Natu gwaneni naa shoka tu na

0
104

Moshifonkundana shetu oshiwike shika omwa li etumwalaka inaali opali nenge lya nyolwa komuntu ngiika ta shendjula. Mundika omunyoli okwa thaneke kutya omakwatho goshikukuta inaga kuthwa po, unene tuu kaantu mboka yeli komikunda, yo ya mona eteyo ewanawa. Okwa tsikile ta gandja edhiladhilo kutya ngashingeyi oshigwana osha mona iipalutha molupe lwomahangu onkene andola shoka shina okuningwa ooshika kutya omakwatho guusila naga hulithwe po okugandjwa yo mboka haya pewa oshikukuta taya pewa nee omweelelo, oshoka nguka ogwo gwa pumba ngashingeyi ya vule ya pitithe iithima yawo pothingo.

Okwa ti ando epangelo nali gandje nee iinima ngaashi oondooha dhoohi , dhonyama nenge omagadhi gokulya.
Etumwalaka otashi vulika omashendjo ndele nee osha simana oku tala oshikalimo shalyo muule. Namibia okwa ningi omimvo itaa mono eteyo lili nawa molwa oshikukuta onkene ngashingeyi sho kwa monika eteyo lili nawa, mboka ya mono ndyoka ina ya pumbwa okukala yi ihole sho ya hala okupewa iikulya yoshikukuta natango.Opena natango omagumbo gamwe ngoka ge li lela mompumbwe yoku hawalekwa iikulya yoshikukuta sigo oompaka onkene mbaka oyo ayeke ya pumbwa okukwathelwa ngashingeyi.

Nando shika oshiyemateki , kashishi oshipe oshoka opwa kala nale yalwe mboka haya pewa oshikukuta nonando dhoshili yo inaye shi pumbwa naanaa, okuyeleka naamboka shili haye shi pumbwa. Yo mbaka ohaya pumbwa noondya dhodhene dhoshikukuta lela.

Oshinima shotango ooshika kutya opolohalama yoku gandja iikulya koshigwana pethimbo lyoshikukuta oya nuninwa okukwatha omagumbo ngoka geli moluhepo. Opolohalama ndjika oyo onkambadhala yoku kondjitha oluhepo tayi endele pamwe naandhoka dhoku eta po oompito dhiilonga mokati kaagundjuka naandhoka tadhi etapo oompito dhoku imonena iiyemo mokati kaakwashigwana nelalakano lyoku eta po uuthike pamwe moshigwana paliko. Opolohalama inayi nuninwa okukala ya tsikila okupalutha aantu mokulundulula shoka hashi pewa aantu kokutya andola sho ngashingeyi ye na omahangu inaya pewa we uusila ndele naya pewe onyama ndjoka yaana, hasho ndjika yi na oku talika ko ngaaka.

Eeno elalakano enene lyopolohalama ndjika okukondjitha ondjala ndjoka yili mokati kaantu unene tuu maanona aashona mboka yeli momagumbo ga hepa.

Ndele nee etompelo oondika kutya omagumbo ngoka ga mono eteyo ewanawa okuyeleka naangoka inaaga mona sha molwa oluteni ndoka lwe ga dhenga, ngaka itaga vulu we okutiwa go oga hepa.

Ngele aaNamibia otwa tameke okugwanenwa kwaashoka tu na nena otatu gandja ompito opo mboka ye li mompumbwe yokukwathelwa ya vule okukwathwa naashika otashi ka fala mpoka kutya oshilongo otashi kala naantu ayehe ye na iipalutha no ka pu na ngoka ta ka sa kondjala.

LEAVE A REPLY

Please enter your comment!
Please enter your name here