Omukulupe ali a pilwa eumbo a mona omakwafo

0
200
SONY DSC

TUSNELDE NGHILINGANYE

OUTAPI- Epangelo laNamibia la tondoka onghuwo ya meekulu Fenny Shidute womomukunda Osholute moshikandjohololo shaRuacna. Meekulu Shidute okwa kanifila eliko laye momundilo oo wa lakateka po eumbo laye.

Meekulu Shidute oo eumbo laye lapya po filu kondalu yaNelyanga, okwa pewa ombakumbafa, eenghaku dovakulunhu nodounona nomindjalo dofikola dovatekulu vaye.

Omakwafo aa meekulu Shidute okwe a tambula opamwe novakwashiwana vomoshikandjohololo sha Ruacana, eshi ovo va pewa oilongifo opo ve ke ilongife moinyangadalwa yavo okulimonena oiyemo yokulikwafela.

Mokuyandja oilongifo kwaavo vali ovanelao Kansela woshikandjohololo sha Ruacana Andreas Shintama, okwa holola nghene epangelo leli longekida okukwafela oshiwana mokuli xumifa komesho unene tuu ovo veli kuushayi opo veheli efele oluhepo nondjala.

Shintamba okwa ti oshikandjohololo shaye oshakwafela ovakwashiwana ava iikwaniipangifo okudiilila moshimaliwa shomutengenekofaneko wodula 2016/2017 omo oshimaliwa shifike peeN$ 387 594,45) ya longifwa mokukwafela eekinda nhatu, odo da kala dina ounona veli omutumba pedu , okutunga oundjuwo omulongo navahetatu momikunda da yooloka va pewa ovakulupe noilema. Omakwafo okudiilila mopohalama yo Micro-finance omwa pewa vamwe oikombo 23 omo ofamili imwe ya pewa oikombo omugoyi ikwawo tai pewa oikombo inhe , oshikunino shoku eta po oihape, omashina okufoloma avali nominino domeva.

Victoria Angala mwene wo KVC Catering Trading oo apewa okila yakula yokutalaleka, okafiya kokundjeneka oikulya (Micro-wave) nokashina kokukanga, okwa ti eshi epangelo le mu ningila oshinene noku udite etumba linene shaashi otaka longa noupu oilonga yaye. Helmi yo oo naye mwene wokambani yedina B-Yandje Catering CC, a pewa oshitafula noipundi yasho ine, okila yokutalaleka, iipeleki noipilangi okwa ti ye, oluhepo ote ke li tela kokule shaashi otaka longa noudiinini.

Mefiku tu olo Martha Livingston mwene wehangano ledina “Eta omahodi oye kuKalunga” (Bring your tears to God) oo eli omukalimo womoKahandja nande ye mwene odalele yopomudingonoko wa Ruacana okwa li yo a yandja oshako noshipakete omo muna oikutu, ta ti; eshi okwe shi ninga nelalakano kutya ehangano laye ohali kwafele ovafiyekadi, naavo ihaava dulu okulikwafa vovene neefiye.

Shintamba moku tambula ko osho sha ningwa kehangono eli okwa udaneka kutya oipumbiwa ei otai ka kala ya yandjwa kwavo veli momhumbwe , nokwa pandula unene aveshe ovo tava yambidida epangelo. “Eshi wa ninga oshinima, shafimana unene noshi li oshihopaenenwa shiwa” osho Shintamba a ti mokupandula Livingston.

Tusnelde Nghilinganye okuli omunambelewa wokwandjaneka ouyelele mombelewa Yomauyelele moshotopolwa shaMusati –mOutapi.

LEAVE A REPLY

Please enter your comment!
Please enter your name here