Ya pandula ekwatho lyaKundana

0
611

Loide Jason

ONGWEDIVA-Aakwashigwana mboka omahokololo gawo ga nyolwa kuKundana iiwike ya pita oya pandula oshifo shika sho sha lopota oonkalo dhawo sigo taya mono omakwatho oku za moshigwana.

Mboka yiinyenge momukuwathela mboka yeli mompumbwe oya kwatela mo ombelewa yaKansela gwaKatana Rosalia Shilenga, nEhangano lyoLorewo ndjoka lina oombelelwa mOshipangelo shEpangelo mOshakati. Omuniilonga gwoNew Era Publication Corporation Bianca Geingos pauyemwene naye wo okwa gandja oondongelwa dhiizalomwa kwaamboka yeli mompumbwe.

Mwaamboka ya pandula Kundana, omuna Maria Benyameni ngoka a li ha lala pevi noyana konima sho a tidhwa komuholike gwe.
Nguka okwali a mono omagano nomakwatho ogendji konima sho Kundana a shanga ehokololo tali etitha ohenda kombinga yonkalo moka a li pamwe noyana.

Kansela gwoshikandjohogololo Okatana Rosalia Shilenga naye okwa li a tokola opo wo a ye megongelo a ka kongele omukwashigwana gwe opo a ze mo muupyakadhi mboka a kala muwo konima yoku tidhwa komusamane gwe.

Benyameni ngoka a kala oomvula 14 nomuholike gwe ye omumwayinagona okwali a tidhwa mo megumbo lyawo eta kala ha lala mepya noyana yahamano nomutekulu gumwe.

Omolwa ehokololo ndika, oshigwana osha kwathele Benyameni moku mu tungila ondunda yiipeleki, ya tungwa mekwathelo lyaanambelewa yomoshikandjohogololo shaKatana.

Benyameni ngoka a li uuvite elago esiku ndyoka okwa lombwele Kundana kutya iitya otayi mu nyenge okutumbula unene tuu sho a piti muudhigu wokulala pevi pamwe nomwana iihumbata. Kansela Shilenga okwa ti onkalo ndjoka yokulala pevi oshinima sho nale, nonena moshikandjohogololo she itamu adhika we omuntu ha lala pevi pethimbo lyuutalala.

“Onkambadhala ndjoka twa ningi oya etitha opo nguka, a pewe oombete mbali, omatalashe, omakumbatha noyindji ya gwedha po,” osho Kansela Shilenga a koleke. Ashike Shilenga okwa takele Benyameni omunwe a ti nguka na putudhe uunona pa landulathano ete wu longo okwi ilongela wo wene opo kaa wu ki iyadhe monkalo ya fa mpaka monakuyiwa.

Okwe mu kumagidha wo kutya ondunda ndjoka ngashingeyi nayi ninge yaanona mboka taya yi kosikola opo ya kale yena omadhilaadhilo geli nawa yo ya wa pe okwiitula mo melongo.

Mukwawo ngoka a pandula Kundana oye omunuulema gwomimvo, 19 ngoka a valwa keena elaka ye ena esipa lyomugongo inaali kola nawa, momukunda Oshitumbe mUukolonkadhi moshitopolwa shaMusati sho woo a mono eyambidhidho lyokatemba .

Namupala Shinyenga ngoka oye omutekuli gwomutekulu Shivute Wilbard Shilongo okwa tile omutekulu gwe okwa kala ta hepa sho a kala ashike ti ipwedha nolutu oshoka kena okatemba.

Ihe ngashingeyi omutekulu gwe a mono okatemba, iikulya nomatalashe okuza komunamutimahenda gwedhina Esser Shilimela ngoka a li a gumwa konkundana ndjoka sho ya piti muKundana.

Shilongo okwa valwa keena elaka, shoka sha etitha a kale ihaa popi ye ishewe okwa valwa ena esipa lyomugongo inaa li kola nawa shoka sha etitha a kale ihaa vulu oku kuutumba. Shilimela okwa ti okwa li a gumwa konkalo ndjoka nokwa mono sha simana okukwathela. Shinyenga okwa li a nyanyukwa noonkondo noku pandula Kundana sho a tseyithile oshigwana onkalo yawo opo shi vule shi ya kwathele.
Okwa ti wo kena iitya nomatumbulo oku pandula aanamutimahenda mboka.

Mukwawo ngoka ta pandula Kundana oye Ndavulwowike Araw ngoka ngashingeyi naye a mona ekwatho lyokatemba.
Araw okuna oomvula 19 nomunuulema womagulu, elaka efupi, shoka sha etitha a kale wo ihaa popi. Nguka okuli wo muupyakadhi woluhepo oshoka iha kwata iimaliwa yaanuulema shika osha etithwa kuyina ngoka inaa hala okugandja oodokumende dhe opo omwana a mone uukwatya woshilongo ngaashi onzapo yevalo nokamutse.

Kansela Titus Kanyele gwoshikandjohogololo shaNesi okwa pandula Kundana sho a kundaneke opo aakwashigwana ye ya mone omakwatho. Okwa pandula woo Ehangano lyo Lorewo ndyoka lyi itumbu etali gandja okatemba komukwashigwana gwe ngoka nosho wo Shilimela.
Martin Simon ngoka oye a gandja okatemba hoka okwa ti haka okena ongushu yooN$4 800, na oyali ya gumwa kehokololo lya Arow ndyoka lya li moshifo.

Oya ti oya eta olukeno na oya tokola opo ya yambidhidhe nokatemba kamwe akeke.
Lorawo ehangano hali longo uutemba waantu mboka yena uulema unene wombunda nomagulu haya aadhika moshipangelo shaShakati.

LEAVE A REPLY

Please enter your comment!
Please enter your name here