Oshimpako sha mpakukile omuhangi kompangu yaNdangwa

0
1635

Maria Namupala

ONDANGWA –Aaniilonga yane (4) mompangu ya mangestrata gwa Ondangwa oyi iyadha konima yekumba Etitano lya yi, sho kwa lopotwa taya longo nuulingilingi osho wo nuukengeleledhi.

Aanambelewa mbaka yoondondo dha yooloka oya mangwa po konima sho opolisi ya nothelwako kutya otaya longo nuulingilingi anuwa. Aafekelwa mbaka oyo Martha Nakakuwa gomimvo 32, Squzous John gomimvo 58, Petrus Kalenga gomimvo 46 na Simeon Johannes Adolf gomimvo inaadhi tseyika.

Otaku hokololwa ya kala taya longitha oombelewa dhepangelo muuwanawa wawo yoyene, osho wo taya longo nuulingilingi nokuya pombambo oveta noompango dhoshilongo, mokukaleka po omaliko gepangelo ga vule okulongithwa woo ku yalwe.

Ayehe yatatu oya holoka mompangu ya mangestrata gwOndangwa Omaandaha, komeho ga AK Simpton na Leonard Tjiveze. Otaya pangulilwa iipotha iitatu mbyono ya kwatela mo uufuthi, okulunga itapula, ekengelelo nokulongitha wo omaliko nenge oombelewa muuwanawa wa wo yoyene.

Aaniilonga mbaka oya tulwa pevi manga, naasho ya holoka mompangu lwotango inaya pulwa ya tye sha, otaya kala mondjedhililo noshipotha shawo oshu undulilwa komasiku ga 7 Aguste nuumvo, shi gandje ompito kopolisi yi manithe omakonakono, osho wo oombangi dhepangelo mwashika dhi kale dha pulapulwa.

Tjiveze okwa ti molwaashoka oshipotha oshi li petameko lela, aafekelwa itaya vulu ya pewe ompito yokwiifutila mo molwaashoka otashi vulika ya ka ye moshipala omakonakono gopolisi, yo yaka ninge woo omakwatathano noombangi onkene otaya kala ya dhigininwa manga sigo esiku ndyoka ya pewa ya ka holoke olutiyali.

Aafekelwa yamwe oya ti otaye kiipopila yoyene, omanga yamwe taya kongo aapopiliko yopaveta yopaumwene. Tjiveze okwa yelitha kutya sigo oompaka opolisi inayi manitha omakonakono nokwati uuna taya ka holoka uuyelele awuhe otawu kala wuli poshitaafula, mono wo mwa kwatelwa naamboka taya gandja uumbangi wopapangelo.

Okwa tegelelwa wo nehangano lyokukondjitha uulingilingi moshilongo (ACC) li kale lya ya mo olunyala, molwaashoka aafekelwa oya kala taya longo nokwiitapula ethimbo alihe, nonande epangelo tali kondjitha aluhe okulonga nokwiitapula nokwiidhengela ondhi peho ku hule po.

LEAVE A REPLY

Please enter your comment!
Please enter your name here