Ofaalama yoikwamavava mOutapi

0
78
SONY DSC

TUSNELDE NGHILINGANYE

OUTAPI-Omunafalama woikwamavava mOutapi okwa pandula ovalihongi ovo va talele po ofaalama yaye omafiku a djako.
David Natangwe ou oye Omutoti nomukwateli komesho wofaalama yokumuna oikwamavava yedina Horison mOutapi moshikandjohololo Anamulenge, okwa holola eudo nawa laye kovanafikola vopEtunda Combined school. Ovahongwa konyala 36 vopofikola Etunda Combined moshikandjohololo shaRuacana ovali vatalela po onhele yaye oshikando shotete omafiku aa. Natangwe okwa ti etalelo po eli oliwa, molwasho i otali kwafa opo ongeshefa yaye yi monike nhumbi hayi longo no shike hayi yandje moshiwana.
Ovahongwa ova talele po ofaalama yeexuwa okulimonena ko voovene nghene oikwamavava hayi munwa nokutekulwa.

Natangwe oo a tota onhele yokumuna oikwamavava konima yeedula mbali, okwa holola nghene sha pumbiwa opo oshiwana shokomongula shikale shina ehalo nelitulemo mokushiiva okumuna oikwamavava.

Okwe va ulikila oikuku yoikwamavava ifike pu ihamano, omo muna oikwamavava yomaludi a yooloka ngaashi: eexuxhwa dOshiwambo, eembaka oimote noikwamavava yomaludi amwe.

Natangwe okwa fatululila ovahongwa nghene shafimana opo iikwamavava ikale meni loshikuku oufiku nongula otayi pitifwa mo opo yi ye pondje yoshikuku okukala ya manguluka.

Okwe va fatululila nghene vena okupa exuxhwa oikulya nomeva, noku va lombwela kutya oxuxhwa otai dulu okuninga efimbo lile ihena oikulya ashike itai dulu okuninga efimbo lile ihena omeva.

Shikwawo osho, Natangwe a hololela ovahongwa omukalo nghene vena okutunga po oikuku yoikwamavava kutya, ouna okwamena oikwamavava ketango lihe uye moshikuku nokutala elinyengo, lomhepo shaashi moshikuku ina mu pumbwa omhepo ihapu.

Ouna yoo okutula oikuku ili li kokule kashona nelalakano okukelela omukifi nge oshikuku shimwe osha kwatwa komukifi exuxhwa opo dihadi pwepo komukifi adishe.

Eshi shali shanana ovahongwa unene okumona okadila oko haka ifanwa (Quail) oshimote oyo paye ta ti okweyi kufile kofaalama yedina City Pets koVenduka konima yodula netata.

Ota ti oshimote oshiwa unene nokumunwa shaashi ohashi li oikulya ishona, onhele omo shi li oishona naunene ohaiyandje omayi moule wemwedi mbali nokuyeleka neexuxhwa odo hadi yandje omayi moule weemwedi nhe. Ota ti omayi oshimote okuna oprotein idule omayi eexuxhwa.

Ovahongwa ovali yoo va ulikilwa omashina avali manene limwe omo totula omayi ngaashi exuhwa taa kala mo omafiku 18 omanga inaa ya keshina lokutendula, nomayi oshimote otaa kala meshina 14 omanga inaa tulwa mwaalo lokutendula.

Annette Shililifa ou a li a kwatela osheendo komesho nokuli omuhongi woshilongwa shounafalama okwa pandula unene eshi ovahongwa veli monenako vene shaashi ohashi kala shidjuu moku va udifako lela.

Philipus Kashima oo eli omuyandji mayele waNgoloneya woshitopolwa shaMusati okwali yoo a mono omhito okupopifa ovahongwa nokuva kumika opo veli tule mo mehongo lavo. Okwa denga unene omufindo kovahongwa voukadona kutya nave likaleke kokule nokuya momilele omanga veli ounona vashona shaashi oshinima sha tya ngaho otashi va imbi okuya komesho nehongo lavo.
Tusnelde Nghinganye okuli omuyandji wouyelele mombelewa yomauyelele mOutapi mOmusati.

LEAVE A REPLY

Please enter your comment!
Please enter your name here