Eyokomeho lyomahupilo oshitopolwa oshititano

0
24

Komutoolinkundana

Windhoek-Omathaneko omatitano gependulo po [NDP5] ngoka ga tulwa miilonga nuumvo, kOmuperesidente Hage Geingob oge na elalakano lyoku adha ondjodhi yaNamibia yokukala oshilongo shoofabulika okuya momumvo 2030. NDP5 oyo oplana ontitatu yomooplana dhomimvo ntano kehe ndjoka yi li oshitopolwa shondjila oku adha ondjodhi yaNamibia yomomumvo 2030. Ndjika oya tameke iilonga momumvo gwiimaliwa 2017/2018 na otayi kala miilonga sigo omumvo 2021/2022..

Eyo komeho momahupilo
Elunduluko momutungilo tashi pitile mokutunga po oofabilika dhoku tula ongushu kiilongomwa.
Okunenepeka osho wo okuhuepopeka iitungomwa. Mbika ohayi etapo ekoko momahupilo na oyo omukanka hoka haku tungilwa onkalamwenyo ohwepo.

Iiyenditho nomayenditho; Oshimpungu shika osha thikama peni sigo oompaka?
Iiyenditho nOmayenditho iinima ya simana no yi na oshilonga meyokomeho lyiikwafabilika, ekoko pankalathano nopamahupilo osho wo ehengumukilo mumwe pashitopolwa, onkene oshimpungu shika osho shimwe shaambyoka ya pumbwa oku endelelwa po. Omimvo 20 dha piti epangelo olya longitha oshindji okutunga oondjila, omalutenda, iikwameya, omatuliloskepa niilonga yi na sha nomatuko mombepo, opo yi gwanithile po oshigwana oompumbwe ya sho yomakwatathano ge li nawa. Oshikwawo iilonga mbika oya ningwa opo oshilongo shi kale endiki lyuupitilo womitsalo okuza kiilongo meni lyAfrika okuya pondje osho wo oku enditha omitsalo okuza komatuliloskepa okuyi fala kiilongo meni lyaAfrika. Namibia okwa tungu oondjila dhe omatuliloskepa ge osho wo uupale woondhila we okukala omukomeho moku enditha iinima noodongelwa mehangano lyeyokomeho muumbugantu waAfrika [SADC].

Pethimbo ndika oshimpungu shika osha gandja iilonga kaantu ye li lwopo 25 700, shika osha kalela po ooperesenda ndatu oshinkwanu hamano dhomwaalu gwaantu mboka haya longo moshilongo. Sho oshimpungu shika ohashi eta mo iiyemo yooperesenda ne oshinkwanu heyali miiyemo ayihe yoshilongo. Omahupilo taga ende kashona osho wo elando eshona lyiilongomwa, negwo pevi lyepulo lyiilongomwa yaNamibia kaalandi yopondje oya fala mpoka kutya iilonga yoku enditha iinima oya kala itaa yi longo nawa molwashoka kapwa li iilandithomwa mbyoka ya pumbiwa okufalwa kehala limwe oku yi kutha komatulilo skepa. Namibia okwa kala ta hwepopeke ondondo ye moshimpungu shika nopamauliko gehangano lyedhina Global Competitiveness Index, ye okwa thikama pondondo onti 24 mokati kiilongo 138 omumvo 2016/2017.

