AaNamibia taya ka ulika iinima yoohango

0
1388

Pinehas Nakaziko

Windhoek-Omauliko giinima ayihe yi na sha noohango nenge mbyoka hayi longithwa poohango otaga ka ningwa Olyomakaya ndjika poNamPower Convention Center moWindhoek.

Omauliko ngaka oga etwapo kehangano lyo kulongekidha oohango moshilongo ndyoka li lilwe komeho kuLuciana Kangombe, e shiwike nawa nedhina Lucy K.

Omauliko ngaka otaga ka ulikwa kohi yoshipalanyolo notema “Okuhokitha, nokutseyitha”.
Lucy K okwa ti pethimbo ndika otaya ka tala kiinima ayihe mbyoka yi na sha noohango nohayi ningwa poohango ngaashi iizalomwa yaafuko niinkumbi, aathaneki yomafano, aalongekidhi yiituthi, iikuki yoohango naalandithi yuulinga, opo ya ka ulike iinima yawo pehala limwe.

Aauliki yaadha 15 yomoshilongo nayaali yopondje yoshilongo oya hiwa opo ye ye ya ulike iilandithomwa yawo.
Francis Photo Studio, By Invites, NWR, Vibrant Dynamic Investments, Leni Clothing, Loyal Boutique noGalaxy Advertising ogo omahangano gamwe taga ka ulika iilandithomwa yago.

Pomauliko ngaka otapu ka kala ishewe oshigongi shaahokani shoka tashi ka hunga nokundungika aagundjuka mboka yeli pokuhokana, nenge mboka opo yahokana nkene yena okukwata nawa omaliko gawo.

Ongulohi ndjika otayi ka hula ishewe neuliko lyoonguwo dhaafuko moka aayendi dhingi 12 taya ka enda noku ulika omizalo ndhika.
Franklin & DA na CJ oyo aahikingalo taya ka mwenyeka oshiithanene shika, omanga PDK taka imba oongalo dhe dho mo albuma ye ompe yedhina Odikwa. Uutekete oku ka kala moshiithanene shika otawu ka monika kooN$ 80, noshituthi otashi ka tameka pohamano yokomatango.

LEAVE A REPLY

Please enter your comment!
Please enter your name here