Shaningua a indile ondjungu megandjo lyevi miilando

0
48
OUTJO, 07 July 2017 - Minister of Urban and Rural Development Sophia Shaningwa speaks at a fundraising gala dinner for the 2017 Outjo Tourism and Trade Expo. (Photo by: Mulisa Simiyasa) NAMPA

Oshi shiwike nawa kutya omalelo giilando moNamibia oga taalelwa komashongo ogendji. Gamwe oga kwatela mo ompumbwe yoshimaliwa, aaniilonga yena ontseyo inaa ya gwana, okwaahena evi lya tulwa omayakulo gopamuni, ompumbwe yomeya gokunwa, eyogopalo, omagumbo, okwaana iilonga, iilonga yomiyonena nosho wo omutungilo gopalelo.

Oshilandopangelo oWindhoek nasho osha palamenwa komashongo ngaka, nuupyakadhi washo owa fa nookuli uunene, she etwa keendelelo metembu lyaantu okuza komikunda yu uka koondoolopa. Omatembu ngaka okuza komikunda olya geyekwa konkalo ndjoka ye etwa keinaipalo lyomahupilo muuyuni auhe , ndyoka lya gumu wo Namibia.

Ngame ondi shi shi wo oomeme notate kutya oWindhoek molwashoka oyo oshilando oshinene, ohayi hili mboka taya tembuka, okukonga uuhupilo opo ya opaleke oonkalamwenyo dhawo moku mona iilonga muka osho wo okukala taya vulu okuthika mbala komayakulo omahwepo gopaundjolowele, elongo lili nawa osho wo omayakulo galwe gopankalathano. Einyengo ndika lyaantu taya tembuka komikunda okuya koshilandopangelo olye etele aawiliki yoshilando iilonga moku dhiladhila shoka tashi ningwa po, shika otashi holoka noku ndhindhilikwa kenenepalo lyomagumbo giipeleki niitungitho yilwe ngoka taga indjipala esiku kehe momudhingoloko gwoshilongo.

Nonando otandi koleke kutya ewiliko lyoshilando olya kambadhala okukandula po omashongo ngaka, ondi wete kutya oshindji osha pumbwa okulongwa natango.

Moshinima shika ombelewa yandje oya taamba omanyenyeto ogendji kombinga yokulonga kwaana uuyuki naakwashigwana yamwe. Mbaka oya lundile aanambelewa yaMuni kutya ihaye ya yakula nawa. Yo mbaka oya kwatelamo aakalimo, aayakulwa osho wo aapunguli mboka yena ehalo okuhumitha komeho omahala mpoka tapa vulu okutungwa. Omaihumbato ngaka, Minista Shaningwa okwa ti otaga ehameke elalakano lyewiliko lili nawa.

Onkene mboka yu uvithwa nayi koshinima shika ohaya matukile kungame neinekelo kutya otaku ya zile uuyuki.
Onda koneke wo kutya aanambelewa melelo ndika ohaya ningi omatokolo kuyo yene no inaaya pula omayele kewiliko lyoshilando, noshinima shika ka shi li nawa nando no itashi uvitha nawa na otashi nayipike nokudhinitha oonkondo osho wo omutalelo gwaawiliki yoshilando na otashi vulu okufalitha ndika kiipotha yomoohofa inaayi pumbiwa.

Ne ooMeya nosho wo ookansela dhoondolopa onga aawiliki yopapolitika omwa pumbwa oku kala mewiliko noku mona kutya iilonga ayihe otayi longwa nawa , ya yela , ku shiwike mboka ye na oshinakugwanithwa osho wo ewiliko eyuki.
Oshinima oshikwawo nda koneke ooshika kutya otapu ningwa omalunduluko momutungilo gwiilonga moka ta mu inyengithwa aanambelewa miilonga yoshilando oWindhoek .

Otandi zimine kutya shika otashi ningwa nelalakano ewanawa notali vulu oku eta iizemo iiwanawa mehangano. Ndele nee oshinima shika osha pumbwa okuningwa kohi yomautho noompango dho Republika ya Namibia osho wo meni lyoonzo dhopashimaliwa ndhoka dhi li po. Omalundululo ngaka inaga longithwa nayi okunyanyudha ookume naatondi, ndele naga ningwe puuyelele, nawa nopauyuki.

Ongominista ngame onda tseya ashihe shoka tashi inyenge momawiliko goondoolopa adhihe 57 moshilongo noshilando shaWindhoek shoka shili ashike popepi nangame itashi vulu okuholeka ndje shoka tashi ningi andola. Oshinima oshikwawo shoka sha pumbwa okulongwa mbala osho okutala keinyengo tali ende kashona moku eta po omahala goku tungwa omatungo moWindhoek. Omwedhi gwayi Oshigongi shopashigwana osha pulile ndje ndi gandje omiyalu dhomahala ngoka ga opalekwa moshilongo ashihe opo pu tungwe omagumbo okuza omumvo 2014.
Omiyalu dhomoWindhoek odha li tadhi uvitha nayi noonkondo.Otu uvite kutya omutungilo gwevi ogo tagu dhigupaleke elongekidho lyevi muka ndele shika inashi kala osho eipopilo. Oshoka oshikondo shopaumwene otashi vulu oku kwathela moopoloyeka ndhika okupitila melongelokumwe lyopaumwene noshigwana nenge nepangelo. Ndele osha fa ishewe oompito dha tya ngeyi hadhi pewa ashike aalongekidhi yevi ya hogololwa omanga yalwe yomwaalu omunene taya mono iihuna. Onkene onda hala ewiliko lyaWindhoek li ete po elunduluko moshinima shika noku holola po omahala gokutungwa ngoka taga vulika kaantu oyendji.

Opo omashongo ngaka ga kandulwe po osha pumbiwa okulonga nomukalo omupe moku gwanitha po shika, okutopola oonzo osho wo mewiliko lyakwalukehe lyesiku kehe. Ina shi pumbiwa opo iilonga mbika yi tsikile tayi longwa ashike pamukalo ngoka omukulu twa fa ashike iilonga mbyoka hayi longwa kaaniilonga yoholomende. Ope na okulongwa nawa nonondjungu opo aakwashigwana mboka taya vundakanithwa koluhepo nokondjala ya vule okunakulwa mo.

Onkene oopoloyeka ndhoka dha nyolwa modokumende ndjika ya tulwa miilonga nena odha pumbwa oku endelelekwa opo aantu ya mone kutya otapu humiwa komeho mokuhwepopeka oonkalo dhawo dhokumwenya moWindhoek.

• Oshinyolwa shika osha kuthwa moshipopiwa shaMinista gwEyokomeho miilando nokomikunda, Sophia Shaningwa pethimbo a popi petseyitho lyomathaneko gokulundulula onkalo moWindhoke omimvo ntano tu uka.

LEAVE A REPLY

Please enter your comment!
Please enter your name here