Molwashoka oshimpungu shika otashi vulu oku etela oshilongo uuwanawa owindji omathaneko omatitano otaga thaneke oshimpungu shika shi thikame kumwe kutya nee omo ku enditha omitsalo, aantu nosho tuu , iiyenditho mbyoka oya pumbwa okukala yi na ekwatathano lili nawa opo okwi inyenga kwiinima naantu ku kale okuwanawa nokwa ndjanga. Omalongekidho goku longa muukumwe ngele tashi ya moku enditha iilongomwa nosho wo aantu otaga ningwa metsokumwe nOmathaneko omanene gOmeenditho gopashigwana osho wo ngoka gopaigwana. Elalakano enene oondika okuninga Namibia endiki lyiilonga yomeenditho muumbugantu wAfrika. Oshimpungu shoku enditha tashi longo nawa nonondjungu osho esipa lyombunda okusindanitha Namibia moku adha iilalakanenwa ye ya tumbulwa momathaneko omatitano.Mbika oya kwata iitopolwa ngaashi uunamapya, iikwamina, iikwafabilika,iikwahi yomefuta, osho wo eyokomeho komikunda nomiilando nomatelopo nuupashioni.Omaenditho noku enditha okwa simana wo mokuhumitha komeho nawa onkalo yomudhingoloko gwa gamenwa no tagu longo nawa.
Omathaneko omatitano geyokomeho oga hala opo uuna taku thikwa komumvo 2022, oshilongo oshina omikala dhoondjila omiwaanawa kwaana we ndhoka dha kwatakanitha oshitopolwa shaSADC nuuyuni woongeshefa pondje yenenevi.

Nonando omalalakano ngaka oga tothwamo ngaaka, oshilongo naathaneki oye shishi kutya ope na omashongo ngoka ye na okutaaguluka moshimpungu shika. Ngaka ga kwatelamo iimaliwa iina yi gwana nawa okufutila iilonga yokutunga oondjila niipumbiwa ayihe yiiyenditho. Oshikwawo oshimpungu shika natango oshina ompumbwe yaaniilonga yena ontseyo ya mbwalangandja mokuhololapo oondjila niinima yilwe.

Ishewe ope na eendekelo kombinga pokati kiilonga yokutunga oondjila oompe mpoka pwaana oondjila noshilonga shokukaleka po ndhoka dha tungwa nale opo kaadhi mbonyauke po.Shika oshimwe sho mashongo ngoka taga kateke eyokomeho nawa moshimpungu shika. Oshinima oshikwawo okunongopeka aaniilonga aaNamibia okuza kaanongo mboka haya pewa iilonga yokutunga oondjila nayilwe oshinima shoka tashi ende kashona noonkondo. Onkalo ndjoka yi li po ngashingeyi yomitsalo dhoongeshefa tadhi endithwa moololi oonene moondjila pehala lyoku tuta ndhika nomashina oye eta eudhakano moondjila osho wo ya fupipike onkalamwenyo nongushu yoondjila moshilongo. Ondjila yolutenda oya kala ethimbo monkalo ombwinayi molwashoka olutenda olwa kulupa , omashina nago ogo nale, omanga oshikondo shooskepa oshina eshongo nuunkundi sho kaashina natango oompango ndhoka tadhi shi wilike.

Omauyelele nOmakwatathano
Omahupilo ga kankamekelwa kuunongo oga pumbwa opo omuntu kehe a kale ta vulu okukala niilongitho yomakwatathano gopashinanena taga monika nuupu na ishewe otaga vulika kukehe ngoka ahala okuga longitha.Omakwatathano ngaka gopashinanena oga kwatela mo iilongitho ngaashi oongodhi dhokopaala, oongodhi dhopeke, omayakulo gooradio nosho wo goTV, niilonga yomakwatathano gointaneta.Opo ngaka ga etwepo noku kalekwapo ngaka oga pumbwa aantu ye na uunongo mugo opo ya kwathele aalongithi yago ya vule okuga longitha yaana uumbanda. Namibia oshilongo oshi-51 mokati kiilongo 138 pahokololo lyoWorld Economic Forum’s Global Competitiveness Report 2016/17 moku kala shina omakwatathano gopauteknika ge li nawa. Mo Namibia konyala ooperesenda 95 dhoshigwna ohadhi vulu okupopya nongodhi yopeke . Oshilongo otashi lalakana opo uuna taku thikwa komumvo 2022 oshilongo ashihe shikale tashi vulu okulongitha omakwatathano gopaungomba taga vulika pashimaliwa kukehe omuntu.

