Eteyo ewanawa etine mepya lyaLameck

0
871

Omunawino momakwatathano moshipundi shevululuko nomunafaalama mevi lyaayehe, Anne-Nora Lameck okwa mono ishewe eteyo ewanawa nuumvo. Shika oshikando oshitine epya lye tali mu pe eteyo ewanawa nonando omimvo dha piti oshilongo osha kala shina oluteni, ndoka lwa hepeka omagumbo ogendji nokudhipaga iimuna oyindji. Omudhindi gwoshifo Kundana Desie Heita okwa kundathana naLameck a uve kutya okwe shi ende ngiini opo a kale aluhe a teya iilya oyindji nonando okwa kala kuna omuloka omushona.

Desie Heita (DH): Owe shi ende ngiini okukala neteyo ewanawa omanga aanamapya yamwe ku wetike ya monithwa iihuna koluteni ndoka lwali ko?
Anne-Nora Lameck (ANL): Okulonga nuudhiginini oko haku eta eteyo ewanawa. Aaniilonga nenge etanga lyandje lyiilonga pOupili moshitopolwa Ohangwena moshikandjohogololo Okongo oyi itula mo na ohaya si oshimpwiyu kutya ngele ope na mpoka inaa pa mena nawa ohaya kunununa po , osho wo ohaya tsike iilya pomahala gamwe ngoka gaana iilya nawa.

DH: Oho longitha ethimbo lya yooloka kaanamapya ooyakweni opo wu mone eteyo ewanawa omanga aanamapya yalwe haya mono eteyo eshona?
ANL: Aluhe ohandi tameke ngele omvula yotango ya loko mu Desemba ndele shika itashi ti ohandi longitha ethimbo lya yooloka ku yakwetu. Onda hala andola ondina omboola yomeya okutekela iilya yandje uuna omvula ya tameke okuloka muDesemba opo iilya yandje yaa se komutenya..

DH: Omayele geni gopaunamapya osho wo omikalo dhini dhuunafaalama to vulu okutopola naanafaalama yalwe komikunda?
ANL: “Ngame omunafaalama gwonkulu yonale oshoka natango ohandi longitha oonani okupulula epya lyandje alihe. Ihe shoka tandi vulu okupukulula aanamapya ooyakwetu mboka haya longitha iimuna ooshoka kutya oyena okusila nawa oonani dhawo oshimpwiyu omanga okupulula inaaku tameka. Oyena okudhigongelela omaakashala osho wo iikakole yomatanga oku dhi kaleka monkalo ombwaanawa opo dhi vule okupulula. Otandi pe wo aanamapya mboka yaana iimuna kutya iikombo nenge oongombe, omayele opo ya kale haya toola omapumba giimuna pomahala gomanwino giimuna osho wo mpoka hadhi gondjo etaya lyateke omapya gawo. Onda kambadhala okupulula nembakumbaku ihe ihashi ende nawa oshoka mpoka pwa longwa kumbakumbaku ndele inapa mena nawa petameko ohapu kala puudhigu okukunununa oshoka iha pa mene we nawa konima yoku kunununwa. Otwa pumbwa okulonga nuudhiginini na inatu pumbwa okusa uunye ngele momapya getu omweya uupuka nenge ngele omvula oya mwena po manga kashona. Otwa pumbwa okukala tatu tala nawa omapya getu noku mona kutya openi pe na iilya itaa yi koko nawa noku tala kutya otatu ningi po ngiini.Otwa pumbwa wo okuya pamwe nokulongathana kombinga yokulonga omapya getu.Eshongo nenge uupyakadhi oombuka kutya uuna omuntu ho longo nawa, otu na egamo lyoku tila omuntu ngoka onkene ihatu yi ko tu ka pule omayele. Ngame otandi kala ndi ilongekidha oku taamba omayele nomathaneko okuza kaanamapya ooyakwetu na ondi ilongekidha wo okugandja omayele gandje kwaamboka ye ga pumbwa na oya hala oku uva kutya oshike naanaa ye na okuninga.

