Ondangwa otayi fala omayakulo koshigwana

0
362

Maria Namupala

ONDANGWA – Omunambelewa omukuluntu melelo lyondoolopa Ondangwa Ismael Namgongo okwa ti elelo lye olyi ilongekidha okufala omahumokomeho nomayakulo koshigwana.

Shika okwe shi popi etiyali lyoshiwike shika, moonkundathana dhe naKundana. Elelo olyali lya longekidha oshigongi showina shono shali sha ningilwa aakwashigwana mboka haya kala molukanda lwOnguta.

Namgongo ta ti oshigongi shika osha ningwa nooyene yomagumbo molukanda moka, shina sha wo nomahumokomeho. “Okuza muJuni omumvo gwa ziko elelo lyondoolopa olya kala tali tungu nokutula molukanda moka ominino dhomeya gonyata, no twa hala okukwashilipaleka aakalimo kutya ominino ndhoka odhapwa no tadhi vulu okulongithwa” ta ti ngaaka.

Ta ti iilonga ayihe oya pwa thilu, nokwa indilwa aakwashigwana ya tule mo omaindilo gawo yo ya vule okukala taya longitha omayakulo gondoolopa. Okwa ti oya hala aakalimo yondoolopa ayehe ya kale taya mono omayakulo ga faathana no ge thike pamwe. Omunambelewa ta ti osha kotha oshimaliwa shoomiliona ne (4), okuthikamithapo ominino ndhoka. “Otwa hala woo oku eta omahumokomeho popepi naakalimo yomondoolopa, yo ya tyapule omauwanawa ngoka taga falwa popepi nayo, yo ondoolopa tayi kala yina uutalelo ngaashi oondoolopa odhindji moshilongo, ndjoka tayi kala tayi nana aataleli po naanangeshefa,” Namgongo ta ti. Molukanda lwOnguta otamu adhika omagumbo geli 154 ngoka gena oonomola noga shangithwa kombelewa yelelo lyondoolopa, naashika okwa ti osheya thiminike opo ya tule olukanda pamuthika, lo talu kala lwafa omalukanda omakwawo. Kakele kolukanda nduka omauwanawa ngaka oga falwa woo komalukanda ngaashi Omakulukuma, Uupopo, Okangwena na galwe wo. Okwa ti pethimbo ndika natango elelo lyondoolopa oli ipyakidhila nokutula omalamba momalukalwa ngoka gaa hena, osho wo okutunga oopate opo nenge opu na egumbo ta li pi otashi kala oshipu kookadhimamudhilo ya thikeko nziya. Okwa pula elongelo kumwe okuza maakalimo yomondoolopa, yo tayi iyutha koompango nomalombwelo ngoka taya pewa kewiliko lyopombanda.

Okwa ti otaya lalakanene okukaleka Ondangwa yimwe yomoondoolopa ndhoka dha yela moshilongo, nokwiindile aakwashigwana ya kaleke omahala gawo ga yela nogena uuyogoki.

Ta ti elelo lyondoolopa olyi ilongekidha okuthikitha omayakulo koshigwana, shoka sheya thikamitha po. Aakwashigwana oyali woo ya mono ompito yokupula omapulo, ngoka ga yamukulwa ethimbo olyo tuu ndyoka, noyendji oya kumike aaniilonga melelo lyondoolopa ya longe ngaashi haye shi ningi, ta ye ya pandula sho aluhe taya longo nuudhiginini noku eta omayambulepo mondoolopa ndjoka.

LEAVE A REPLY

Please enter your comment!
Please enter your name here