Ovalandifi vomalodu, va indilwa veliufe keeveta

0
47

Tuulikki Abraham

Lüderitz-Ovalandifi vomalodu moLuderitz ova faneka ngeno elelo loshilando shavo li tunge po onhele imwe opo tapa kala ebaa adishe .
Efaneko eli ola yandjwa pefimbo loshoongalele moshilando eshi sha ningilwe oshivike sha dja ko opo ovakwatelikomesho moLuderitz pamwe nopolifi va ufanene ovanangeshefa vomalodu okuva dimbulukifa oinakuwanifwa yavo.

Oshilyo shoShebeen Association moLuderitz osha yandja efaneko lonhele yeeba sha ti , ngeenge edi odili ponhele imwe nena eshi otashi ka kandula po omukundu weendingosho domalodu da kupikwa komaumbo .

Pefimbo loshoongalele osho ovalandifi vomalodu ova indilwa va landule omilandu oyo ya tulwa po ina sha noku landifa omalodu.
Momutumba oo wali wa unganekwa kombelewa yaKansela woshikandjohoololwa sha !Nami#nus, wa ningilwa moshoto shaBenguela owa ningwa nelalakano, okuyandja ouyelele tau pumbiwa, ngee tashi uya koveta yokulandifa omalodu moshilongo. Oovene veendingosho moLüderitz ovali va ongala momwaalu muhapu. Meya waLüderitz, Hilaria Mukapuli, Kansela woshikandjohoololwa sha !Nami#nus Jan Scholtz, Omunambelewa omukulunhupitifi melelo lodoolopa ya Lüderitz Aunie Gideon, oshoyo omukulunhu wopolifi mo Lüderitz Omukonakoni Omukulunhu Paulus Hamupolo, ovali momutumba ou, noku va pa ouyelele, wa nghene kuna okulandulwa omilandu, nokuliufwa keeveta odo da tulwa po, ngee tashi ya koveta yokulandifa omalodu.

Momutumba omo tuu omo Hamupolo okwa yandja olopota, kombinga ye longifo nai lomalodu, oshoyo okuheli ufa keeveta odo da tulwa po.
Olopota oyo a yandja oya hovela muJanuali 2017 fiyo okonena, ta tumbula kutya, ovanhu vatanho ova handukilwa eshi va hangika vanwa omalodu sha pitilila, ndele ta veli humbata nai, nova futifwa eeN$1000,00 keshe umwe.

Ovanhu vaheyali, ovafutifwa eeN$1000.00 keshe umwe eshi va hangika tava nhu omalodu, momapandavanda.
Vanhe ova pewa ofuto yeeN$4000, 00 keshe umwe eshi va hangika tava landifa omalodu, vehena oufemba.
Ovanhu vavali ova handukilwa nokufutifwa eeN$2000,00 keshe umwe eshi vali tava landifa omalodu, konima yeevili dokupata okulandifa omalodu.

Omukulunhu wopolifi ta yandje olopota kutya, ovanhu vaheyali okudja muJanuali neudo fiyo onena ova kwatwa po nokuditikwa eshi va hangika tava shingi va kolwa.

Omukulunhu wopolifi okwa popya yoo kutya, okwa didilikwa, ounona ovo vepupi lopokati, hava kala tava enda enda unene keevili dokonguloshi, tava ende okudja kodoolopa nokuya komalukanda a yooloka, ashike okwa didilikwa ovanyasha ava hava kala va kolwa.
Andreas Nangula, oshilyo shehangano lo Shebeen Association mo Lüderitz, okwa pandula unene eshi ovaleli moshikandjohoololwa veuya pamwe, tava yandje omauyelele, nomilandu adishe odo di na okulandulwa, opo omunhu a dule okumona oufemba wokulandifa omalodu.

Nangula okwa indila omukalo ou, ukale hau ningwa alushe, ngeenge tapa monika eemhito. Okwa faneka yo ngeenge otashi shiiva opo ngeno obaa adishe di kongelwe onhele imwe opo tadi kala noku landifa omalodu ponhele, ya dimwe di kale pomaumbo molukanda.

LEAVE A REPLY

Please enter your comment!
Please enter your name here