DH: Tulombwela kombinga yuunene wepya lyoye osho wo iimeno mbyoka ho kunu noku teya mo?
ANL: Epya ndika inali yelekwa natango kutya oli na uunene wu thike peni, ihe olili ngaa lwopoo hektala 20. Iilya mbyoka hayi kunwa nokutewa mulyo ongaashi omahangu, omushokolo nenge iilyalyaka , omatanga ga yooloka, omakunde, oofukwa, noondjupa. Onda dhiladhila wo okugwedhela ko kepya lyandje nohektala yimwe, unene tuu sho ngashingeyi tandi kala pegumbo ethimbo alihe. Otatu tegelele tu tale kutya oshike tashi ningwa po omumvo tu uka.

DH: Opena etompelo lyontumba kutya omolwashike wa hogolola okukuna iimeno mbika mepya lyoye?
ANL: Mbika oyo iimeno mbyoka ndi igilila yo ishewe oyo mbyoka twa kala hatu kunu pamuthigululwakalo gwetu. Ishewe ngame ondi na ontseyo nawa oku yi longa okuyeleka nashilwe shi ili. Meme okwe tu longa twaa kanithe omuthigululwakalo gwetu noshikwawo okwe tu lombwela aluhe tu longe nuudhiginini. Omatumbulo ge ngaka ogeli aluhe momakutsi gandje onkene inandi hala oku mu uvitha na yi mpoka e li ngashingeyi. Otatu kala aluhe noku eta po elunduluko momukalo gwetu gwokulonga noku ilongekidhila nawa omumvo tagu landula . Omuntu ito tseya kutya iilya mbyoka wa teya nenge twa kunu otayi ka mona aalandi pondje yoshilongo.

DH: Omimvo ne dha piti owa kala to mono eteyo lili nawa. Oho li longitha shike? Nenge alihe ohali liwa po ashike nenge pamwe oho landitha limwe?
ANL: Eeno, Kalunga omunene na ohandi mu pandula nokumusimaneka esiku kehe. Pokuteya omumvo kehe, ohandi ithana aashiinda yandje naayehe mboka ya kwathele pethimbo lyeteyo opo ye ye kOshipe, kokutya koshituthi shoku pandula. Omahangu gamwe ohandi ga landitha kwaamboka ye ga pumbwa ngoka ga hupu po ogetu gokulya na ohandi gandja po gamwe kwaamboka ndi wete ya pumbwa okukwathwa. Otuli moshigwana mokwa tu na okukwatha noku yambidhidhathana mpoka tatu vulu. Nongashingeyi shono tandi kala aluhe pegumbo otandi ka konga omahala mpoka tandi landitha iilikolomwa yandje na otandi longo wo oshindji opo ndi vule okulanditha.

DH: Egumbo lyoye pOupili owe li tungu po uunake? Naashi wa thiki pehala mpoka owali wu shi kutya epya, nevi ndika olyo eyamba miikulya yiimeno na otali ke ku pa eteyo ewanawa?
ANL: Mpaka ondeya po nale pethimbo ndali ndina omimvo dhili lwopo 40[ta yolo mo] sho nda dhike egumbo lyandje na ka nda li ndi itaala kutya otali ka huma nawa komeho ngaashi lili nena. Onda li nookuli konyala ndi li landithe po sho iinima ya li itaa yi ende nawa, oshoka onda li natango omugundjuka nonda dhiladhila kutya inandi pumbwa onkalo yokomukunda. Ihe otandi pandula kuume kandje Mee Ndamona Ndeulita ngoka a pukulula nokulonga ndje kombinga yonakuyiwa. Sigo onena otandi mu pandula omolwomayele ge omawanawa.

LEAVE A REPLY

Please enter your comment!
Please enter your name here