oshikoto . Okwa tameke oskola pomukunda gwawo pOmangundu mpoka, yali haya longwa kuhe Toivo yUushona, haya longelwa kohi yomuti.
Omanga ali methimbo lyuunona, aakuluntu ye oya tembukile kOnayena, ko oko aka hita lela osikola yaanona.
Pokati ko 1939 no 1942, Andimba okwi ilongele iilonga yokuhonga iipilangi, eithano eli ilongele kosikola yuungomba ndjoka yali mOngwediva onkulu.

Pethimbo opo tuu mpoka lyo 1942 Ya Toivo okwa kutwa miita yuuyuni iitiyali (Iita yaHitila ngaashi yali ishiwike), ali ta kondjo a gama kombinga yaaIngilisa, moka ali a yelwa a pewa ombandi yuu Corporal.
Konima sho iita ya hulu, okwa ka longa kofaalama yili popepi noKalkfeld, ashike hoka nako okwa ka za ko e ta ka tsikila osikola koSt. Mary Mission School kOdibo, hoka eki ilonga Oshiingilisa.

Okuya kosikola koSt. Mary okwa thiminike Andimba opo a ze kongerka yaElcin nokuninga oshilyo shongerki yaAnglikana, oshoka osikola yaSt. Mary oyali osikola yoNgerki yaAnglikana.

KoSt. Mary okwiilongo sigo omOstanda 6, eta tsikila ko ishewe nokupita uulongi mo1950. Ya Toivo okwa patulula ostola ye pOndjondjo, manga ta longo wo osikola koSt. Cuthberth ndjoka paife hayi ithanwa Onamutai, nopoSt. Mary mpoka a sikolele. Mbika okwe yi ningi omanga inaa ka tsikila neilongo lye koSouth Africa momvula yo1951.
Ya Toivo nopolitika

Sho a yi koCape Town mo1951, Ya Toivo okwa ka ninga wo omuniilonga, ta longo kolutenda hoka a longo pokati ko1952 no 1953. Pethimbo tuu ndyoka okwa ningi oshilyo nomunashipundi gwopevi gwongundu yopolitika yedhina Modern Youth Society (MYS), ndjoka iilyo yayo yali aanasikola miiputudhilo yopombanda moSouth Africa, niilyo yomahangano gaaniilonga. Mo 1957 okwa ningi oshilyo sho African National Congress (ANC) a joinina mo Cape Town. Konima okwa ka ninga gumwe gomaatoti po yongundu yedhina Ovambo People Organisation, ndjoka oyo yaka vala ongundu tayi pangele yoSwapo.

Manga ta lele OPO, Ya Toivo okwa eta po ekwatathano ewanawa pokati ko mahangano gopapolitika gomoSouth Africa noOPO.
OPO oya zi kehangano lyaaniilonga yomoSouth Africa lyedhina South West Africa Native Labour Association (SWANLA).
Ehangano olya kala lili ompinge nokukatela Namibia kumwe naSouth Africa noku shi ninga oshilongo shimwe. Naashika oya kala taye shi ningi melongelo kumwe naanapolitika aaSouth Africa mboka ya kala ye li ompinge nepangelo lyokatongotongo.
MuDeseba 1958, Mburumba Kerina naMicheal Scott oya kwathele Ya Toivo opo a shange omushangwa gwe gwotangotango egu shangele koombonge dhIigwana hangano (United Nation).

Onkatu ndjoka ya katukwa kuYa Toivo oye mu etele opo a tidhwe ko koCape Town, ta thindikilwa sigo omo Keetmashop, sigo okonooli hoka kwali haku ithanwa Owamboland nokwa ka kala a ningwa onkwatwa a edhililwa megumbo.
Manga eli a edhililwa, Ya Toivo okwa panga uukume nomubishofi Leonard Auala gwaELOC (Evangelical Lutheran Ovambo-Kavango Church), ngoka a taandelitha opolitika mongerki nomomagongalo.

