Luhupe moCassinga a pakwa nefimaneko

0
427

ONAMISHU – Luxupe moCassinga Maria “Ambushu” Shitaleni Hekanga okwa pakwa pafimaneko lopaukwaita pOnamishu moshitukulwa shaShikoto Olomakaya la djako. Hekanga oo a mana oweenda pehovelo lohani eyi, moshipangelo shepangelo mOshakati moshitukulwa shaShana, okwa kala omunailonga metanga leameno poBatalion 261 mOluno mOndangwa.

Ongudu yovakwaita voBatalion 261 yaLuno ova li poshivilopako shopafimaneko lopaukwaita sha ningilwa pOnamishu. Ovapopi va yooloka ove mu ndjokonona nghee a kala omunambili nakeshe munhu ta shakeneke, omwiineekelwa moinakuwanifwa yoilonga nomunashili moita omo a kulila. A dalelwa mOnamunama moshitukulwa shaHangwena Septeba 19,1959, meedula dounyasha okwa ya moupongekwa 1975 omo e liluka edina lomoita Ambushu tai teya omulungu wekende.

Ambushu luxupe moshiponokela shomoCassinga, 1978, oo a hangwa opo a di kokamba yOkefitu, ova fitikininwa mo aveshe namumwaina Tresia Shitaleni Ndadi. Mokutanga oupenda waye, ovapopi ove mu hokolola kutya okwa nakula okaana kokamati modikwa yaina ou a xwikwa koikana yeedila dovakwaita vomukolonyeki monhulilwa yaCassinga.

Oukwatya waye wa hokiwa kewiliko longudu owe mu hoololifa opo modula 1981, a ka kalele po ovakulupe nounona veefiye koKwanzasul ovo va tota po endiki laNatalia Mavulu omo mwa tekulwa eefiye nounona vaavo va ka lwa oita yekondjelomanguluko laNamibia, Ambushu okwa longa peenhele da yooloka fiyo okoDalatandu oko a kala fiyo oshehi va alukila keumbo 1989 nomushamane waye Michael Hekanga ou va hombola naye mOlubango 1984.

Nande ina fikila ta mono oilonga eshi oshilongo sha manguluka edeulo loukwaita okwe li mona koRooikop kOmbaye manga ina lundulukila mOluno omo a longela fiyo opexulilo. Okwa kwatwa kounghundi petameko lodula ei , nokwa hakulwa mOshakati koWindhoek nokwaalukila mOshakati omo a xulifila mefiku lotete laJuli.

Ambushu okwa fiya ko ovamwaina vatatu ovakainu vavali, novamwaxe vahapu, omona womukainhu umwe novatekulu vane. Ongudu inene yovakwashiwana novakwaita ova li poshivilopako Olomakaya la djako.

LEAVE A REPLY

Please enter your comment!
Please enter your name here