Oonganga dhiifundja dha kwatwa kopolisi

0
568

SELMA IKELA

Windhoek-Opolisi oshiwike shika oya kumagidha oshigwana opo shi kotoke shaa pukithwe nokukotokelwa “koonganga dhopashigwana oofundja’.

Ekumagidho ndika olya ningwa kopolisi sha landula sho aakalekipo yoveta nelandulathano moVenduka ya kwata pakathimbo nokupulapula aakwashigwana yaUganda yatatu shina sha nuunganga woshiAfrika wiifundja.

Opolisi oya ti aalumentu mbaka yaali oya pulapulwa konima sho opolisi ya taamba omanyenyeto okuza moshigwana ngoka taga ti mbaka oya kotokele aayakulwa yawo moku ya lombwela kutya yo oondohotola dhoshiluudhe ihe anuwa nani mbaka oye shi ningi nelalakano ashike lyokukengelela aayakulwa yawo.

Opolisi oya hokolola kutya gumwe “gwomoondohotola dhoshiluudhe’ nguka okwa kala ta kongwa kuyo omathimbo ga zi ko, konima sho aayakulwa ye ya nyenyeta kutya okwa fadhuka po niimaliwa yawo no inee ya pa omiti ndhoka eya uvanekela.

Aalumentu yaali mboka taya ti oya za koUganda oya kwatelwa kopolisi mepandaanda lyEmanguluko moVenduka oshiwike shika. Ekwato lyawo olye ya konima sho aalumentu yaali yapambathana ya lopota kutya “Ndohotola Gombe’anuwa okwa fadhuka po noodola N$38 000 ndhoka mbaka ye mu futu opo eya pe elago lyokuyelwa miilonga.

Mbaka yaa oyali ya hala okuyelwa okuya ponkatu yuukwatelikomeho pomahala gawo giilonga, onkene oya futu iimaliwa mbyoka kuGombe konima yokulesha okambapila moka nguka a uvaneke aayakulwa ye kutya oha panga omaludhi gomaupyakadhi ga yooloka.Mokati kaa ngaka omuna ngaashi okugalula omuholike a thiga po ekwatathano lyohole, oha aludha omavu omadhigu ihaaga aluka, oha enditha nawa ongeshefa ndjoka tayi shongola, oha gandja wo omiti dhoku shunitha pevi okunwa omalovu nomakaya naandhoka dhoku hwepopeka elondo lyombinzi. Aakwiilongo mbaka oya kala ye edhililwa posasiona yopolisi yaVenduka oshoka kaye na oombapila dhuuthemba wokulonga moNamibia no sho wo omishangwa ndhoka tadhi ya pitike okukala moNamibia.Gumwe gwomaantu mboka ya kengelelwa kwaambaka okwa li iithanwa kopolisi opo a ka patulule oshipotha shoku kengelelwa. Aapolisi oya ti nguka oye gumwe mokati kaantu oyendji mboka ya kanitha omaliko gawo mokukengelelwa kwatya ngaaka moshilongo ashihe.

Aapolisi sho ya konakona omatumwalaka mongodhi ye oya ndhindhilike kutya osha fa aantu oyendji ya kengelelwa komundohotola ngoka. Oshoka oya mono anuwa omatumwalaka ngoka taga nyenyeta kutya iihemba mbyoka ya pewa okuya panga kayi na shoka ye ya longela.
Aapolisi oya kwata noku eta omukwashigwana gwaUganda omutitatu, ngoka a kala ha gandja uumbapila womatseyitho giilonga yoonganga dhopamuthigululwakalo ndhika dhokoUganda, no ha futwa oodola N$120 mseiku.

Opo opolisi, yi koleke oshipotha shayo kombinga yoonganga dhiifundja otayi kumike aantu ayehe mboka ya nyokomwa tashi vulika koonganga dhiifundja, ya tulile mo ndhika ndhika oshipotha shuukiliminala.

Omukonakoni Christina van Dunem Fonsech okwa lombwele Kundana kutya opolisi oya tokola oku ninga oshikonga shika konima yoku yakula omakemo ogendji ga zi koshigwana tashi nyenyeta tashi yugwa koonganga ndhoka hadhi ningi omauvaneko goku ya panga ga fa goshili.
“ Aakwashigwana oyendji otaya nyenyeta, naashika osho shetu tokolitha opo tu kwate aantu mbaka haya hawaleke uumbapila mbuka moshilando, opo yetu fale kumboka “yi iluka oyo oondohotola” osho a popi nokulondodha oshigwana opo shi iyageke okuninga iihakanwa yoonganga dhiifundja, yoongeleka dhaana omakankameno naahunganeki aafundja, mboka haya pukitha noku hekela mo aantu minima yaa shi yoshili..

‘Ngele owa hala okuyelwa miilonga, ilonga ngoye ishewe longa nuudhiginini. Otwa vulwa, na ishewe shika omanyami gowala” osho a popi kombinga yaantu mboka ya ningi iihakanwa yoonganga dhiifundja.
Fonsech okwa indile aantu mboka ya ningililwa mo kuNdohotola Oobo, Zama osho wo Luck ya dhengele opolisi konomola 081 2270452 nenge 061-2094454.

LEAVE A REPLY

Please enter your comment!
Please enter your name here