Mesiku 19 Apiilili 1960, ndyoka lyali esiku lyedhimbuluko-valo lyoOPO, okwa tokolwa opo OPO a lundululwe a ninge South West Africa People Organisation (SWAPO) sha ningilwa moNew York sha America. Ya Toivo okwali a hogololwa oye Secretary General gwongundu.

Okwali kwiikundwa opo ku totwe ongundu yopaukwiita yaSwapo ndjoka yali ya lukwa South West Africa Liberation Army (SWALA), ndjoka ya totwa mo1962, nomo26 ya Aguste 1966, ongundu ndjoka oya topitha ondjembo yayo yotango mOmugulu gOmbashe moNamibia, yeshi ningi kohi yewiliko lyaYa Toivo naawiliki ooyakwao.

Ya Toivo mondholongo noompangu
Omolwa ekuthombinga lye mopolitika ndjoka yali tayi kondjitha epangelo lyokatongotongo, Andimba okwali a mangwa po mo 1966.
Oyali ya patululilwa oshipotha shuukulo pamwe nooyakwao yalwe yeli 36, ye okwali omutamanekwa omuti 21. Yamwe yomwaamboka ya tamanekwa nayo oyo oo Eliaser Tuhadeleni a li a tseyika nedhina Kaxumba Kandola, Nathaniel Maxwilili na Ephraim Kapolo, ngoka asi pethimbo lyoompangu dhomoPretoria.

Pethimbo lyoompangu Ya Toivo okwa popi oshipopiwa shoka sha tonatitha uuyuni noshali sha nyanyangidhwa miikundaneki yomuuyuni.
“Tse AaNamibia, katu shi AaSouth Africa. Inatu taamba ko, nokatuna esiku tu mu taambe ko onga aaleli yetu, motutotele ooveta moka kaatuna ewi, mu longithe oshilongo shetu onga oshilikolomwa sheni tse tukale nane onga one ooyene yetu. Otwa kala aluhe twa tala ko South Afrika onga omuhindadhi moshilongo shetu, Shino osho twa kala tu uvite, na unene paife sho twa taalela epangulo,” Ya Toivo osho a tile ngawo mo 1967. Okwa kala mondholongo yiikalekelwa nomuJanuali 1968 okwa pewa egeelo lyoomvula 20 mondholongo, nokwa tuminwa kondholongo i li kontuntu ya Robben mefuta lyAtlanda oshishona oku za moCape Town, moka a kala unene iikalekelwa kokule noonkwatwa oonkwawo.

Sho a kala mondholongo ina kala nando ta ulike iipa ombedhi molwaashoka a longa nokwa kala a talika ko onga omunadholongo ena onyati ihiitsikwa owala ngawo.

Shimwe shomwaambyoka yili momishangwa ya ningwa kuYa Toivo omanga eli mondjedhililo osho a dhenge omukeleli gwondholongo gwoshilumbu nenkawa ndele okambale ke taka gu ko.

Mu Maalitsa 1984 konima yomivo 16 ya Toivo okwa mangulwa mo mondjedhililo, ashike shi a zi mo kala eshi pandula sho a mangululwa ye ta thigi ookuume ke yamwe yopapolitika mondholongo.

Sho a yi koNamibia, okwa kala owala moWindhoek okathimbo okashona, nokwa taaguluka eta ka adha aakondjelimanguluko ooyakwao koLusaka shaZambia. Hoka okwa thikile owala ta hogololwa nokwa ningi Secretary General goSwapo noshilyo shokangundumutima kongundu momvula tuu ndjoka yo1984. Konima Namibia lya manguluka mo1991, Ya Toivo okwa tsikile nokukala Secretary General gwoSwapo, omanga hailwa ye Sam Nujoma a ningi Omupresident gwotango gwoshilongo. Mepangelo okwa kala mo onga ominista yoomina niikwankondo, ta ningi ishewe ominista yaaniilonga mo1999, ominista yoondholongo mo2002 sigo omo 2006.

Mo 2004 okwa tokola opo kaathikame we mopolitika ta ti okwa longa sha gwana. Ashike mo2012 okwa hogololwa opo a kale oshilyo tashi kalele shokangundumutima koSwapo.

LEAVE A REPLY

Please enter your comment!
Please enter your name here