Omupolofeti ihaa gumwa

0
8336

Loide Jason

ONAMBOME-Omukulupe gwomimvo 84 gomOkalongo mOshitopolwa shaMusati okuli monkalamwenyo yapumba notayi kumitha sho anuwa ihaa gumwa nande okomuntu, oshoka shino osho elombwelo eli pewa kuKalunga.

Rosalia Kaukolelwa ngoka ta ti oye omupolofeti gwaKalunga, okwa hokolola kutya okuna ondjokonona onde, ndjoka ya tameke konima yoomimvo 41, okuza esiku a yaguma, nomondjodhi moka okwa lombwelwa kutya ye omutumwa nomuhunganeki gwaKalunga.

Onkalo moka muna Kaukolelwa oya etitha nee opo a hupe ko kokumona uuthemba woshilongo. Aanambelewa yUuministeli wIikwameni mboka yali ye na okumukutha omanyala oyi ikonda ko noya hulila muunyengwi oshoka okwa tindi thilu ye mu gume.

Lwopehulilo lyomwedhi gwa zi ko kansela gwaKalongo Laurentius Iipinge okwa pondola oku mu uvitha ko ndele ta itaale opo a kuthwe omanyala kaantu ya zala oonyala dhonailona opo kaaye mu gume.koshipa

Ihe omukulupe nguka okwa ti shika oteshi taamba ko owala ngele otashi ningilwa megumbo lye oshoka ina mangulukila oku ya koombelewa.
Kaukolelwa nguka ngashingeyi okwa ninga uule woomvula odhindji ina mona omwana molwa onkalo moka eli.

Ta ti okwa tameke oku tsika okuza momumvo 2010, nokuza mpoka okwa kala nokusilwa oshimpwiyu kumushiinda she. Ngele owa yi puye okwa yela kolutu, ihe iipanyala ye yokoompadhi iile shapitilila oshoka itayi vulu oku tetwa kaantu, ishewe ye mwene kiiwete.

Egumbo lye olya yela lya kombwa noonyala uumbondi awuhe owa toolwa mo. Megumbo omuna omisinda sho ha kookaya noongolo ta opaleke egumbo lye alihe. Paku pulakena, kakele kuunkundi womeho, Kaukolelwa okuli owala nawa pamadhiladhilo, niinima mbi ta popi oyi li owala melandulathano.

Okwa ti ombepo ndjika oyali ye mu adha omanga ena okanona ke konkelo okashona lela na shika osha etitha opo a kale a putudha okaana ke nuudhigu oshoka kali teka gumu. Okwa thigi po wo omusaane gwe opo a ka gwani the po oshipewa she shuupolofeti. Kaukolelwa okuna aanona yaali, ihe ngashingeyi okuli ashike megumbo oye awike. “Uka kokule ino guma ndje oshoka uuyuni wonena owuna iinima oyindji niikaha yeni oya nyata, oyi na oodemoni!” osho a igidha ngaaka mushiinda gwe ngoka he musile oshimpwiyu. Shoka tashi kumitha mehokololo ndika ooshoka kutya omukulupe nguka uule woomvula 41 ina enda nande oshipangelo, uuna a hakukilwa kuuvu, ohi itula koondelepa (komakende gomeya) yemwene.

“Ihandi kala nande ndaana osuuka nomongwa oshoka ogo omuti gwandje. Ohandi kutha omeya etandi tula mo osuuka mumwe nomongwa opo ndi yi longithe onga omuti gwandje,” osho a ti ngaaka. Ihe omushiinda she ngoka oye hemu telekele okwa ti omukulupe ngoka oha ehama olundji ihe ina mona nale a enda oshipangelo oshoka ohi ipanga yemwene megumbo. Okwa hokololwa kutya nonande okwa kala omuposi oha tulilwa ashike iikulya mokaaha eta ka tulwa pevi ye te ka kutha po oshoka iha pewa sha peke. Nonande omukulupe nguka a kale kee wete ko, oha opaleke iikutu ye yemwene oshoka ina hala iikutu ye yi gumwe aniwa aantu oyena oondemoni. “Kegulu ka kuli nawa oshoka okuna oondjila mbali ngashingeyi yimwe oyaakiintu omanga yimwe yaalumentu. Ano ilongekidheni,” osho a ti ngaaka ta kumagidha.

LEAVE A REPLY

Please enter your comment!
Please enter your name here