Omukulupe ta hepekwa koyana

0
6083

Loide Jason

OSHIPUTU-Omukulupe gwomimvo 86 okwa tameke okuhila omakaya gOshiwambo ngoka haga kunwa molwongeyo sho ta tala omundilo omanga iimaliwa ye yopenzela mbyoka ha kwata yi niwe komwana gwosheeli.

Omukulupe Natalia Sheendelwako, ngoka ta ti ita dhimbulukwa kutya uunake a landelwa omagadhi gokugwaya, okwa popi ndhika kuKundana metiyali lyoshiwike shika okuzilila pegumbo lye pOshiputu, moshikandjohogololo shAnamulenge moshitopolwa shaMusati.

Sheendelwako ngoka a adhika kuKundana a toka afa a gwaya omutoko, naatekulu ye ya lala ya sa ondjala, okwa ti ye okwa hala kansela a ye mo olunyala moshinima shika opo a kwathele oku lundulula mo omwana ngoka mokumukwatela. Okwa hokololwa wo kutya anuwa ngele Sheendelwako okwa tumu ko aatekulu ye komwana hoka ya ka tale oshimaliwa shuusila nena okwa yona po ombili ngaaka. “Oshili shili omuntu oto lala wa tala omundilo wafa ihoo kwata iimaliwa yopenzela?” a pula ngaaka ye a kengeleka omahodhi. Okwa tsikileko kutya anuwa sho ta pula omwana ngoka Naemi Alweendo oshimaliwa sho kulongitha epya ye anuwa ota ti kutya okwa hala a limine shike ye a kulupa.

Shoka ta ti kasha li mondjila oshoka ngashingeyi oha lala a tala omundilo ha pewa ashike okakulya kaashiinda ngele a tumu ko uunona.
Ihe ngashingeyi iikulya ye oya ninga nduno ekaya, ndyoka ha hili lyafa okasekeleta, nenge anuwa omeya nomongwa nokathima ngele a pewa iilya kaashiinda.

Sho Kundana a thiki megumbo moka okwa adha Sheendelwako a kuutumba ta hili ekaya ndyoka, omanga aatekulu ye ya lala kohi yoshitala shoka ngashingeyi tashi monika kashina omunzile.

Gumwe gwomaatekulu ya Sheendelwako okuna uulema wo kwaana ewi ano ihaa popi ye iha ende omanga gumwe oye eli nawa. Ihe omukulupe nguka okwa ti yaali yomaatekulu ye mboka oothigwa, Kundana okwa adha ya ya kosikola. Shoka tashi yemateke ooshoka kutya, naanona mboka taya yi kosikola ohaya yi kosikola iinaya lya sha, shoka omukulupe ta ti otashi vulika shi ka ye eilongo lyaatekulu ye moshipala.

Sheendelwako okwa vala aanona yahamano, yaali yomuyo oya mana oondjenda nale, omanga yane oyeli momwenyo, ndele ihaya ende po puyina.

Ashike omukulupe nguka okuli nduno nomwana ngoka onkelo ye, ngu oye wo yina yuunona mboka wa adhika megumbo wa toka wafa wa gwaya omutoko.

Shika nasho okwa ti otashi mweehameke komwenyo na ngashingeyi nokuli okwa lulilwa unene ngaa sho keena omagadhi noothewa noshowo iikulya.

Ihe Kansela gwAnamulenge Werner Kalipi okwa ti kutya okuna okuya moonkundathana naAlweendo opo ya kandule po omukundu nguka mbala ngaashi tashi vulika.

Kansela oye tuu ngoka okwa kumagidha wo mboka taya hepeke iimaliwa yuunona noshowo yaakulupe ye yi kwate ngaashi shi na oku kala.
Okwa gandja wo oshako yookilohalam 50 yiilya yomahangu nosho wo omatanga gaali opo mbaka yi ipaluthe nayo pokathimbo.
Ayehe mbaka ohaya lala ashike mondunda yimwe moka omo muna oombete mbali kaadhina omatalashe .

LEAVE A REPLY

Please enter your comment!
Please enter your name here