NDP5 oya tegamena oku indjipaleka iituminwa pondje ya longwa miikwamina okuthika pomumvo 2022

0
24

Oshitopolwa oshititatu meyokomeho lyomahupilo

Komutoolinkundana

Eyokomeho lyomahupilo

Omathaneko omatitano gependulopo [NDP5] ngoka ga tulwa miilonga omasiku ga zi ko, kOmuperesidente Hage Geingob oge na elalakano lyoku adha ondjodhi yaNamibia yokukala oshilongo shoofabulika okuya momumvo 2030. NDP5 oyo oplana ontitatu yomooplana dhomimvo ntano kehe ndjoka yi li oshitopolwa shondjila oku adha ondjodhi yaNamibia yomomumvo 2030. Ndjika oya tameke iilonga momumvo gwiimaliwa 2017/2018 na otayi kala miilonga sigo omumvo 2021/2022.

Oplan ndjika oya ngongwa po ya kankamekwa koongudhi ne dha kwatathana dho odha thikama komanenedhiladhilo geyokomeho tali ende nawa. Ngaka ogo eyokomeho momahupilo, elunduluko monkalathano, okukaleka omudhingoloko gu li nawa osho wo ewiliko lili nawa.
Oongudhi ndhika otadhi longele pamwe neitulemo lyaNamibia okuhulitha po oluhepo nokwaathike pamwe ngaashi shu ulikwa mOndjodhi yo2030, moPlan yuuwanawa wa ayehe yoHarambee 2016, nomoManifesto yongundu yoSwapo yomumvo 2014.

Oshikwawo oongudhi ndhika otadhi yambidhidha omathaneko gependulopo gomuuyuni ngoka Namibia a zimina okuyambidhidha. Ngaka oga kwatela mo iinyangadhalwa yomo 2030, yi na sha nOmapendulopo taga tsikile nawa, Euvathano lya Paris [COP 21] li na sha nonkalo yombepo, omalalakano gaAfrican Union gedhina Agenda 2063,nOplana yeyambukepo moshitopolwa shoSADC.

Okushitalela mu ayihe mbika Namibia okwa ti okwa tokola okutsikila nokuhwepopeka ekoko lyomahupilo osho wo oku ga mbwalangandjeka. Shika otashi endele pamwe noku opaleka onkalo yi li pombanda unene yomautho gopapangelo osho wo omuthika guunongo ngoka itaagu ziminathana pamwe naaniilonga mboka ya pumbiwa momahupilo.

Omathaneko ngaka oga tothamo iinima itano mbyoka tayi ke eta elunduluko okukutha Namibia moshitopolwa shomahupilo gi ikwatelela kiilongwa mo yopetameko noku ga lundululila komahupilo ngoka taga eta po oshindji. Iilundululi itano mbika oyo: omapungulo miiyalo[oondjila, omatungo, oompungulilo dhomeya, iikwamalusheno, iikwangodhi nosho tuu] , enenepeko lyokulonga noku eta po oshindji moshikondo shuunamapya, unene tuu iilonga yaanafaalama mboka aashona, okuyambula po uunongo wopaungomba, okuhwepopeka omikalo dhokungushupaleka oonzo dhopaushitwe dhoshilongo osho wo oku adha eyokomeho miikwafabulika tashi pitile moku landa iinima mbyoka ya longwa/ndulukwa moshilongo.

Eyo komeho momahupilo
Elunduluko momutungilo tashi pitile mokutunga po oofabilika dhoku tula ongushu kiilongomwa.

Iikwamina oya thikama peni
Oonzo dhiikwamina moNamibia odho onzo onene yoku eta aapunguli okuza pondje yoshilongo.Oonzo ndhika odha kwatela mo okawe, ongopolo, ouraana, oholo,iikwapeleki, omamanya goshingoli osho wo omamanya guuyamba. Oku za sho omina yoSwakop Uranium Husab ya tameke iilonga oshilongo oshi li pondondo ontiyali muunene moku longa nokumina ouraana muuyuni auhe. Oshitopolwa shoomina ohashi etamo konyala ooperesenda 12 miilongomwa ayihe hayi longwa nokundulukwa momahupilo gaNamibia. Iikwamina ohayi gandja wo iilonga miitopolwa yakwatathana momahupilo goshilongo. Iiholelwa yankene omakwatathano gopamahupilo taga humithwa komeho kiikwamina ongaashi omayakulo giiyendito, omayakulo giikwankondo,omayakulo gomeya, omayakulo guunongo nontseyo, omayakulo gomapekaapeko neyokomeho,omayakulo gopamalongekidho omayakulo gopamakwatathano nosho wo ngoka gopashimaliwa.

