Ovakwashiwana va kwafwa kepangelo

0
43
SONY DSC

Tusnelde Nghilinganye

Outapi-Vamwe vomovakwashiwana vomoshikandjohololo Tsandi, ovo vali va tofwa mo koshihololifo nova mona omakwafo okulixumifa komesho noinyangadalwa yavo,ova hafa mokupewa oilongifo.

Ovanangeshefa vanini ava ova pewa oilongifo yavo pehovelo lohani ei kuKansela woshikandjohoololo Tsandi okudilila mopolohalama yoMicro-Finance.

Ondongwadiva Hope Project oyali ya pewa oilongifo yongushu yoN$35,000, omanga Oshingolo Chicken Project yali yapewa oilongifo yongushu ifike poN$24,000.

Ovakwateli komesho vomandiki aa okulixumifa komesho aa ova pandula novaulika onghumwe yavo eshi va ninga ovanelao mokutofwa mo mokati ka vakwawo aveshe ovo vali va indila ekwafo. Ova udaneka tava ka longa noudiinini nokukwafela yo ovakwashiwana vakwawo.

Kansela waTsandi Junias Amunkete mokuyandja oilongifo okwa kumaida eengudu edi opo di shakeneke epangelo ondjilakati nokwe va kumika opo va longe noudiini vo va yandje yo oshihopaenenwa ku vakwawo ovo ina va mona omhito, opo vakale vena ehalo lokumona omakwafo, nde haku va tondifa. Okwa ti na va ulike kutya eshi, epangelo laNamibia la ninga oshafimana moku va yambidida.

“Kaleni momhepo imwe, tamu longo nohole, okulongela kumwe, paafaneni omayele nokutalela po ovo vena ounongo,” osho Amunkete a lombwele ovanaproyeka. Kansela okwe va kumaida vali opo vakale vena oukumwe neudafano moilonga yavo.
Tusnelde Nghilinganye okuli omuyandji wouyelele mombelewa yomauyelele mOutapi mOmusati.

LEAVE A REPLY

Please enter your comment!
Please enter your name here