Oshana sha pulwa shi thaneke omahala omawana noku tungwa oshipangelo oshinene

0
330

Desie Heita

Windhoek-Ewiliko lyoshitopolwa Oshana olya pulwa opo li ulike omahala gaali mOngwediva nenge mOndangwa ngoka aathaneki yomatungo yUuministeli Wuundjolowele taya vulu okukonakona nokutala kutya ngaka ogo opala opo pu tungwe oshipangelo oshinene.

Ewiliko lyOndangwa na lyo olya pewa ompito opo li kwatelemo methaneko ndika ehala ndyoka lyali lya nuninwa okutungwa oshipangelo shopadistrika mondoolopa ndjika. Minista Guundjolowele omundohotola Bernard Haufiku okwa ti ehala ndika ngele aasindi yomatungo oye li mono lili nawa nena oshipangelo shoka oshinene otashi vulu okutungwa mpoka.

Moonkundathana noshikundaneki New Era osho ashike, Minista okwe shi popi shu ukilila kutya uuminsteli we ina wu gama ombinga kondoolopa yimwe nenge onkwawo ngele ota shi ya pehala lyoku tunga oshipangelo shika, ngaashi iikundaneki ya kundaneke omasiku ga zi ko.

Okwa ulike kutya opwa li oompangela nale opo mOndangwa mu tungwe oshipangelo shomuthika gwopa distrika okuya pomumvo 2018. Ethaneko ndika ola li nale lya gandjwa ongo sohitopolwa shiilonga yuuministeli mbuka okufala omayakulo koshigwana.

Omundohotola Haufiku okwa ti ewiliko lyaOshana oli na ethimbo sigo Etitano ndika opo ya gandje iiyetwapo yawo yehala mpoka yo ye wete lyopalela okutungwa oshipangelo shoka.

“Otwa zimine kutya oshi li nawa, otatu thigi shika miikaha yeni, opo mu tu lombwele kutya ehala lini mwa hogolola opo pulyo pu tungwe oshipangelo shika, ne ta mu gandja omathaneko kutya shika nashi tungwe pehala ndyoka.”

“Ngame onda lombwele wo ewiliko lyOndangwa kutya oya manguluka okukwatela mo ehala ndyoka ya li ya gandja nale ando opo pu tungwe oshipangelo shopadistrika, opo a asindi yomatungo nenge aathaneki yomatungo ya konakone n oku mona kutya ehala lini lyo opala okutungwa oshipangelo,” osho a ti.

LEAVE A REPLY

Please enter your comment!
Please enter your name here