Ta hepeke omwana

0
8515

Loide Jason

OSHIHAU – Omukiintu ena uulema konyala wolutu aluhe, okuli monkalo i yemateka, kaayi na uuyogoki, ha holekwa momeho gaakwashigwana, ye ishewe iimaliwa ye yopenzela mbyoka hayi zi kepangelo anuwa oha yi liwa po kuyina ngoka eli koWindhoek.

Otaku hokololwa Ndapandula Shetunyenga gomomukunda Oshihau mUukolonkadhi mOshitopolwa shaMusati ngoka ihi inyenge ye ishewe iha popi, ha pitithwa mo maandjwo omalupita, ha pitithwa mo owala ngele ta falwa koombelewa dhopenzela opo kuka kwashilipalekwe ngele oku na tuu shili omwenyo, nenge pamwe ngele ta ehama.

Yamwe yomaashiinda otaya hokolola yiihula Ndapanda nguka omanga ali okanona okashona kena owala oomvula ne.
Mongashingeyi Ndapanda okwa koka ena omimvo 27, ashike onkalo yomepya lyaandjawo nenge puuyanda wegumbo lyawo ke shi naana kutya oya fa peni. Anuwa ethimbo olindji oha kala ashike mokatala keli koshikololo shegumbo hoka ha uhala a lala owala egombe oshoka iha inyenge.

Olutu lwe ota lu etitha ohenda oshoka oshipa she, unene pomagundji, koonyala nosho wo koompadhi osha shituka ye ishewe okwa kaka noonkondo omolwa okuhedhaguka mevi.
Mpoka ha lala kehe esiku opuna ondambo shoka tashi ulike kutya omo ashike ha uhala omutenya aguhe mokatala moka na oha kuthwa mo ashike uuna taka lala kongulohi.

Kundana sho a thiki maandjawo yaNdapandula okwe mu adha megumbo naanona aashona taya tengenekwa yeli kohi yoomvula ndatu. Yinagona ngoka he mu sile oshimpwiyu okwa adhika eli kuukefe.

Ihe Ndapandula ngoka ihaapopi okwi itumbula newi ndyoka tali ti bluh bluh sigo Kundana tayi mpoka tapu zilile ewi. Okwe mu adha a zala okahulukweya moka a li i inyateka, tashi ulike kutya ina mona esiloshimpwiyu esiku ndyoka.
Nonande olyo ethimbo lyuutalala nguka okuna ashike ontulo yili kombanda ye okwa lala ashike pevi kaa puna etalashe.
Ota monika ha u hala ashike olutu kondje ena ashike okahulukweya hoka kolutu.

Otaku hokololwa kutya Ndapandula okwa valelwe ashike eli nawa ihe konima yomasiku gatatu omeho ge oga tameke taga ningi omashunga nuuvu owa koko sigo ota lemana.

Uuyelele mboka wa pewa Kundana kuyinagona yaNdapandula, owa ti nguka iha popi ye anuwa iha inyenge.
Ngele okwa lunduluka po pehala mpoka, omalupita ngele a tentekwa moshiyaha nenge uusiku sho taka lala. Nando omunuulema nguka oha taamba iimaliwa mbyoka hayi kwatwa kaantu ye na uulema, iimaliwa ye anuwa ohayi topolwa kuyina ngoka a kala koWindhoek ihaa longo.
Yinakulu ngoka ha kwata iimaliwa yaNdapanda mOwambo anuwa kehe komwedhi shampa oshimaliwa eshi omono, oha shi oshimpwiyu opo, iimaliwa mbika ayihe yoN$1100 eyi tume koWindhoek kuyina yaNdapanda. Yina yaNdapanda oheya pe po nee N$400 nethimbo limwe nokuli ohe ya tumine ko owala oN$200.

Ihe Helmi Shalimba yina yaShetunyenga okwa ti iimaliwa oha ti neyi tuminwe oshoka oye ha landa oothewa nomagadhi okuza koWindhoek ye ta tala ngele otaku zi omuntu uuka kOwambo opo eyi ya tumine.

Shalimba okwa pula kutya ngele omwana okwa tulwa petalashe nena iikando ingapi etalashe ndyoka tali shendjwa? Ihe yinagona ya Shetunyenga okwa ti ngele nguka ota vulu okukala a tulwa moshiyaha nena ota indile moshigwana opo a kwathelwe okatemba kaanamutimanhenda mboka taya vulu.

LEAVE A REPLY

Please enter your comment!
Please enter your name here