Uulalelo woohima nomafuma molwa onyalo

0
1305

LOIDE JASON

OKATHITUKONGHAYI-Mwene gwomukunda Okathitukonghayi moshikandjohogololo shaKalongo, moshitopolwa shaMusati, okwa ti okwa luliwa noonkondo sho yamwe yomomukunda gwe ya ninga oohima dhandondi nomafuma iikulya yawo ya kehe esiku sho inaa ya hala oku longa omapya gawo.

Patrick Munyala okwa ti omuna aanamagumbo yamwe momukunda gwe yi ininga ashike yi ikolelela moshikukuta okumona uusila yo taya ende taya shoko mpoka puna uututo opo ya fule mo omafuma gopokwenye nosho wo oohima ndhoka dhi li piiyale popepi niilambo yomeya.
“Shoka tashi ku kumitha ooshoka kutya naasamane yamwe ngashingeyi anuwa oya nwethwa mo kaakulukadhi opo ya ka konge oohima ya vule yalye oshoka ka puna shoka tashi elelwa,” Munyala a ti ngaaka. Okwa tothamo egumbo limwe ndyoka li na omusamane, omukulukadhi nosho wo aanona ya hamano ihe megumbo ndyoka uule woomvula mbali dha piti epya ina li longwa nando osha.

“ Aantu mbaka aakumithi sho nuumvo aantu oyendji oya longa nawa molwomuloka ngoka omuwanawa ihe egumbo ndika ina li longwa nande osha. Shika otashi sitha ohoni sho otashi gandja edhina ewinayi komukunda gwetu,” mwene gwomukunda a popi ngaaka.
Okwa kumagidha aantu momukunda gwe ya longe nuudhiginini unene ngele ya mono omvula yili nawa oshoka okwiikwatelela miikulya yepangelo ka shi li nawa sho epangelo ngashingeyi kaa li na iimaliwa ya nawa ngaashi shito.

“Ongaashi ngaa tu uvite miikundaneki kutya eliko kali li nawa ihe aantu natango otaya dhanitha omuloka omuwanawa, shika ka shi li nawa,” osho mwene gwomukunda a ti ngaaka.

Nonando omagumbo mwene gwomukunda okwe ga tumbula komadhina, okwa ti oshi li tashi lengitha unene sho omusamane nomukulukadhi ya lambathana moshana taya kongo oohima.

Omapyopyo ngaka ogali woo ga kolekwa kwaamboka yali ya ende pamwe na mwene gwomukunda taya ti oshi li tashi sitha ohoni noonkondo .
“ Sho yamwe yeli momapya yo yakwetu oya tsa ondinda yu uka koshana, osho gumwe ngoka a li na mwene gwomukunda a yi mo ngaaka.
Omupyopyo inagu kolekwa nawa otagu ti mbaka wo omasiku ngaka otaya fekelwa eyako lyiilya poshipale sha mushiinda.

Ihe nando ndhika mwene gwomukunda okwedhi koleke, okwa ti inashi yela naanaa nawa kutya oyo lela ya yaka oshoka oompadhi ashike dha monika ihe ka pu na ngoka a kwatwa sigo oompaka.

LEAVE A REPLY

Please enter your comment!
Please enter your name here