Young Kasi a pititha oalbuma ontiyali

0
52

MARIA NAMUPALA

ONDANGWA – Ongundu yaahikingalo aaNamibia hayi ithanwa Young Kasi otayi ka pititha oalbuma yawo ontiyali. Aahikingalo mbaka oya popi ndhika kuyele oshiwike shika kutya oalbuma yawo ndjoka ya kala ya tegelelwa oya pwa okulongekidhwa no tayi ka pita mbala.
Ongundu ndjika oya thikama po maamati yaali, mboka ya tokola okuteleka nokunduluka oongalo dhina omwiityo omwaanawa no tagu tungu, dhi kale tadhi shambula no ta dhi nyanyudha nokumwenyeka omupulakeni kehe.

Oya kwatelwa komeho kuJohannes Namuhuja ngoka hiithanwa Kappa Kamandela, na Johannes Teophelus (Dre), oya yambuka momudhingoloko gwOndangwa, noya tameka okwiimba iiyimbo noongalo pethimbo ya li aanasikola.

Kappa Kamandela ngoka twa popi naye okwe shi thamuna kutya momumvo 2015 oyali ya pititha oalbuma yawo yotango ndjoka ta yi ithanwa Discount. “Otwa mono kutya nani otu na aayambidhidhi naalanduli oyendji, sho osho she tu tsu omukumo tu longe nuudhiginini tse tu ete po oalbuma yetu ontiyali,” ta ti ngaaka.

Okwa ti omalongekidho goalbuma yawo ontiyali oga pwa, noya thaneka ndjika yi kale ya pita momasiku 29 Juli nuumvo. Ta ti oalbuma yawo otayi ithanwa The Reborn, nomunuungalo wuli 12, mono ya kwathelwa kaahikingalo aaNamibia ngaashi Sedjo Mind, Lil Mex, Omfally, Fillyzo, Bantu, Young T na yalwe.

Dre okwa gwedha po a ti oalbuma yawo ndjika opo ye yi etepo oya longo uule woomvula mbali, konima sho ya pititha oalbuma yawo yotango. Oya hika oongalo dholudhi lwokwaito, hip-pop,house, afro-pop nosho wo oongalo dhopambepo.

Ongundu ndjika yo Young Kasi oya ti otayi ka longekidha oshituthi shoogalo shono tashi endele pamwe nepititho lyoThe Reborn, no ta ya indile aakwashigwana ayehe ya ye ya ka ninge oombangi yo ya tale nkene taya ulike iipewa yawo pethimbo lyo albuma ndjika tayi ya tseyithwa noku tulwa miilonga pambelewa. Ta ya gwedha po kutya esiku ndyoka oya tegelela woo aahikingalo mboka opo ta ye ya mowela ye ye ya nyanyudhe aatali.

Oya pula elongelokumwe maahikingalo ayehe, yo ya tsikile nokuhika osho wo okwiimba oongalo tadhi tungu, ndhoka woo tadhi vulu okuhumitha komeho oshilongo. Taya kumike aahikingalo mboka opo ta ye ya mowela kaaya sholole yo ya tsikile oku ulika iipewa niitalenti yawo aluhe.

LEAVE A REPLY

Please enter your comment!
Please enter your name here