Vadimbulukwa efiku lokaana kaAfrica

0
41

TUSNELDE NGHILINGANYE

ANAMULENGE- Ofikola yaJohn Alfons Pandeni moshikandjohoololo Anamulenge pamwe neefikola dikwao dopoushiinda mwa kwatelwa Anamulenge Primary noCanisianum Roman Catholic High School odali da dana nokudimbuluka efiku lokaana okaAfrica.
Efiku eli olali la dimbulikiwa koshi yoshipalonyole ‘Okuendelelifa eameno, enghonopeko nefikifo pamwe lokaana okaAfrica okuya pomudo 2030’.

Pefimbo loshuufanene, omuhongifikola woshilongwa shondjokonona Norbert Lyahulapo oye ali a kufila ko ovahongwa nghene ounona veli pokati ko 10 000 fiyo opo 20 000 vali va ya momunyanyo wopambili moSoweto moSouth Afrika modula 1976.

Lyahulapo okwati omayovi ounona ovaya momapandavanda nelalakano lokuholola omadilaadilo avo, inava hala okulongwa elaka loshimbulu olo lali la etwapo opo li kale elaka tali longwa meefikola domoSouth Afrika novali veshi tala ko kutya vo ovapumbwa ehongo lili xwepo olo tali va djaleke ounongo tau vatula pomufika umwe novakolonyeki vavo..

Momashongo oo a li a taalelwa kovalaule moSA omwa kwatelwa okulanda omambo noikwafifo hongo kounona vovalaule, omanga ounona voilumbu vali hava pewa ehongo loshali, nosho yo omauwa makwao.

“Ngaashi naanaa vamwe vomufye tu shishii nghee ovatokele moSouth Afrika ovo va kala ovahona moinima aishe, ovatokele ovakolonyeki moSouth Afrika kavali va tambula ko ehololodilaadilo lomomafiku 16 Juni 1976,” Lyahulapo osho a kufila ko ounona ngaho.
Eshi osha handukifa ovatilyane nounona vahapu ovali va dipawa pefimbo lehololomadilaadilo.

Kape na naanaa omuvalu wofaafaa kutya ounona vangapi vali va fya mefiku omo, ashike eedjo dimwe oda yandja kutya omwalu woonakufya owali lwopo176 omanga omushangwa dimwe da tengeneka kutya oonakufya ovali veli lwopo700.
Lyahulapo ta ti oshiningwanima shomomafiku 16 June 1976 osha eta lela elunduluko linene shaashi osha pashula ounyuni okumona osho tashi ningwa moSouth Africa.

Oiningwanima ei oya yandja omakufikufi elunduluko mounyuni, omahangano oukwawo-wananghali omolwekondjelo manguluko lopamunghoko mokati ko valaule.

Lyahulapo ta yelifile ounona kutya mo1991 Ehangano loAfrican Unity olo laninga paife African Union ola tokolele opo efiku 16 Juni likale efiku lokudimbulukwa okaana okaAfrika.

“Onga ounona ovaAfrika otuna okufimaneka ovo vali va yandja eemwenyo davo mefiku eli.
Otuna oku udako noha tudulu okuwedako omawi etu komawi avo apa vaxulila, eshi twahala naasho hatu lalakanene.
Okudimbuluka nokuxwaxwameka opo ehongo li twikile, okweeta po omalunduluko oo taa pumbiwa kokana okAfrica,” Lyahulapo ta kumaida.
Scholastika Frans ou ali a yandja etumwalaka ponhele yovahongwa vakwawo, okwati ounona inava tala ko efiku olo lafa lihe na ongushu yasha. “Ongaa okaana okaAfrica otuna okufikama nokulinghonopeka opo tu etepo eemhito noufike pamwe waveshe mehongo,” Frans ta ti.

Ta twikile ko kutya ovanyasha vahapu moAfrica ovena unene onyalo. Ta ti vahapu oveli omitumba momaumbo nokavena nande ehalo ile edilaadilo lokweta po sha. Ta weda po kutya ovanyasha ova pumbwa okukufa ombinga mekandulepo lomikundu devataalela shaashi ovo oshiwana shokomongula. “Nge hatu wanifapo oinakuwanifa yetu nena ohatufimaneke nokudimbulukwa aveshe ovo vakanifa eemwenyo davo mo1976,” Frans ta yelifa.

TUSNELDE NGHILINGANYE okuli omuyandji wouyelele mombelewa yomauyelele mOutapi mOmusati.

LEAVE A REPLY

Please enter your comment!
Please enter your name here