Enkondopeko lyokulanditha pondje osho wo ehengumukilo mumwe pashitopolwa. Namibia oshilongo oshiyamba ngele tashi ya poonzo dhopaushitwe, nonando oshina oshigwana oshishona, oshilongo oshi li pehala ewanawa pamutungilo gwevi onkene okulonga naashiinda oshinima shasimana. Eyomumwe pashitopolwa oshinima tashi dhana onkandangala na osha pumbiwa mokunenepeka omahupilo, okukaleka po egameno megandjo lyiikulya niikwankondo,okuetapo oompito dhiilonga noku tidha po oluhepo tashi pitile metopolelathano lyuuzeko. Sigo oompaka Namibia okwa tumina pondje iilongomwa yongushu yooN$67,9 oobiliona mo-2016 okuza pooN$41 oobilliona mo 2011. Shika oshilile po ooperesenda 44 dhiilongomwa ayihe yomoshilongo. Iilongomwa moofabilika dhaNamibia oyo ooperesenda 43 dhiinima mbyoka ya tuminwa pondje, omanga iikwamina mbyoka iinayi ngushupalekwa ya tuminwa pondje oyo ooperesenda 37. Ooperesenda 65 dhiikwamina mbyoka hayi tuminwa pondje odha thikama mokawe. Namibia okuna omulandu gwomakwatathano gopaipindi ngoka hagu humithwa komeho kaakaleli po shilongo ye miilongo moka ya tumwa , Mbaka ohaya humitha komeho oompito oombwanawa dhomapungulo moNamibia osho wo okuhumitha komeho iituminwa pondje ya Namibia miilongo moka mbaka ya tuminwa ongaakaleli po.

Oshilongo osha thaneka okukala pomuthika gwomahupilo gambwalangandja na ohaga tumine oshindji pondje molupe lwiilongomwa ya ngushupalekwa okuya pomumvo 2022.

Oshitopolwa shika osha taalela omashongo gonkalo ndjoka omahupilo gena uunkundi okunenepeka iikwafabilika noku gwedha ko ongushu kiinima. Omolwonkalo ndjika oshinima shoku tunga oofabilika otashi ende kashona. Oshikwawo moshitopolwa shomahupilo omuna ompumbwe onene yaaniilonga mboka ye na uunongo wa pumbiwa.

Oshitopolwa shiimaliwa nekwatelo mo lyoyendji Pethimbo omathaneko goNDP4 ga li miilonga oshimpungu shiimaliwa osha koko nooperesenda 8.4 komumvo. Oshikwawo egandjo lyomikuli koshikondo shopaumwene ongo oshipambu sho GDP olya hwepopala noku thikama pooperesenda 55,3 momumvo 2016 okuza pooperesenda 49,2 omumvo 2011.Methimbo olyo tuu ndyoka moshilongo omwa li muna omahangano goombaanga ge li gahamano okuza koombaanga dhili ne adhike ndhoka dha li po momumvo 2011.Oshikondo shoongeshefa ooshona shona , ooshona naandhoka dhopokati okwa li sha tengenekwa shina konyala iilyo yili 33 700 momumvo 2015.Konyala etata lyoongeshefa ndhika dhoo MSMEs odha shangithwa pambelewa omanga dhilwe inadhi nyolithwa no hadhi longele moshitopolwa shomahupilo shoka inaashi shangithwa pambelewa. Okuya pomumvo 2022, Namibia okwa hala okukala ena oshikondo shiimaliwa tashi longo nawa , na osha kwatela mo omuntu naashika otashi kwathele wo moku endeleleka etungo po lyoofabilika oompe odhindji.

Nando oshikondo shiimaliwa opo shi li , aanangeshefa aashona oye na natango udhigu oku mona omikuli naashika otashi ngundike ekoko lyoongeshefa ndhika.Omashongo galwe ongaashi okwaana ekwashilipaleko uuna ongeshefa oshona ya hala oku indila omukuli kombaanga nomolwonkalo ndjika aa indili yiimaliwa aanangeshefa aashona ihaya pewa oshimaliwa shomukuli.

LEAVE A REPLY

Please enter your comment!
Please enter your name here