Omalenga gamwe gaNdonga ga tidhililwa Akawa oye awike a shunwa muuwiliki

0
897

Komutoolinkundana

WINDHOEK-Omupopiliko omupe gwOmukwaniilwa gwaNdonga nelenga enene lyoshikandjo shuulenga shaNiimwandi, Naema Amalwa okwa tseyitha kutya omalenga ngoka ga li ga tulwa manga pevi, gamwe oga kuthwa mo thilu muulenga oku za ngashingeyi.

Momushangwa ngoka gwa tuminwa iikundaneki Etitatu oshiwike shika Amalwa okwa ti popi kutya ye okwa indilwa a kale omupopiliko gwelelo kOmukwaniilwa Immanuel Kauluma Elifas.

Momukanda ogo tuu ngoka okwa tseyitha omalenga ngoka ga li ga tulwa pevi manga taga konakonwa molwa omaihumbato ga go gaali nawa, oga li ga ithanwa kiihokolola konima yomakonakono opo ga mone ompito gi ipopile. Ihe ogendji anuwa inaga holoka kakele kelenga Josef Akawa olyo alike lya holoka noku gandja ombinga yalyo yehokololo moshinima shika.

Omalenga ngoka inaaga holoka opo gi ipopile oga kwatela mo Peter Shimweetheleni, John Walenga, Vilho Kamanya, Kashona Malulu, Joseph Asino,Tonata Ngulu na Fillemon Nambili.

Omushangwa ogwa ti omalenga ngaka oga li ga tseyithilwa iizemo yomakonakono, ngoka ga li ga kwatelwa komeho kokangundukonakoni ki ithikamena, na oga pelwe ompito oku ipopila kwaashoka sha monika mekonakon, ndele inaga holoka. Omapulakeno ngoka oga ningwa nonando omalenga ngoka inaga holoka kakele ashike ka Josef Akawa oye a li holoka keithano.

Sha landula okwaa holoka kwomalenga ngoka komapulakeno Omukwaniilwa Immanuel Kauluma Elifas okwa tidhilile omalenga ngoka inaa ga holoka koku pulakenwa. Omushangwa ogwa tsikile gwa ti Omukwaniilwa okwe ga pingenepo wo naawiliki aape yopamuthigululwakalo. Mbaka oyo, Erastus Mvula na Paavo Amwele taya wilike oshikandjo Ondangwa ndjoka ya li mewiliko lya John Walenga, Rainhold Nepolo ta wilike Oniiwe ndjoka ya li mewiliko lya Josef Asino,Naeman Fillemon Kambala ota wilike Amuteya ngoka a li mewiliko lyaVilho Kamanya, ye Nepando lyaAmupanda ota wilike Ongula ya Netanga ndjoka ya li mewiliko lya Peter Shimweetheleni. Nepando ota kala wo natango amushanga gwElelo lyopahedhi lyAandonga ta kwathele sigo uuna ndoka pwa gandjwa esteyitho lilwe osho omushangwa gwa popi.

Ogwa tsikile wo gwa ti aawiliki yalwe yopahedhi mboka inaaya tumbulwa mugo, kutya oya kuthwa mewiliko ogwa ti mbaka otaya tsikile niilonga yawo ngaashi shito.

Omalenga ngoka ga kuthililwa muulenga oga lundilwa kutya oga ihumbata nayi momeho gOmukwaniilwa, no ina ga vulika kuye mokati kiinima mbyoka omushangwa gwati ogwe ga tidhitha. – Lesha Kundana oshiwike tashi ya wu uve oshikalimo ashihe kombinga yoshikalimo shomushangwa ngoka.

LEAVE A REPLY

Please enter your comment!
Please enter your name here