Uudhano pOmutse owe enda nawa

0
84

Maria Namupala

ONAYENA – Osikola Omutse tayi adhika moshikandjolongo Onyuulaye ehulilo shiwike lya piti, oyali yuunganeka uudhano mono yali ya hiya oosikola dhopomudhingoloko. Udhano mbuka ohawu longekidhwa omumvo kehe.

Omunashipundi gokangundu hoka haka longekidha uudhano mbuka Joseph Amukugo okwa ti nuumvo oyali ya tala unene ombinga kuudhano wokatanga kokoompadhi osho wo etanga lyomokambamba lyaakadhona. Oosikola heyali odha kutha ombinga, mono dha thigathana po nomwa tothwamo ndjoka oyo kapyoko. Okwa ti elalakano lyuudhano okwe eta aanaskola pamwe, nokuya putudhila onkalo nohokwe yomaudhano monakuyiwa yawo. “olundji aanasikola yetu oyena ethimbo ndyoka yaana shoka hayeli longitha, notwa hala ethimbo lyawo lyoshali ya kale haye li longitha momaudhano.” Amukugo ta ti.

Amukugo ta gwedhapo kutya uudhano wawo wonuumvo owe enda nawa okuyelekanitha nomimvo dha piti, ashike okwa yelitha kutya otaya longo nuudhigu no ya pumbwa aakwashilipaleki momaudhano gawo no ya pumbwa iiyemo ya kola ya vule okuyambula po oonkatu dhomaudhano moosikola dhawo.

Ta ti ohashi nyanyudha aalongwa uuna ya hangana, yo taya tala nokupaathana iiholelwa iiwanawa momaudhano, Amukugo ngoka a yelitha neyeme kutya oosikola odhindji inadhi tonatela omaudhano, nopendji ngele kwa longekidhwa omaudhano nga ngoka ihadhi kutha ombinga.
“Uudhano ohawu kwathele aanona ya vule okwiitula mo meilongo lyawo, molwaashoka osha pumbiwa aluhe konima yootundi aalongwa ya kale haya kutha ombinga momadheulo nomuudhano kehe mboka ye hole, ohashi gandja woo omukumo nompito kaanaskola ya vule oku ulika iipewa niitalenti yawo mbyoka yena,”ta tsikileko.

Okwa ti oya hala nokupandula ongeshefa yomomudhingoloko yo Mwalelepo, ndjoka ye ya yambidhidha ya vule okupititha uudhano wawo wonuumvo. Okwa ti ando kali po ando ke wete ya vulu okwaadha ehulilo.

Kokatanga kokoompadhi osikola ndjoka ye ya ponkatu yotango Okankolo, ya pewa ekopi, oombandi noshimaliwa shoN$ 500.00, ndjoka ye ya puutiyali Omutse ya pewa ooN$400.00, naandjoka yeetelele okano Onyuulaye noya pewa oshimaliwa shooN$200.00.

Aamati yokohi yoomvula 17 nayo oya kutha ombinga mono osipana yoNehale ye ya ponkatu yotango noya pewa ooN$400.00,ekopi noombandi, Onguti oyeya puutiyali noya peqw N$250.00, nOkankolo ke etelele okano nokapewa N$150.00.

Ketanga lyomokambamba ootali washele nayo oya kutha ombinga, yo taya nuka iimpenyu tayi mpenyuka. Osikola ndjoka ya dhenge mo adhihe Onguti ya sindana ekopi, oombandi noshimaliwa shooN$400.00, ndjoka yeya puutiyali Okankolo ka mono ooN$250.00 omanga Omutse gweya puutitatu nogwa pewa N$150.00.

Omunashipundi ta ti oya thaneka uudhano womumvo ta guya wu kale wa dhenga mbanda, yo taya hiya woo noosikola adhihe ndhoka dha hala okukutha ombinga muudhano.

LEAVE A REPLY

Please enter your comment!
Please enter your name here