Oonkundana pafupi oshiwike shika

0
309

Mbumba okwa ti ngeyi ku nakusa Pretorius

Amushangandjayi goSwapo Nangolo Mbumba okwa ti shoka omunapolitika nakusa Jacobus Willem Kosie Pretorius a longa menyolo lyekotampango lya Namibia osha simana. Nakusa Pretorius ngoka a li oshilyo shOmutumba gwOpashigwana nokwa ethele po opolitika momumvo 2013, okwa mana oondjenda Etitano lya yi moWalvis Bay. Okwa li ena omimvo 81. “Nonando otwa li nomakankameno gayooloka osho wo uunapolitika inaa wu faathana, omalalakano nomategameno getu kombinga yoshilongo shetu ogali gafaathana. Ngaka ogo okutunga nokuhumitha komeho Namibia li li nawa kutse atuhe” Mbumba osho a ti. Eso lye olyo ekanitho enene kaaNamibia ayehe” Mbumba a ti. Pethimbo a li mopolitika Pretorius okwa li oshilyo shoshigongi oshinyoli shekotampango no ye gumwe gwaamboka ya koleke ndyoka. Konima okwa tsikile ongoshilyo shOshigongi shOpashigwana okuza mo 1990 -2005. Okwa li a kalela po ongundu yo Action Christian National sigo oosho ndjika ya lundulukile mo Monitor Action Group (MAG). Okwa kala omutotimpango a kalela po MAG iikando iyali.
Omahogololo moshitopolwa Omusati

Omusati ogwa koleke Omenendja yoNBC Radio mOshiwambo Helena Shiimbi, onga yimwe yomokandidate dhoSwapo pokongressa yongundu ndjoka nuumvo.

Shiimbi nookandidate ndatu mwakwatelwa Gavena gwOmusati Erginus Endjala, oya li ya hogololwa pethimbo lyoshigongi shopashitopolwa shongundu pOutapi Olyomakaya ga yi. Shiimbi okwa li wo ponomola ontiyali melandulathano lyiilyo yoSwapo Party Elders Council oshiwike sha zile ko, nokwa li gwotango poshigongi shomodistrika. Oshigongi osha koleke wo Sacky Kayone oye a kale Omukwatakanithi gwoSwapo mOmusati. Amushanga gwomauyelele nesikumudho, Senia Uushona, okwa shuninwa oshinakugwanithwa shoka ye a kala ta gwanitha po oomwedhi hamano dha piti. Aaulikwa mboka taya ka ninga iilyo yongundumutima goSwapo okuza kOmusati oyo Gerhard Shiimi omuleli gwoshikandjo Elim nOmukwatakanithi nale moshitopolwa Rachel Shoopala. Kayone okwa ti omahogololo oga li nawa nomemanguluko niinima ayihe oya longwa pamautho gekotampango lyongundu. Oshigongi shoka osha hogolola aakalelipo omulongo mboka ta ya yi kokongressa yongundu muNovemba nuumvo.

Nafinu ta fala aawiliki yoSME Bank kohofa

Namibia Financial Institutions Union (Nafinu) okwa tameka omalongekidho gokufala aawiliki nale yoSME Bank kohofa. Oshipotha shoka tashi longekidhwa kuNafinu ohashi ithanwa oshipotha tashi etwa kongundu yaantu mboka ya ningwa nayi koshinima shika. Omalongekidho ngaka oga ningwa konima sho kwa tseyithwa oshiwike sha zi ko kutya aaniilonga ayehe 208 haya longele SME Bank oya kanitha iilonga. Shika osha ningwa sho aanambelewa mboka ye na oshinakugwanithwa shokutopola po omaliko gombaanga ndjika ya hulithapo iilonga yaaniilonga mbaka. Aatopoli yomaliko ngoka ga li goSME Bank, Bruni & McLaren oya tseyithile aaniilonga yombaanga ndjika kutya iilonga yawo otayi hulile mesiku lyahugunina lyaJuli nuumvo. Okwa kundanekwa wo kutya oohahende dha kalelapo Ominista mOmbelewa yOmupresidente Frans Kapofi na Amushanga gwoKabinete George Simataa oya pula amushanga gwa kwaalukehe gwaNafinu Asnath Zamuee, eya pe ombili shoka a popi kutya yo anuwa oyi ikuthile iimaliwa mombaanga yoSME ndjoka tayi halakanithwa po pethimbo ndika. Zamuee otaku hokololwa anuwa a hatuka oohapu ndhika pethimbo a li a kwatela komeho ehololo lyomadhiladhilo lyaaniilonga yombaanga ndjoka oshiwike sha yi. Oohahende Sisa Namandje & Co okwa hokololwa ya nyolele Zamuee taya pula nguka a gandje ombili yaana eipopilo lya sha miipathi yoshigwana kombinga yomupopyo gwe ngoka gwa luudhike aanambelewa mbaka yaali yepangelo. Zamuee okwa lombwele iikundaneki kutya: “Ngame itandi ka hepeka ethimbo lyandje noshinima shoka.Shoka ndi ipyakidhila nasho pethimbo ndika osho uuthemba waaniilonga” Okwa ti okwi ipyakidhila nuuwanawa waaniilonga 208 mboka ya kanitha iilonga yawo pombaanga ndjoka pehala lyoku gandja ombili kaanambelewa mboka yaali.

LEAVE A REPLY

Please enter your comment!
Please enter your name here