Ta pewa kapinya komukadhi

0
5707

LOIDE JASON

OSHIVANDA SHA NGHATANGA- “Ite ku lombwele iinima ayihe ha ningilwa oshoka okwa tila okupewa Kapinya kumukwao. Ngele okwe ku lombwele iinima ayihe omukadhi sho te ya okuna okudhengwa.

Ndhoka odho oohapu dhomushiinda ngoka a yi naKundana kegumbo lyomusamane, omukalimo gwomomukunda Oshivanda shaNghatanga ngoka anuwa tali ta pi komukadhi.

Mateus Amunyela anuwa oye gumwe gomaalumentu mboka yeli moonkalo itaadhi nuwa omeya molwa omahepekathano gomomagumbo taye ga ningilwa kaakiintu yawo.

Omulumentu nguka anuwa okwa dhengwa sigo nokuli a lemana na ngashingeyi okwa ninga omuposi, ye ishewe okwa ninga wo oshingolomena kolutu oshoka iha vulu we okumatuka ngaashi a li he shi ningi nale. Iikulumuna niilwadhi kolutu lwe, otayi holola kutya omukulupe nguka okuli moshiponga shokudhengwa nokumonithwa iihuna. Nokuli anuwa sho a yile koshipangelo omasiku ga ziko, ndohotola okwe mu lombwele kutya okuniwe komanyutu, ano ta ehama ondjala.

Otaku hokololwa Mateus ha ningilwa omahepeko unene tuu uuna omukadhi a gooloka kuundingosho. Kundana sho a thiki mooMateus lwopotundi ontine yokomatango okwa adha Mateus a ka lala nale, ye a tya eho lya zindika oshipala.

Ihe sho a pulwa okwa tindi oku zimina kutya eho lye olya dhengwa komukulukadhi nonande mwene gwomukunda okwa koleka kutya eho ndyoka lyokolumoho olya dhengwa komukadhi.

Nando Mateus okwa zimina kutya oha piyaganekwa komukadhi ngele a zi kuundingosho, okwa tindi okukoleka ngele oha dhengwa kehe esiku.
“Omukulukadhi gwandje otwa kala naye ethimbo ele shili ihe okuza ngaa momumvo 1992 okwa tameke ha dhenge ndje a li a monithandje oshiponga etandi kanitha ombinzi oyindji,” a ti ngaaka. Mateus okwa ti otashi kala oshipu ngele omukulukadhi ngoka okwa kumagidhwa kutya aasamane ihaya dhengwa.

“Omukulukadhi gwandje omwiinayi ashike ngele okwa nwa, ihe ngele ina nwa omukiintu gwandje omwanawa,” osho a popi ngaaka ne wi tali etitha ohenda.

Aatekulu yomusamane mboka ya popi naKundana oya ti hekulu okwa kala nokuhepekwa komukulukadhi gwe okuza ashike momumvo 1992. “Nale tatekulu sho a li ena omagulu ge na oonkondo okwali ha fadhuka po, ihe ngashingeyi okwa dhengwa nokwa lemana ita vulu we okutondoka,” gumwe gwomaatekulu osho a ti ngaaka. Ihe mwene gwomukunda gwedhina Simon Amunyela ngoka eli wo omumwaina gwaMateus okwa ti iha pu piti esiku Mateus inaa dhengwa komukadhi.

“Kapuna esiku lya pita po Mateus inaa dhengwa! Kehe ashike esiku konyala mwameme otamu uvu ta kugu ta dhengwa,” osho mwene gwomukunda a ti ngaaka.

Okwa ti kayena ombelewa inaa ya enda okulopota omahepeko ngaka, oshoka otashi yemateke noonkondo okumona omulumentu aniwa ta dhengwa. “Oshili ngaye ngashingeyi ihandi kotha we oshoka shampa wa mono omulumentu ta lili ta dhengwa komukiintu nena otashi ehameke noonkondo,” Simon a ti ngaaka. Okwa ti kutya opolisi nayo oya tseyithilwa iiningwanima ayihe mbyoka ya ningilwa omulumentu nguka. Mwene gwomukunda nguka okwa ti omukiintu nguka okwa hokanwa sho omukulukadhi gwa Mateus ngoka a li a hokana kongeleka a hulitha, ihe okuza ashike omumvo ngoka Mateus okwa tameke okudhengwa unene tuu nomupini.

Omukadhi ngoka a zile koAngola aniwa ngashingeyi iha longitha we omupini nokuli, oha longitha owala epokolo okudhenga nalyo omuhungu oshoka aniwa ngashingeyi kena we oonkondo dhokufadhuka po.

Ashike aniwa moomvula dha za ko unene momumvo 2007 okwa li ha longitha omupini shoka sha etitha nokuli opo Mateus a ye moshipangelo mOshakati.

Kundana ina adha mo omukadhi megumbo ishewe ye aniwa kena ongodhi, oya kana.
Ihe mwene gwomukunda okwa ti omukiintu gwaMateus nguka okwa lulila nokukenyeneka aantu pomukunda ngoka oshoka oha tuku naantu puundingosho.

LEAVE A REPLY

Please enter your comment!
Please enter your name here