Moshitila Mwa Z’Ondjupa: Okuya kwandje kuuhwi oshikando shandje shotango

0
244

Ngame sho nda thigi po osikola onda ningi omakwatathano nooyakwetu, opo ndi ye kuushimba. Tango onda li ndi ithanwa komumwameme Andreas yiIndongo kOshomeya ndi ka longe mokombitha. Sho nde ya mOshaanda ye shilumbu ota ti : “ Man, ngwee oto hi keefaalama”.

Ngame onda tindi oku ka longa koofaalama, onkene onda ningi etokolo nkene ndi na okuhenuka koku ka longa koofaalama.Moshaanda omo aantu haa tsakanene, mboka taa yi kiilonga naamboka taya galuka ko.Ondi indile ooR3,00[ano ooN$3.00], komusamane gumwe Rehabeam yaShetunyenga a adhika ta zi kOlange u uka kegumbo kOwambo , opo ndi fute epogolo lyandje lyokutinda kiilonga, oshoka aantu oya li haa futithwa. Omusamane Rehabeam okwa pe ndje ooR3,00 [ano ooN$3,00] nonda futu, e tandi shuna kegumbo.

Sho nda galukile kegumbo, onda lala ko owala esiku limwe, ngame otandi galukile kOndangwa nokuzala okaholo kokOliindili koku ka longa miilonga yoohi. Okaholo hano hangame nda li nde ka zala lela mwene, ihe onda li nde ka simokolelwa komumati gumwe gwedhina lye Longinus yaAbraham, ngoka a li ha longo, oshoka pethimbo ndiyaka onda li okamati okashona.

Longinus okwa li omumati omukuluntu kungame, okwa zala owala okaholo ye ote ka kutha mo mothingo ye, ye ote ka mangele mothingo yandje. Sho Longinus a zaleke ndje okaholo, onda yi mwene kiilonga nda tetekele, manga ye a thigala mOwambo.

Shaashi Longinus okwa li e na ombapila, osha li oshipu kuye okushuna kiilonga. Aantu mba aakulu okulonga kuushimba oyo ya li hayi ithanwa tango e taa yi, opo ihe taku tiwa komwaalu gwawo naku gwedhwe yamwe aape, ngele opu na ompumbwe ndjoka. Aantu mboka aape oya li haa konakonwa kundohotola ta tala mba aakuluntu, osho wo uukolele wawo.

Omutegami gwomutete ngele okwa monika e na okalutu okashona, iha ethelwa ko kuushimba.Aamentu mba aakululuntu oyo nduno haya yi mo momutete taya zalekwa uuholo, yo taye wu tu zaleke.

Aakwambi oyendji mba ya li haa yi kOmbaye nokOlange, oya zalekelwe owala uuholo kooyakwawo.

Sho nda zala okaholo, tse otatu yi kOshaanda, pamwe nayakwetu mboka wo ya zala uuholo. Sho twa thiki mOshaanda, tse otatu lombwelwa kutya aantu inaya halika ko we kOliindili, onkene ongundu ndjoka yaaniilonga, nangame nda kwatelwa mo, oya tuminwa kOmbaye oko yi ka longe. Haku tiwa uumbudhi ihawu yothwa ohawu nika, aaye-e mboka wandje wokuzala okaholo ka yakwa inawu nika nando. Mokukala kwandje ohandi shi ipula ngaa kutya , ando owa nikile tuu, sikulimwe andola onkala oya hadha. Kiilonga yokOmbaye hoka nda yi onda kala handi ithanwa Longinus, noombapila dhandje adhihe odha li dha nyolwa Longinus Abraham.

LEAVE A REPLY

Please enter your comment!
Please enter your name here