Oshituthi shoonkuluhedhi moshilongo sha tseyithwa

0
98

PINEHAS NAKAZIKO

Konima sho oshiwike shoonkuluhedhi nomuthigululwakalo shali sha ende nawa omvula ya zi ko konyala oshilongo ashihe, aalongekidhi yoshiithanene shika oya tseyitha olweetho lwa landula ko, ndoka talu ka dhanwa muSeptemba nuumvo.

Oshituthi shika osha tengenekwa tashi ka etelela iinyangadhalwa yomithigululwakalo ya yoolokathana, mwa kwatelwa euliko lyomithigululwakalo oshilongo ashihe, euliko lyiikulya, niidhano osho woo iinyandwa yomithigululwakalo.

Kakele kwaashoka, aalongekidhi oyali ishewe ya pula oshigwana opo shi vule okukutha ombinga moshituthi shika, niinyangadhalwa mbi ya pumbwa oku ningwa oshiwike osho tuu shoka.

“Otwa itaala kutya, oku kumika aaNamibia opo ya kuthe ombinga methigathano ndika otashi ka kala onkatu ya simana okutunga oshilongo, nokutula kumwe omihoko dhoshilongo,” Omunashipundi gwoshituthi shika, Ndapewoshali Ashipala ati ngaaka.
Nuumvo oshituthi shika otashi ka dhanwa kohi yehuku “Otuli mo Atuhe.”. Ashipala okwa ti, shika osha hala ashike okutya kehe gumwe okuna uuthemba woku kutha ombinga moshituthi shika nelalakano lyokutunga oshilongo.

Ashipala okwali ishewe a kumike aakalimo yomoshilongo opo ya kale ya gandja omadhiladhilo gawo nkene esiku li na okudhanwa manga omasiku 31 ga Juli inaa ga thika.

Okwa ti shika otashi ka kwatela mo okukumagidha oongundu dhomithigululwakalo opo dhi ka gandje omainyanyudho, okulombwela aanona naantu ayehe opo ya kale ya zala omizalo dhawo dhomithigululwakalo noku ulika noku tyseyitha iinima ayihe yomithigululwakalo.
Ashipala ota adhika ko email: museums@iway.na nenge konomola yongodhi 061-302230.

LEAVE A REPLY

Please enter your comment!
Please enter your name here