Iilonga yimwe mbyoka ye etwa po omolwekalepo lyoomina oombyoka ya kwatela mo egandjo lyiipumbiwa koomina osho wo omayakulo miilonga yokumina.Oshikondo shoomina sigo oompaka ihashi gwedha ko unene ongushu kiikwamina kakele owala kokumina oonzo ndhoka noku dhi tumina pondje inaa dhi ngushupalekwa.

Oonzo ndhoka hadhi gwedhelwa ongushu kashona ongaashi okawe hoka ha ka hongwa noku pushwa muka.Shika ohashi ningwa wo nomamanya gamwe guuyamba.Yilwe yomiikwamina mbyoka hayi tulwa wo ongushu kashona kowala ongaashi, okuhengumuna ongopolo,okulonga ozinka yongushu yili pombanda, oshilongo ohashi longo wo omongwa ogundji gwaanguka ohagu zi momeya gomefuta.

Iizemo yiikwamina
Okuya pomumvo 2022 Namibia okwa tegelelwa a kale noshikondo shoomina shina oshitopolwa shokungushupaleka iilongomwa mbika shi na ongushu ya mbalipalekwa okuyeleka niikwamina ya ngushupalekwa mbyoka yali ya tuminwa pondje omumvo 2015.

Omashongo ga taalela oshikondo shika

Omahupilo sigo oompaka ita ge shi pitika kombinga yiiyemo opo andola pu vule okuthikamithwa oofabulika dhokuhambula iinima ya longwa miikwamina yoshilongo opo andola mbika yi etele Namibia uuwanawa. Opo shika shi vule oku ningwa ope na ompito opo Namibia eetemo iikwamina okuza kiilongo yilwe opo mbika yi kale tayi longwa noku ndulukwa iinima iipe mbyoka tayi vulu okulandithwa meni nosho wo pondje yoshilongo. Ekalopo lyomeya oshowo olusheno itaalu piyaganekwa oyo yimwe yomiipumbiwa mbyoka tayi eta nokuhilila aapunguli koNamibia ye ye ya pungule mokudhika po oofabilika dhokunduluka iinima okuza miikwamina ya Namibia. Eshongo ekwawo oondyoka li na noondando inaadhi gundjila dhiikwamina, ndhika tadhi ningitha oshikondo shika shi kale itaashi ineekelwa naa naa nawa ongo oshi etimo shiimaliwa moshilongo.

Omatalelopo oga thikama peni?
Namibia oshilongo shimwe shomwaambyoka yi li pombanda ngele tashi ya koshikondo shuutaleli po. Osho wo ishewe ehala ewanawa li holike kaataleli po molwashoka olina omahala ga andjuka, oomikunda nomutungilo gwoopala, li na iikwakuti yomaludhi ga yooloka yo oyindji, li na oondjila niiyalo yimwe iiwanawa, oshilongo wo shu udha ombili, shi na egameno nengungumano, oshi na wo oshigwana oshishona momwaalu. Namibia oku na wo edhina mokukala ehala ewanawa hoka aatalelipo ya hala okuya okutalela po kombinga yetalelopo lya kwatathana negameno lyuushitwe. Uutaleli po owo ishewe oshitopolwa oshinene moku eta iimaliwa yo pondje moshilongo, omapungulo, iiyemo mondjato yepangelo, egandjo neetepo lyiilonga, ehumokomeho lyokomikunda, eshonopeko lyoluhepo nekoko lyomahupilo gaNamibia.

