Omauwa mehangano loMVA Fund

0
109

Komutoolinghundana

ONGWEDIVA- MVA Fund ehangano lokuyandja omayakulo kovamoni voiponga yomatuwa, ola tula po omayakulo mahapu inaa shiivika kovayakulwa. Efatululo eli olayandjwa komunambelewa koshipopiwa shomapukulo mehangano loMVA Fund Victoria Amutenya.

Amutenya okwa ti, kakele keyandjo loshimaliwa shepako N$ 7000.00 kwaavo va xulifila moiponga yomatuwa ooluxupe moiponga okudja Deseba 2007 ovo inava tula mo omaindilo ekwafo loshimaliwa otava dulu ku shi ninga.

MVA Fund oha yambidida pashimaliwa ovana vanakufila moshiponga ve li koshi yeedula 21, omufiyekadi ngeenge e li koshi yeedula 60. Amutenya ta weda po kutya, nakufila moshiponga ngeenge oye aeke a li ha kwafa ovadali nope na oumbangi u shii kulineekelwa otava dulu kutula mo eindilo. Oushili waashi otau kolekwa ngee oimaliwa yekwafo ya li hai pitile kombaanga ilo i na apa ya didilikwa nope na eembangi da yela.

Omunambelewa woMVA Fund okwa weda po kutya omunhu ngeenge okwa li he lilongele mwene ndee oku na oumbangi nota pa monika ehokololo lombaanga yaye loule weemwedi hamano, ota dulu kuninga eindilo ngee okwa kanifa omhito yokumona oyuuye mo eshi a lemanena moshiponga shetuwa.

Kakele ngeenge umwe womovalihomboli ou a fila moshiponga shetuwa oye kwa li ha mono ondjabi inini meumbo, nena nakufiwa po kena oufemba wokuninga eindilo shaashi nakufya haye a li omweeti womboloto meumbo ndele okwa kanifa ashike.

Amutenya ta yelifa kutya, ngee omweeti womboloto meumbo a kanena moshiponga okwa wanifa nale eedula 60 kape na omhito yokuninga eindilo shaashi oha mono oshikuvila shepangelo. Ashike ngee omufiwa po okwa wanifa 60 , omanga nakufya okuli koshi yeedula 60, nena omufiwa po otaa ningi eindilo lekwafo okudja koMVA Fund ta kala ha mono oshimaliwa fiyo opefimbo ngeno nakufya a wanifa eedula 60.

Amutenya ta weda po kutya, omuyambididwa koMVA Fund ngee a mono oilonga, ilo a wanifa eedula 21 ekwafo otali xulu. MVA Fund oha futile omiti danakumona oshiponga okudja eshi ta ilwa koambulansa yopaumwene ilo yepangelo poshiponga. Ehangano ohali va kwafele fiyo okoshipangelo oko taka mona ouhaku aushe wa pumbiwa, sha kwatela mo omafano , omiti, noiyakulifo aishe ngee okwa lemana. Nena ehangano otali dulu kufutila nakumona oshiponga fiyo omiliyona 1,5 pauhaku. Ekwafo eli ola kwatela mo ouhaku aushe eendokotola, omafano, omakonaakono, omamhango, outemba nominambo kwaavo va lemanenena, oushako nexungomwenyo. Omunambelewa okwa pula shiwana shi lopote oiponga pefimbo shaashi natango oiponga ihapu inai lopotwa pefimbo nope na vahapu va mona oiponga inava shiiva nghee ve na ku shi enda.

LEAVE A REPLY

Please enter your comment!
Please enter your name here