Ovakulupe naavo va pumbwa eendja va pewa ombelela

0
145

TUULIKKI ABRAHAM

Lüderitz – Ovakulupe naavo vena omhumbwe yeendja ova havalekwa ombelela, kukansela woshikandjohoololwa sha !Nami#nus Jan Scholtz oshivike sha ya.

Scholtz okwa tumbula kutya, ombelewa yaye oya kala nokuyakula eelopota, tadi popi ovanhu vamwe va didilikwa vena omhumbwe yeendja moshikandjohoololwa.

“Mokumona eelopota doludi eli, ame onga kansela woshikandjohoololwa, onda tokola, di shangele kOuministeli, wOmudingonoko nomapashiono, opo uva vatele ombelewa yange, eengobe dili mbali, opo tu dule okutopolela, ovo veli momhumbwe yeendja, oshoyo ovakulupe moshikandjohoololwa shange” kansela Scholtz a hokolola

Ouministry wOmidingonoko, owa nyamukula keindilo laye, eshi wa yandja eengobe mbali, okudilila ko Rosh Pinah.
Ombelela oya topolelwa omandiki, opavali pongeleka yaAnglican, nopongeleka yaKatoolika kaRoma opo haputelekwa osopa luvali moshivike, nokutopolela ovakulupe, naavo veli momhumbwe yeendja momidingonoko.

Eumbo lovakulupe moNautilus nalo yoo ola pewa ombelela, oshoyo omaumbo opatatu molukanda loArea 7, nomo Amilema, omo mwa didilikwa muna ovanhu veli momhumbwe yeendya.

Father Jijesh Paul wongeleka yaKatoolika moLüderitz okwa pandula unene kombelela oyo ya yandjwa, pongeleka yaye opo napo hapu telekwa osopa, hai topolelwa ovakulupe naavo veli momhumbwe yeendja.

Ta tumbula kutya pongeleka opo ohapu telekwa osopa Omaandaha nEtitatu keshe, hai topolelwa ovanhu va fika 50.
Father Paul okwa tumbula kutya eyambidido olo va mona lombelela, otali ka kwafela, lela, mokuteleka oikulya luvali moshivike nokutopolela ovo veli momhumbwe yeendja momudingonoko.

Umwe womwaavo va pewa ombelela, opo vadule okulipalula oNangula Kapiye omunamido 25, oo ena ounona vatatu, yee okuli meeteelelo.
Kapiye, okwa pandula neenghono eshi ombelewa yaKansela ya ninga onghendabala opo imu pe ombelela, a dule okulipalula yeemwene novana.

Ota ti, okuli momhumbwe yoikulya, osheshi ye iha longo. Nokwa tumbula kutya , ombelela oyo a pewa otei kwata nawa, nokupalula ounona vaye na ye mwene.

LEAVE A REPLY

Please enter your comment!
Please enter your name here