Kuku Kwedhi okwa pumbwa okatemba

0
326

MARIA NAMUPALA

OMASHAKA – Omukokele gomimvo 69 okuli monkalo tayi nyengathana, nokwa pumbwa ekwatho oku za kAasamalia Aanamutimahenda. Maria Kwedhi okwa holola uudhigu we oshiwike shayi ta ti okuna uuwehame kiikaha osho wo komagulu, shono sheeta opo kaa vule we okweenda. Sho Kundana e mu talele po pegumbo lye pOmashaka oshiwike shayi okwa holola kutya uunkundi we owa tameke momvula yo 1986, pethimbo aadhika ta mono okanona, okwa ti aapangi oyali ye mu thigile okamunino molutu shono she ende tashi mu etele uupyakadhi.
“Oshinima shika osha kala tashi ehameke ndje noonkondo molwaashoka, nenge ondi ye koshipangelo ihandi kwathelwa, ko okapaipi hoka ohe kala tandi ka gumu no ha ka ende nokwaako akuhe,” ta ti ngaaka.

Okwa gwedha po ta ti lwotango sho a tameke okuya koshipangelo gumwe gomoondohotola moshipangelo shaShakati okwe mu lombwele kutya okapaipi hoka okeli kohi yoontumba, no ka ke na we nkene taka vulu oku za mo.

Ta ti oomvula sho dhe ende tadhi yi komeho okwe ki iyadha itaa ende we, ye ihaa vulu okulonga noku ikwathela ye mwene, omwana ngoka he mu sile oshimpwiyu Timoteus Asino okwa ti ohe mu fala koshipangelo, ashike molwaashoka kena okatemba ohashi ya ningile oshidhigu uuna taya talele po oondunda dhoondohotola, osho wo okuza megumbo okuya koshipangelo.

Pethimbo ndika okwa ti iha vulu okweenda kuye mwene shila ongele ta yambidhidhwa, nolundji ngele a lala oha kala ta pi, shono ta ti osheeta kaaha kothe uusiku no ha kala ena omaipulo molwaashoka keshi kutya uupyakadhi mbuka otawu mu fala peni, unene sho oondohotola tadhi mu lombwele kutya okapaipi oka menenwa koontumba no itaka vulu oku kuthwa mo.

Nonande eli monkalo ndjoka ondhigu okwa ti ita mwena, olundji oha kala ta kambadhala ye ta tungu oontungwa dhe nomalilo a vule okulanditha ye a mone oshimaliwa shokoshipangelo, hoka ha falwa aluhe komwanamati ngoka e li naye megumbo. Okwa pula moshigwana kehe ngoka ta vulu okumukwathela oshimaliwa, nenge ta vulu okumulandela okatemba sho shi mu ningile oshipu, okwa ti okwa pumbwa woo okukwathwa a monikile ondohotola ndjoka tayi vulu okukutha mo okapaipi hoka molutu lwe, molwaashoka oondohotola ndhoka a kambadhala odha nyengwa.

“Onkalo ndjika oya limbilika ndje noonkondo, no sha ningila ndje oshidhigu uuna nda thigwa megumbo ongame awike, oshoka onda pumbwa oku yambidhidhwa ethimbo kehe tandi inyenge.Ngele opu na ngoka ena uuyelele waa mpoka te vulu ku mona ondohotola tayi vulu okukwatha ndje mu shika ya monene ndje ekwatho ndyoka mbala, molwaashoka ihandi kotha we nande,” ta ti ngaaka.

LEAVE A REPLY

Please enter your comment!
Please enter your name here