Oshipa tashi lunduluka molwaala

0
4528

Loide Jason

ONEHANI-Omukwashigwana gwomimvo 48 okwa taalela omashongo gokushekwa nokuyolwa sho i iyadha monkalo yoshipa tashi lunduluka molwaala.

Miina Ndeyatetua Haitumba, okwa ninga ngashingeyi oomvula dhi li hamano ta lunduluka ano ena omalwaalwa ga yooloka kolutu omaluudhe nomatokele.

Haitumba okwa ti tango okwa mono ashike omalwaala tage ya kolutu lwe molupe luundondo. Konima sho a ka tala oompadhi nomagulu ge agehe oga ninga omatokele sigo omomatundji.

Omanga epunda nomomutse gwa ninga woo natango omutokele lwo , olutu lwa hupa ko talu ningi oluluudhe.
Shika okwa hokolola kutya osheetitha aantu yamwe yopomukunda gwawo ya kale ha ye mu sheke oshoka aniwa oha shituka.
“Ngashi ndili ngeyi, okwali handi yi puukamba ndi ka tokithe etango na yakwetu ihe, ngashingeyi ihandi yi we oshoka ka pu na ngoka a hala okunwina mumwe nangame,” a ti ngaaka a kengeleka.

Okwa tsikile ko ishewe kutya aantu oya tameke nokuli taya ti okuna omukithi gwoshilundu , omanga koshipangelo inaya popya sha oya ti ashike nakale ha kala momuzile ethimbo kehe.

Okwa ti shika ngashingeyi itashi longo okukala momuzile omanga omvula yali ya loka nawa tayi gandja eteyo lyolela.
“Onda tokola kutya andi penduka ashike ongula pontano eta ndi ka lima iilya yetu nomumwange ihe pohetatu yongula ngame tandi zi po,” osho a popi ngaaka i iyetela ohenda.

Okwa ti shika oshe mu kwathela opo a mone po ngaa iilya tayi vulu oku mu pititha muule womvula. Okwa ti gamwe woo gomomashongo a taalela okwali ha landitha iikulya niikunwa opo a mone mo oshimaliwa sho kukwathela omwana ngoka eli kosekundosikola ngashingeyi, ihe aantu oya tameke ihaya landa iilandithomwa ye shoka sha etitha okwiikalela. “Aantu ngashingeyi oye tondendje. Uunene ngaa sho ndatameke oku shenda omalwaala.Ohandi kala ongame awike nda sa ezaza nondina omaipulo ogendji. Oshoka omwandje okuli kosekundosikoa yaNesi,” osho ati ngaaka newi tali etitha ohenda. Okwa ti shika ngashingeyo oshemweetele uunkundi woku kala ena elondo lyombinzi oshoka naapangi koshipangelo uunene ngaa yamwe yomeendohotola oya tameka oku mu ula omalaka ga honga.

“Ombinzi yandje ngashingeyi ya londo, pomukunda omasheko, koshipangelo omalaka ga honga. Kandishi kutya nandi ninge ngiini,” osho a popi ngaaka a kengeleka omahodhi.

Okwa hokolola wo kutya aniwa okwa ya kombelewa yoshikandjohogololo mOutapi moka kansela ali a pulakene komashongo ge eta shi etitha nokuli kansela a shangele koshipangelo opo ye mukwathele yemu shange momusholondondo gwaanuulema opo a mone openzela ye a kwathele omwana. Ashike aniwa gumwe gwomoondohotola ngoka eshiwike ashike koshipala ku Haitumba okwati kansela miinima yoshipangelo kena mo sha na na lambe opolitika ndjoka eshi.

Ashike Filemon Shikwambi kansela oye tuu ngoka, okwa ti kutya aaniilonga yuundjolowele naya ilonge oku simaneka aavu opo ye ya pe ehungomwenyo alihe. Okwa ti aapangi noondohotola inaya dhimbwa iinakugwanithwa yawo mbyoka ya dheulilwa.

LEAVE A REPLY

Please enter your comment!
Please enter your name here