Bantu noshipandi shoongalo Ekhaya

0
239

PINEHAS NAKAZIKO

Omwiimbi gwoongalo dho afro-pop noKwaito, Mepolo Asser, a tseyika nawa nedhina lyo moongalo Bantu, osho a galuka noshipandi shoongalo 14 tashi ithanwa Ekhaya.

Bantu okwa ti Ekhaya osha hala okutya Egumbo, melaka lyoshiXhosa ndyoka hali popiwa moSouth Afrika. Okwa gwedha po ta ti oalbuma ndjika otayi popi kombinga yokukala megumbo, nankene aantu haya kala ya gundjila ngele omitima dhawo dhili momagumbo.

Nonando oshali shemu pula omvula ayihe oku eta po oalbuma ndjika, Bantu okwa holola kutya oongalo adhihe otadhi hokitha oshoka ohadhi kwelengendja nawa momakutsi gaapulakeni, na kehe ngoka tedhi pulakene ita kala iti inyengitha ompadhi.

Moalbuma ndjika ontiyali Bantu okwa imba noonkondo, shi vulithe mwaandjoka yotango yedhina Power of Babel, nando nayo oya endele nawa.

Oongalo tadhi adhika moalbuma muka ndhoka dha dhenga mbanda nodhi vule oonkwawo oongashi Ekhaya, Lambalala naKaboyi, ndhoka odho ishewe tadhi inyenge nawa kooradio dhomoshilongo no mo ma lyukulyuku.

Bantu okwa ti ongalo Ekhaya okuyi hole noonkondo, oshoka otayi popi nkene ali a fumvike aakuluntu ye manga a li omushona, notayi gandja etumwalaka koyendji mboka ya kanitha aakuluntu yawo sho yali uunona, oku ya kumika kutya kashishi ehulilo lyuuyuni.
Bantu omuhikingalo a za kOshivanda sha Nghatanga mOkalongo, moshitopolwa Omusati.

Okwali a tameke okwiimba oongalo dhe manga ali omushona, nokwali ishewe a tseyika nawa noongalo dhe dhotango ngaashi Pamba, Special Woman na Mukwafeleni.

LEAVE A REPLY

Please enter your comment!
Please enter your name here