Nakudhipaga mumwayinakadhona a tindilwa i ifutile mo

0
2337

MARIA NAMUPALA

ONDANGWA – Omulumentu gomimvo 29, ngoka a mangelwe po omasiku ngaka mekwatathano neso lyomumwayinakadhona oku li natango mndholongo yopolisi mOndangwa.

Omutamanekwa gwomOnepute popepi nOniipa, Tobias Ipunya okwa mangwa sho taku hokololwa anuwa a tsu mumwayina Aina Kristof Ipunya gomimvo 34 pamupya sigo ota si. Sho a holoka mompangu ya mangestrata gwaNdangwa oshikando shotango ina pulwa a tye sha.
Okwa holoka komeho ga mangestrata Peter Nangula a tamanekelwa iipotha iyali, oshipotha shomahepeko gomomagumbo, osho wo oshipotha shedhipago. Otaku hokololwa aamwayina mbaka ya li puundunda pOmahenene, nopokati ka nakusa nomukiintu gulwe opwa holoka oohapu oombwiinayi.

Ipunya ngoka okwa kutha oshinima shaashiwike nokutsa mumwayina lwiikando oyindji pamupya. Mumwayina okwali a falwa koshipangelo hoka a ka hulithila. Opolisi oya ka manga po omutamanekwa konima yoku ninga omakonakono moshinima sheso ndika. Otaku hokololwa pokati ka mumwayinakadhona nomukiintu gumwe pwa holoka ehilathano puundunda pOmahenene ndyoka lya shituka olugodhi, mono Ipunya a tsu mumwayina pamupya nokweehameka wo nayi Petrus Johannes Ndeapo.

Sho a holoka mompangu ina pulwa a tye sha, ashike okwa fatululilwa nokutseyithilwa uuthemba we. Okwa lombwelwa kutya ota vulu a tulemo eindilo lye lyobooloha, nota vulu woo okutulamo eindilo lyomupopiliko gopaveta uuna e wete shoopala kuye.

Ina pewa ompito yokwiifutilamo, nota kala mondjedhililo. Oshipotha she oshuundulilwa komasiku 15 Aguste nuumvo. Molwaashoka sho a holoka mompangu okwali a mangwa omalapi goshipangelo momutse mangestrata okwali emu pula kutya okwa ningwa koshike no kwa ti okwa dhengwa puundunda esiku lyolugodhi nokwali a taambelwa moshipangelo, moka omo a kwatelwa kopolisi yoshilongo. Puuyelele mboka twa mono po ota ku ti omufekelwa oha hepeke aantu megumbo osho wo puundunda, ashike ina kala ha lopotwa uuna a longa iilonga mbyoka, naashika osheeta woo a kale a dhigininwa nokuli miikaha yopolisi.

LEAVE A REPLY

Please enter your comment!
Please enter your name here