Okwaana omagulu ita ku mwiimbi okuya kenongelo

0
730

Maria Namupala

OKAHANYA -Loide Nelago okwi itaala kutya okulumba nuulema itaku mwi imbi okulonga nenge okuya kenongelo. Omunamimvo 13 nguka oye omulongwa posikola yopevi pOkahanya moshikandjohogololo Onyaanya na ota ti uulema mboka ta lumbu nawo itawu thikama oondjodhi dhe moshipala.

Oshiwike sha yi Kundana okwali a mono ompito okutalela po Loide posikola yawo pOkahanya nokutala nkene ta humu komeho nelongo lye. Pethimbo ndika Nelago okuli mondondo ontihamano na okwa ti ote shi enditha nawa meilongo lye.
Omukadhona nguka okwa valwa keena omagulu, nolundji ohi inyenge ta ende ti ikoko nenge ta kookaya.

Loide mwene okwa holola kutya nonande kena omagulu itashi mwiimbi okuya kenongelo osho wo okudhana nuunona uukwawo nokulonga iilonga kehe ta vulu, olundji oha kala ta longo iilonga yomegumbo nooyakwawo, nomizalo dhe dhosikola ohedhi yogo ye mwene.

Omukadhona nguka nande ta monika keena omagulu, nokoshikaha she shokolumoho okuna owala ominwe ndatu, ihi ikwata shampa wa adha pu na shoka sha pumbiwa oha tumwa ete ende ti ikoko a ka tale shoka a tumwa komukuluntu.

Otwa li wo twa yi moonkundathana naangoka ta kwathele uukuluntuskola pOkahanya Gideon Shikomba, ngoka holola kutya Loide omulongwa omwiinekelwa noti ilongo nawa. Ta ti oya pandula woo yina molwaashoka kehe esiku oha si oshimpwiyu emu thikithe kenongelo ye eendele pamwe naalongwa ooyakwawo.

Esiku kehe Loide oye ha thikipo tango posikola, nolundji ngele ta pulwa oha ti ye keshi oshilema okeehena owala omagulu, kakele ota vulu okuninga shoka aantu ayehe taya vulu okuninga.

Omolwa onkalo yefululu nevugu mondjila yokuya kosikola okatemba hoka a pewa koshipangelo itaka vulu okumuthikitha kosikola nuupu. Onkene yina oye owala hemu eta nokumwiila ko kosikola ethimbo alihe.

“Posikola yetu opuna ashike sigo ondondo onti-7, nokwa pumbwa a monenwe osikola yina omuhandjo mono ta kala ta silwa oshimpwiyu, otatu pula nee moshigwana kaasamaliwa aanamutimahenda na kehe ngoka ta vulu okuyambidhidha omunona nguka a kale eshi ninga, ye a tsikile nelongo lye molwaashoka oti ilongo nawa,” Shikomba ta ti.

Loide oha silwa oshimpwiyu kuyina Ruusa Nembungu ngoka oye he mu fala kenongelo esiku kehe. Nembungu okwa ti omwana ke na omagulu ashike shika itashi ya imbi ya ye komeho noondjodhi dhawo.

“Onda pandula Kalunga kandje sho a pendje omagano gandje, aantu yamwe oyena uunona ihaa wu vulu nokwiinyenga wo ihawu popi ashike ndyono ehalo lya Kalunga ye mwene,” Nembungu osho apandula Kalunga.

“He ya Loide, nenge tuli momukunda gumwe ihatu mu mono, ye iha kwatha omwana sha, ohatu kondjitha owala noshimaliwa shoka ha mono okuza kepangelo nonande itashi tu gwanithile po oompumbwe dhetu atuhe megumbo,” Nembungu a ti ngaaka.

Yina okwa ti Loide okuna eshongo enene lyokulanda omuzalo gosikola niikwathitho omwedhi kehe, oshoka ngele ti ikoko eli kenongelo ohulukweya ye ohayi kala ya tonywa opo kee ehamekwe mpoka pwa hulila oontumba dhomagulu.

LEAVE A REPLY

Please enter your comment!
Please enter your name here