Elelo lyaNgandjera otali tsikile elongelo kumwe naELCIN

0
99

SHIPI ELAGO

OLUTEYI-Ekwatathano ndyoka lya kala pokati kaatumwa nelelo lyopamuthigululwakalo ota li tsikile natango.
Euvaneko lye longelokumwe ndika olya hololwa moshipopiwa shOmukwaniilwa gwaNgandjera pOnekuni moshituthi shetumo moshikandjo Ngerki shUuninginino ndyoka lya li lya ningilwa megongalo Oluteyi ehulilo shiwike lya zi ko.

Oshipopiwa shoka shali sha leshwa komupeha gwamwene gwomukunda Oluteyi Festus Aron Ileka osha holola nkene aatumwa ya thikile poombala miitopolwa yoWambo nale opo ya uvithile oshigwana evaangeli.

Tatekulu Ileka okwa li a holola kutya aaleli yopamuthigululwakalo yonale oyo ya li ya palele aatumwa ondjila ya mone ompito oku dhika omapya tumo miitopolwa ya yooloka moWambo.

Okwa li a ulike nkene osheendo shaatumwa shoka sha li sha thikama po maasita yatano naanuungomba yaali ya li ya thiki lwotango pOmandongo popepi nombala yomukwaniilwa Shikongo shaKalulu ngoka ali eya taamba nenyanyu momumvo 1870 konima yomimvo ngashiingeyi 147.

Okwa ti aatumwa oya li ya thiki molyomakaya nesiku lya landula olya li Osoodaha nelongelokalunga lyotango olya li lya ningwa mOwambo lya ningilwa pOmandongo.

Okwa ti mUukwambi aatumwa oya li ya thikile pombala yomukwaniilwa Nuuyoma wEelu moka a li e ya taambako nenyanyu nokwa li e yape oongombe mbali.

Aatumwa mOngandjera oya li ya thikimo momasiku 31 Mai 1871 yathikila pombala yomukwaniilwa Tsheya Tshuutshona omukwaniilwa okwa li a nyanyukilwa aatumwa nokwa li e yape ongombe nesiku ndyoka olya li etitatu koshiwike nelongelo kalunga lyotango olya li lya ningwa mOngandjera meti 4 June 1871 na omuuvithi okwa li Martin Rautanena.

Onkene moshipopiwa shomukwaniilwa Japhet Mupiya shoka sha li she etwa moshituthitumo kuFestus Aron Ileka okwa li a holola nkene omalelo gopamuthigululwakalo natango taga kwatha Ongerki ya ELCIN oku taandeleka evaangeli kaantu mboka iina uva elaka ndyoka natango.

Okwa ti ando omalelo gopamuthigululwakalo ka gali ga taambako aatumwa mbaka nena ondjila yoku taandeleka evaangeli nuuyuni awuhe oya kala omdhigu onkene otaya tsikile noku kwathela ongerki yaELCIN ethimbo kehe.

LEAVE A REPLY

Please enter your comment!
Please enter your name here