Uupashioni otawu kwatha wo sho mbuka wu na ekwathano niikondo yilwe melyenge lyoku gandja omayakulo.Omolwa uupashioni oohotela nomahala gokulila oga koko nomwwalu gopokati gwooperesenda hamano oshinkwanu hamano pethimbo oplana yomatahneko omatine geyokomeho ga Namibia ga li miilonga. Oshikondo osha li sha gwedha komahupilo goshilongo ashihe noperesenda yimwe oshinkwanu hetatu. Ota ku tengenekwa wo kutya uule womimvo ntano dhomathaneko omatine nenge NDP4, iimaliwa mbyoka ya longwa oku za pondje yoshilongo oya li ya tengenekwa yi li poodola oobiliona ne oshinkwanu hamano.

Oshike sha tegelelwa oku etwa po kuutaleli po monakuyiwa
Okuya pomumvo 2022 , Namibia okwa tegelela okukala ena oshikondo shuutalelipo shambwalangandja kokutya uutalelipo wa kwata omahala ogendji niitopolwa ayihe ya Namibia.Ishewe oshikondo shika okwa tegelelwa shi ete mo aataleli po ye li lwopomilliona yimwe oshinkwanu hetatu okuya pomumvo 2022 okuyeleka naataleli po yomwaalu gwaantu omilliona yimwe oshinkwanu ne mboka ya li ya talele po Namibia momumvo 2015.

Omashongo ga taalela uutaleli po
Namibia okwi inekela ashike unene momahala omulongo ge ngoka ogo haga talelwa po unene onkene osha pumbiwa opo a nenepeke omahala galwe gokutalelwa po. Shika okwa pumbwa oku shi ninga opo oshitopolwa shuutaleli pos hi kale aluhe tashi yi nawa komeho monakuyiwa.Nando, Namibia okuna oondjila niiyalo yomayakulo yilwe yili nawa, oondjila nomayakulo ga nkundipala miitopolwa yimwe otaga ngambeke ekoko lyuutalelipo komahala ngoka.

Omapekapeko noku eta po iinima iipe oge pomuthika gu ni sigo oompaka.

Namibia okwa adha oshindji kombinga yomapekapeko noku eta po iinima iipe okuza tuu sho oshilongo sha manguluka 1990. Omwaalu gwiimaliwa mbyoka ya longithwa mokuhumitha komeho omapekapeko ongo shitopolwa shiilongomwa yaNamibia ayihe ogwa yi pombanda sigo opooperesedna oshinkwanu nola ndatu ntano momumvo 2016 okuza pooperesenda nola oshinkwanu nola mbali mpoka ga li ga thikama petameko lyomimvo dhomilongo 1990. Oonzo dhopantu moshitopolwa shika nadho odha indjipala noku nenepala sigo ongashingeti shod ha thikama maantu 750 taya longo ethimbo alihe moshimpungu shika. Omwaalu gwaantu konyala 350 yomwaambaka aapekapeki oku udha taya longo iilonga mbika esiku kehe. Oshilongo osha indjipaleka wo omandhiliko niilimbo yiilongomwa yasho mbyoka ye etwa po kaakali mo noku shangithwa kuyo okuza tuu petameko lyomumvo 2000.

Shoka sha tegelelwa oku etwa po monakuyiwa
Okuya pomumvo 2022, iimaliwa mbyoka tayi longithwa momapekapeko nomeyokomeho otayi ka kala ya adha poperesenda yimwe yiilongomwa yomoshilongo okuza pooperesenda nola oshinkwanu ndatu ntano omumvo 2015.
Omashongo ga taalela omapekapeko

Iiyimbi mbyoka yi li mondjila yiilonga yomapekapeko noku eta po iinima iipe oya kwatela mo uunkundi miinakugwanithwa unene yoku eta po iinima iipe, nenge oku ulika kutya iinima iipe ingapi ye etwa po sigo oompaka, oshikwawo ompumbwe yoshimaliwa okufutila omapekapeko nosho wo ompumbwe yiilongitho nomahala goku ningila omapekapeko.Ope na wo elongelo kumwe eshona pokati kiiputudhilo yopombanda yomoshilongo osho wo pokati kaambika nomahangano goongshefa moshilongo.

LEAVE A REPLY

Please enter your comment!
Please enter your name here