Shambo ina taamba ko etidho

0
3586

Maria Namupala

ONDANGWA – Mwene gomukunda Okadhimeti ngoka oye eli mwene goshipundi Onyelelo moshikandjo shOndangwa Petrus Shambo Martin, okwa ti ye ina taamba ko ekuthomiilonga lyopakathimbo omanga inaa shi ningwa pambelewa.

Shika oshe ya konima yomasiku omashona sho komalungula kwa kala taku inyenge omukanda ngoka gwa taambathanwa koyendji, tagu ulike etidho lya mwene gomukunda Okadhimeti mOkaku moshikandjo shuulenga Ondangwa.

Shambo pauyemwene okwa ti, okwali a yakula ombapila ndjoka tayi ulike anuwa etidho lye, eyi tuminwa konomola keeyishi koWhattsap. Omukanda ngoka ogwa shangwa kutya ekutho miilonga lyuumwene womukunda, molwa omashundulo a ningile Omukwaniilwa.

Moonkundathana naye okwa ti nonande a tuminwa omukanda ngoka pamukalo inaagu opala, natango onkene eli a tegelela omukanda tagu ya pambelewa ngaashi ali a ganithilwa miilonga kOmukwaniilwa ye mwene, ngoka oye ali e mupe omukunda ngoka, ye a lele nokukwatela iilonga yomukunda komeho.

Ta ti ota tsikile owala noshilonga she shuuleli omanga iniithanwa ye mwene, ye a tseyithilwe kOmukwaniilwa noku pewa omukanda ngoka. “ngame kandishi ngele ombaapila ndjoka oya za kOmukwaniilwa shili, molwaashoka ando Nkeyama ye mwene okwi ithana ndje noku tseyithila ndje etidho lyandje pwaana iinima ta yi zi konima yomakuma,” Shambo ta ti.

Ta ti ye ina kala ena uutondwe nomukwaniilwa, sho osho emwiinekelele uumwene womukunda, Shambo ta ti ye ini itaala miinima yokomalungula, molwaashoka aantu ohaya vulu okutota po iinima yawo yene nelalakano lyokunyateka omadhina gaantu.

Ombapila ndjoka yi na eshainokaha lyOmukwaniilwa oya yelitha kutya omukunda ogo tuu ngoka noshipundi oya galukila kOmbala, nooyene yomikunda pamwe naanamukunda otaya ka tseyithilwa oshinima shika mbala.

Omupopiliko gwelelo lyOndonga pethimbo ndika Nepando Amupanda, okwa ti omukanda tidho ngoka tagu popiwa gwa nyolelwa Shambo ogwo shili noguli mondjila, nokwa ti eshainokaha ndyoka liliko olyOmukwaniilwa, nongele ina hala okushi taambako iilonga ye, ashike shoka sha yela osho shoka kutya anuwa keshi we mwene gomukunda Okadhimeti noshipundi Onyelelo.

Ta ti omapopyo ngoka guuvika kelelo gazi kuShambo otaga shundula nokuteya po ombili maalelwa, osho wo uuntu nezimo lyaawa. Shambo okwa ningi omutimugoyi, konima sho elelo lya kutha miilonga omalenga gahetatu konima yoomwedhi oonshona.

Omalenga ngoka oga kwatela mo Peter Kauluma, Vilho Kamanya, John Walenga, Joseph Asino, Fillemon Nambili, Kashona Ka Malulu, Joseph Akawa, Tonata Ngulu na Martin Shambo ngoka opo a tidhwa.

LEAVE A REPLY

Please enter your comment!
Please enter your name here