‘Hangaye ndemu dhipaga’ -Valombola

0
3189

Omutoolinghundana

“Omathano ngoka oga thanekwa esiku lya landula ko. Muusiku otamu vulu oku ningwa iinima oyindji. Otashi vulika a dhipagwa kaantu mboka ya tsila ndje ondumbo noya hala okunyateka edhina lyandje,”

Ngoka ogo omatumbulo gomunangeshefa Maurus Valombola ngoka ngashingeyi a panga omimvo ne mondholongo ta pangulilwa edhipago lyomulumentu omugundjuka Benhard Kalimbo (32).

Sho iihokolola tayi tsikile, hahende gwepangelo Lucius Matota okwa pula Valombola okanaku opo a yamukule kuumbangi mboka wa adhika pehala mpoka taku hokololwa kutya opo Kalimbo a li a monithilwa oshiponga, omanga inaa ka hulitha esiku lya landula ko. Omanga e li komeho yomupanguli Herman Januarie, Valombola ngoka a kala a zala okalanda korosali, okwa kala ta ulike keena esimaneko na hahende gwepangelo, sho nokuli lwiikando i vulithe pu iyali a kala nokudhimbulukithwa kutya oye e na oku kala ta yamukula omapulo ta pulwa kuhahende, ihe kena oku kala ta pula hahende.

Okwa kala ti ishuna mo ta ti, ‘hanga me nde mudhipaga ngaye,’ ye ethimbo limwe ta ti ‘kandi na okomenda’ (ita ndi ti ko sha).
Ashike oombangi mwa kwatelwa aaniilonga ye mboka ya gandja nale uumbangi mompangu, oya hokolola kutya momasiku sho gali gaheyali gaFebuluali, 2013, opwali pwa tukuka oontamanana pokati kaValombola na Kalimbo sha ningilwa pongeshefa yaValombola ili pomukunda Okeeke.

Shika oshe ya sigo opo nkatu mpoka Valombola a dhenge Kalimbo nokati kosinuka hokaka teka pokati, naKalimbo okwa fadhuka po.
Valombola anuwa okwa kutha ondjembo ye e ta umbu mombanda, nopo nee a hingi ohauto ye, uuka kombinga hoka kwa matukile Kalimbo.
Esiku lya landula ko, Kalimbo okwali iitsuwa iikokela megumbo limwe lili pomukunda opo tuu mpoka, a mona oshiponga noonkondo.
Omanga inaa hulitha, Kalimbo anuwa okwa li a hokolola kutya okwa adhika ta ende a lambalala opate, sho Valombola a kuluka ko noshihauto she kopate, e te mu tidhagula moluhwa. Okwe mu mbotso, eta zi mo mohauto, noku mu dhenga noshiti shoka a fola pokaluhwa mpoka e mu adha.

Kalimbo okwa hutuka mo momake gaValombola, eta holama moluhwa. Valombola a nuwa sho a mono kutya ke wete we Kalimbo, okwa hingi noku thiga po ehala. Kalimbo okwiisisidha eta yi megumbo lili popepi naampoka pa ningilwa oshiningwanima.
Sho iitsuwa esiku lya landula ko (8 Febuluali), okwa falwa koshipangelo, ashike omupya munene okwa hulitha.

Omakonaakono gopaunamiti oga ulike kutya Kalimbo okwa adhika a topa iilyo yomeni, mwa kwatelwa ela.
Shika osha fala sigo omekwato po lyaValombola. Aapolisi mbo ya ningi omakonaakono, anuwa oya adha mpoka pa ningilwa oshinima, iikulumuna noonyolo dhomataiyela dhafaathana nodhohauto ndjoka yali tayi hingwa kuValombola. Ongelela yehautu lyaValombola oya adhika ya ndonyoka, nokwa adhika wo omafo giisati ga kanyatela kehauto lyaValombola.

Ashike Valombola ngoka a li a popi nondhino okwa nukile pomutenya nokwiipatana ta ti ohauto ndjoka a li ta hingi kayi shi ye, oya mumwayinamati. Ta ti mumwayina okwa li e mu indile opo a pangelithe ko ko ongelela yohauto ye konima sho a pumu ondoongi koshitopolwa shaMbalantu. Ishewe, ye oha hingi olwindji miihwa nomolwaashoka ehauto lya adhika lya kanyatela omafo.

“Ngaye ohandi vulu oku hinga miihwa, ngaashi muuhwa mbu uufupi ohandi vulu oku hinga mo. Ngaashi esiku ndyoka lyoshiningwanima onda piti moluhwa sho nda zi pOkeeke, onda hingi nda yi kongeshefa yandje yimwe. Inandi mu dhipaga ngaye, na ishewe kamatyona ngono ngame kandi mu shi,” Valombola osho a ti.

Ashike omutamaneki Matota okwa ti uumbangi wa gandjwa owa taalela unene Valombola, na osha yela kutya oye a dhipaga Kalimbo. Iihokolola otayi tsikile.

LEAVE A REPLY

Please enter your comment!
Please enter your name here