Omumati ena uulema welaka nombunda okwa pumbwa okatemba

0
1382

Loide Jason

OSHITUMBE –Omugundjuka ena uulema, ena oomvula 19 a valwa keena elaka ye okuna esipa lyombunda enkundi okwa pumbwa eyambidhidho lyokatemba.

Kuku Namupala Shinyenga gwomomukunda Oshitumbe mUukolonkadhi moshitopolwa shaMusati ngoka eli omutekuli gwomumati Shivute Wilbard Shilongo okwa ti omutekulu gwe ota mono iihuna yokukala ashike ti ipwedha nolutu oshoka ke na okatemba.

Shinyenga oye a vala yina yaShilongo, ngoka pethimbo ndika eli kegumbo lye lili komukunda guli kokule naampoka puna omwana nayina. Shilongo okwa valwa keena elaka, shoka sha etitha a kale ihaa popi ye ishewe okwa valwa ena esipa lyombunda lya nkundipala shoka sha etitha a kale ihaa kuutumba. Ashike elago lye okwa shangwa opo a kale ha taamba iimaliwa yaanuulema mbyoka hayi gandjwa okuza kepangelo kehe omwedhi. Ihe Kuku Shinyenga okwa ti iimaliwa yaShilongo ngashingeyi oya ninga po ishewe oyo iikwatheli yomegumbo, oshoka okwa lulilwa koyana ha ye mu etele ashike uunona wawo yo otaya yi muushimba.

Okwa ti wumwe womuunona mboka a etelwa owuna ondjala naashika oshe mu thiminike a kale aluhe ta, talele po oshipangelo okufala aatekulu mboka opo ya ka talike ngele ondjala oya shuna. “Ngashi okinda ndjoka yuunona uuhamano mboka mwa tala ooyina oye wu etele ndje ashike yo otaya shuna. Owe ya wu niwe kondjala. Ko okwali kuna ondjala nena oshimaliwa sha Shilongo osho nduno hashi landa uusila opo wu vule okulya,” a ti ngaaka ye ta nyenyeta nongeyo.

Shinyenga okwa tsikile ko kutya aagundjuka yongashingeyi oya pumbwa okukala ngaa nayo yi ilonga okukala yena oshinakugwanitha okutekula oyana. Okwa ti wo kutya otashi yemateke omukulupe okutala uunona wuna omanyutu omanga ooyina yeli nawa komalutu.
“Omuntu ota hukula okanona haka, ye konima yethimbo ota shuna. Konima ashike yoomwedhi dhontumba omuntu okuna ishewe okanona oka kwawo,” osho ati ngaaka.

Ihe shoka osha etitha nee opo Shilongo a kale ta lala kombete yiiti yi na ashike okatalashe okashona nondunda tayi lokele yi na oombululu odhindji dhindji.

LEAVE A REPLY

Please enter your comment!
Please enter your name here